Амма көмүөлэ аастар эрэ, «мындаҕаайылар» ыһыыны саҕалыахтара

Ааптар: 
Бөлөххө киир:

Чурапчы улууһун баһылыга Андрей Ноговицын Мындаҕаайыга сылдьан, хаһаайыстыбалар ыһыы үлэтигэр төһө бэлэмнээхтэрин билистэ.

edersaas.ru

«Мындаҕаайы» кэпэрэтиип бурдугу 342 гектарга, ол иһигэр эбиэһи 223 гектарга, ньэчимиэни 119 гектага ыһар былааннаах. Маны таһынан, сиилэскэ уонна сенажка анаан 125 гектар бааһынаҕа күөх үүнээйини, 100 гектарга элбэх сыллаах оту ыһыахтаах. Онно сөп буолар сиэмэни хаһаайыстыба эрдэттэн хааччыммыт. Билигин мэхэньисээтэрдэр тиэхиньикэлэрин көрө-истэ сылдьаллар. Амма өрүс көмүөлэ аастар эрэ, тыраахтардарын уҥуор таһааран, ыһыыга турунуохтара.

Данил Павлов бааһынай хаһаайыстыбата хортуоппуйу 35 гектарга, моркуобу 3 гектарга, сүбүөкүлэни биир гектарга олордуохтаах. Бу иһигэр «Дьиэҕэр олор — дьиэ кэргэн экономикатынан дьарыктан!» бырагыраама чэрчитинэн, улуус киинин элбэх кыбартыыралаах уопсай дьиэлэригэр олорор ыалларга анаан икки гектарга хортуоппуй олордор. Хортуоппуйун сиэмэтэ (70 туонна) бэйэтин үүнүүтэ, онно эбэн 20 туоннаны Амма бааһынайа Александр Фоминтан ылбыт, оттон Амур уобалаһыттан 13 туонна элита суорду атыыласпыта тимир суолунан иһэр. Андрей Ноговицын эдэр бааһынай хаһаайыстыбата хортуоппуйга улуус тирэх хаһаайыстыбата буоларын санатта, өлгөм үүнүүнү ыларыгар алгыһын тириэртэ.

Мындаҕаайы агро-оскуолатын «Эйгэ» кэпэрэтиибэ сайыҥҥы сибэкки уонна оҕуруот аһын арассаадаларын үүннэрэн ыраатыннарбыт. Онтон сороҕун атыылыыр, сороҕун олордор санаалаахтар. Быйыл эмиэ үгэс курдук, түөрт гектарга хаппыыстаны, биир гектарга моркуобу уонна сүбүөкүлэни, хортуоппуйу үс гектарга олордуохтара. Бу туһунан улуус дьаһалтатын пресс-киинэ иһитиннэрэр.

Раиса Сибирякова, «Саха сирэ» хаһыат,  edersaas.ru

+1
0
+1
0
+1
0
+1
0
+1
0
+1
0
+1
0