Чыпчылҕан түгэн бүтүн дьылҕаны быһаарыан сөп. Буолаары буолан, итирдэр утахтан төрүөттээх буоллаҕына. Арыгы испит киһи буруйу оҥороро дэбигис.
Амма улууһугар 12 саастаах оҕо ийэтин туох да омуна суох, өлөр өлүүттэн быыһаабыт. Ол маннык буолбут:
26 саастаах киһи хас да сыллааҕыта бииргэ олоро сылдьыбыт 34 саастаах дьахтарын кытта сыһыанын Саҥа дьыл бырааһынньыгын иннинэ хат сөргүтүөн баҕарбыт. Ол эрэн, дьахтар сырыы аайы аккаастаан, тиийбит киһини төттөрү ыытар эбит.
Биир күн эр киһи буолуохсут бытыылка буокканы иһэн баран, эмиэ тапталлааҕын дьиэтигэр тиийбит. Ону дьахтар холдьоҕон таһаара сатаабытыгар, ыҥырыыта суох нүһэр ыалдьыт өлөрөрүнэн суоһурҕана-суоһурҕана, кырбаан киирэн барбыт.
Ол ыһыыны-хаһыыны истэн, дьахтар 12 саастаах оҕото хоһугар сүүрэн киирэн, орон анныгар саспыт уонна полицияҕа эрийэн, ийэтин биир итирик киһи өлөрөн эрэрин туһунан тыллаабыт.
Ыйыллыбыт аадырыска суһаллык участковай тиийэн, дьахтары кырбыы сылдьар урдуһу туппут.
Бу чахчынан РФ Холуобунай кодексатын 119-с ыст. 1 чааһынан, ол эбэтэр, өлөрөрүнэн биитэр доруобуйаҕа ыарахан эмсэҕэлээһини оҥоруунан суоһурҕаныы бэлиэтэ баарынан, холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн