Амма сэлиэнньэтигэр кулун тутар 26 күнүгэр хаһаайына суох хаалбыт кыыллары көрөргө-истэргэ анаан тутуллубут дьиэ арыллыыта буолла. Дьиэҕэ хаһаайыстыбаннай блок уонна бэтэринээр пууна үлэлииллэр, кыыллары көрөр-истэр уонна эппэрээссийэлиир, эппэрээссийэ кэннэ сытыарар уонна дезинфекциялыыр хостор, изолятор, аһы харайар, хаһаайыстыбаннай чаас, о.д.а. бааллар.
Маннык дьиэни тутууну Амма нэһилиэгин баһылыга Михаил Артемьев көҕүлээбитэ. Атын нэһилиэктэр баһылыктарын кытары сөбүлэһии түһэрсэн, харчы хомуйбуттара. Барыта 884 тыһыынча солкуобай хомуллубута, ол онтон 200 тыһыынча солкуобайга таһырдьа турар, оттуллубат вольер, күрүө-хаһаа, олбуор тутуллубута. 684 тыһыынча солкуобайга бу хаһаайыстыбаннай блок уонна бэтэринээр пуунун дьиэтин туппуттар.
Нэһилиэктэртэн бэйдиэ сылдьар ыттары тутан киллэрэн, бу пууҥҥа тутан, эмтээн баран, саҥа хаһаайыттарын булалларыгар туһуламмыт үлэ барыахтаах.
Үгүс нэһилиэктэргэ бэйдиэ сылдьар ыттар кыһалҕалара сытыытык турар. Хас биирдии кыра нэһилиэк бу кыһалҕаны быһаара охсоро уустук. Ол эрээри олохтоох бэйэни слаайыныы уорганнара кыттыһан, сүбэлэһэн, бу курдук дьаһаныахтарын сөп эбит. Этэргэ дылы, “сүгэ кыайбатаҕын, сүбэ кыайар”.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru