Бу күннэргэ «Арассыыйа сомоҕото — норуоттар доҕордоһууларыгар» улуустааҕы онлайн-бэстибээл Амма улууһун нэһилиэктэринэн ыытылынна. Тэрээһин Аммаҕа сир оҥоһуутун 350 сылыгар уонна Амма Солобуодата төрүттэммитэ 370 сылыгар ананна.
2021 сылга аммалар бары тэрээһиннэрэ бу үбүлүөйдээх бэлиэ дааталарга ананар. Нэһилиэктэр икки ардыларынааҕы Култуура бэстибээлэ Амма улууһугар олохсуйан олорор омуктар үгэстэрин, абыычайдарын, култуураларын арыйар театрализованнай көстүүнэн арыйдылар. «Биһиги, абаҕалар, бүрээт норуотун култууратын арыйан, бүрээттии ыллаан, үҥкүүлэрин үҥкүүлээн, хоһоон ааҕан кытынныбыт. Бүрээттэр национальнай көстүүмнэрин тиктэн, бу омук туһунан үөрэтэн, бэрт элбэҕи биллибит үөрэттибит. «Кыра уонна улахан нэһилиэктэр» диэн арахсабыт. Бэстибээл күрэһин түмүгэ сотору тахсыаҕа. Тэрээһини Амма улууһунааҕы Култуура управлениета көҕүлээн ыытар«, — диэн СӨ култууратын үтүөлээх үлэһитэ, Амма улууһун Абаҕа нэһилиэгинээҕи Култуура дьиэтин дириэктэрэ Екатерина Яковлева иһитиннэрдэ. Ити курдук, Амма улууһугар Күөх Маайы көрсө ыытыллыбыт култуура бэстибээлэ олохтоохторго бырааһынньыктааҕы сүргэни бэлэхтээтэ.
Елена ПОТОЦКАЯ, «Саха сирэ» хаһыат, edersaas.ru