Бырабыыталыстыба бэрэссэдээтэлин солбуйааччы Ольга Балабкина быһа эпииргэ өрөспүүбүлүкэ үрдүнэн дьаҥ балаһыанньатын билиһиннэрдэ. Ол курдук, Амма улууһугар тастан аҕалыллыбыт дьаҥ баара биллибит. Билигин улуус суһал ыстааба хантаактаспыт дьону быһаарарга үлэлэһэ сылдьарын иһитиннэрдэ.
Маны сэргэ Горнай улууһугар коронавирус дьаҥар хаптарбыт киһи баара билиннэ.
Өлүөхүмэ оройуонугар дезинфекция үлэтэ күүстээхтик ыытыллыан наадатын Ольга Валерьевна ыйда. Нэһилиэктэр бэйэ икки ардылара чугаһа, сылдьыһыы элбэҕэ саҥа дьаҥы күөртүөн сөбүн сэрэттэ.
Чурапчы улууһугар бу дьаҥтан биир киһи үтүөрбүт. Ону сэргэ, бүтүн дьиэ кэргэн — эһээтиттэн кыра оҕотугар тиийэ дьаҥҥа хаптаран эмтэнэллэрин эттэ.
Ольга Валерьевна мэдиссиинэ үлэһиттэрэ үһүс ыйдарын сынньалаҥа суох үлэлии сылдьалларын, дьиэ кэргэттэриттэн тэйиччи сылдьалларын бэлиэтээтэ. Онон быраастар, миэдиктэр үлэлэрин сыаналааҥ, мааската суох таһырдьа тахсымаҥ диэтэ.
Хааччахтааһыны сымнатыы нэдиэлэ кэриҥинэн быһаарыллыан сөбүн Саха сирин «Роспотребнадзор» салайааччыта Маргарита Игнатьева иһитиннэрбит.
Ульяна Захарова, edersaas.ru