«Халаан содулун туоратарга бэлэммит диэҕи, халааҥҥа эмсэҕэлээбит нэһилиэнньэлээх пууннар элбиэхтэрэ, алдьаныы-кээһэнии өссө улаатыаҕа диэн сэрэхэчийэбит», – диэн бэлиэтиир СӨ бырабыыталыстыбатын бэрэссэдээтэлэ Евгений Чекин “Саха сирэ” хаһыакка биэрбит интервьютугар.
Евгений Алексеевич, бастатан туран, өрөспүүбүлүкэҕэ ыксаллаах быһыы-майгы бүрүүкээтэҕинэ, бүддьүөт хаһаас фондатыттан харчыны туһаныахха сөбүн эттэ. “Үгүс хоромньу тахсан, өрөспүүбүлүкэ бүддьүөтүгэр улахан ноҕоруусканы сүктэрэр. Бу маннык түгэҥҥэ туһаныахпыт диэн бүддьүөппүтүгэр 120,2 мөл. солк. көрөн олоробут. Ону таһынан, 98,1 мөл. солк. суумалаах материальнай ресурсалаахпыт. Олохтоох салайыныыларга барыта 83,6 мөл. солк. хаһаас үп, 77 мөл. солк. суумалаах материальнай ресурса баар. Ол эрээри халаан содулун туоратарга бэлэммит диэҕи, халааҥҥа эмсэҕэлээбит нэһилиэнньэлээх пууннар элбиэхтэрэ, алдьаныы-кээһэнии өссө улаатыаҕа диэн сэрэхэчийэбит”, — диэн бэлиэтиир кини.
Салгыы кини Аммаҕа буолуохтаах Саха сирин норуоттарын VII спортивнай оонньуулара 2019 сылга көспүтүнэн, былааннаммыт тутуулартан быйыл туох үлэҕэ киириэҕин иһитиннэрдэ. “Быйыл Аммаҕа буолуохтаах оонньуулар олус ыгымнык ыытыллыахтаахтара эрдэттэн да биллэрэ. Тутуулар болдьохторугар бүппэт кутталлаахтара. Сорох тутуулар 2019 с. үлэҕэ киириэхтээхтэрэ. Онон, биир өттүнэн, тутааччылар эбийиэктэрин ситэрэр-хоторор бириэмэлэннилэр”, — диэн этэр кини.
Ону таһынан быйыл буолуохтаах Аан дойдутааҕы интеллектуальнай оонньуулар, Платон Ойуунускай төрөөбүтэ 125 сылыгар анаммыт тэрээһиннэр, Олоҥхо ыһыаҕа тоҕо көспөтөҕүн туһунан кэпсээтэ. Бу туһунан сиһилии “Саха сирэ” хаһыат бу нэдиэлэтээҕи нүөмэригэр (20-с №-гэр) ааҕыҥ.
Аграфена КУЗЬМИНА, “Саха сирэ” хаһыат.