Сыл саҕаланыыта РФ бэрэсидьиэнэ Владимир Путин Федеральнай Мунньахха Анал этиитигэр алын кылаас оҕолорун барыларын босхо аһылыгынан хааччыйар туһунан эппитэ. Тустаах этии олоххо киириитигэр хамсааһын саҕаланна.
Билигин сууманы, ахсааны чопчулуур инниттэн, дойду Үөрэҕин министиэристибэтэ эрэгийиэннэргэ ирдэбил суруктары ыыталыыр. СӨ Үөрэҕин уонна наукатын миниистирэ Владимир Егоров иһитиннэрбитинэн, Саха сирин алын кылааһын үөрэнээччитин барытын босхо аһылыгынан хааччыйарга 500 мөлүйүөн солкуобай ирдэнэр. Барыллаан үллэриинэн, дойду хааһынатыттан биһиги өрөспүүбүлүкэбитигэр 391 мөлүйүөн солкуобай көрүллүөхтээх. Онон Саха сирэ 109 мөлүйүөн солкуобайы утары үбүлүөхтээх. Ил Дархан Айсен Николаев Саха сирэ утары үбүлүүргэ бэлэмин биллэрбит. “Ити хаачыстыбалаах бородууксуйаны атыылаһарга, хаачыстыбалаах аһылыгынан хааччыйарга балачча элбэх суума”, — диэн миниистир тэрээһин кэмигэр эттэ. Онон аны күһүҥҥүттэн (2020 сыл балаҕан ыйын 1 күнүттэн) алын кылаас 61 тыһыынча үөрэнээччитэ бары босхо, итии, доруобай аһылыгынан хааччыллыахтаахтар.
Людмила ПОПОВА, edersaas.ru