2022 сылга Аляска-Сибиир (АлСиб) салгынынан ааһар трасса оҥоһуллубута 80 сыла туолуоҕа.
edersaas.ru
Аляска-Сибиир салгын суола Аҕа дойду улуу сэриитин кэмигэр Эмиэрикэ бойобуой сөмөлүөттэрэ Аляска, Чукотка уонна Сибиир нөҥүө ааһалларын хааччыйбыта.
Бүгүн өрөспүүбүлүкэ бастакы вице-премьерэ Дмитрий Садовников үбүлүөйдээх дьаһалларга бэлэмнэнии уонна ыытыы боппуруостарын мунньаҕар норуот дьокутааттарын, салгын суолун салаатын үлэһиттэрин уонна уопсастыбанньыктар этиилэрин иһиттэ.
Дмитрий Садовников:
«АлСиб салгын суола төрүттэммитэ 80 сыла Саха АССР тэриллибитэ 100 сылыгар сөп түбэһэр. Биһиги биир дойдулаахтарбытыгар уонна бу салгын көрүдүөрүн кытта сибээстээх дьоҥҥо барыларыгар убаастабылбытын биллэриэхтээхпит», -– диэтэ.
Кини үбүлүөйдээх дьаһаллар кэмитиэттэрин тэрийэргэ, Гагарин аатынан искибиэр бырайыактыыр-смета докумуонун түмүктүүргэ сорудахтаата.
Үбүлүөй үөрүүлээх дьаһала 2022 сыл сэтинньитигэр Гагарин аатынан Култуура киинигэр ыытыллара сабаҕаланар. Ону сэргэ, Саха сиригэр сөмөлүөттэр сууллубут миэстэлэринэн (биирэ Томпо оройуонугар баар) эспэдииссийэни тэрийии былааннанар. Үбүлүөйдээх дьаһалларга АлСиб ааспыт суоллаах атын эрэгийиэннэр эмиэ кыттыахтара. Кинилэр «Тымныы оройо-Өймөкөөн-Магадан-Кроасноярскай» кыһыҥҥы марафоҥҥа кыттыахтара.
Надежда ЕГОРОВА, «Саха сирэ», edersaas.ru