Алтынньы 5-8 күннэригэр Санкт-Петербурга аан дойдутааҕы ньиэп уонна гаас X-с форума ыытыллар
Бу нэдиэлэҕэ, балаҕан ыйын 5-8 күннэригэр, Санкт-Петербург куоракка аан дойдутааҕы ньиэп уонна гаас Х-с форума ыытыллыаҕа. Тэрээһин устуоруйатын кыратык сэгэтэн көрөр буоллахха, форум 2011 сылтан ыытыллар.
Гаас уонна ньиэп индустриятыгар аан дойду таһымнаах тэрилтэлэр салайааччылара, бэрэстэбиитэллэрэ кытталлар. Быйылгы форум 10-с төгүлүн ыыталларынан үбүлүөйдээх тэрээһининэн буолар.
Форум кыттааччылара гаас салаатыгар туһаныллар саҥа оборудованиелары анаан-минээн аҕалан көрдөрөллөр. Уопсайынан, Арассыыйаҕа гаас бырамыысыланнаһын сайыннарыы боппуруостарыттан саҕалаан, аан дойдутааҕы гаас бырамыысыланнаһын сайдыытыгар туох саҥа саҕахтар, саҥа саҕалааһыннар баалларын туһунан кэпсэтии барар. Итилэри илдьиритэн быһаарсар инниттэн 90-тан тахса араас тэрээһиннэр ыытыллаллар. Форумҥа гаас бырамыысыланнаһын бары салаатыттан эспиэрдэр, тас дойдулартан – Италияттан, Германияттан, Францияттан, Австрияттан, Словакияттан, Чехияттан, Боливияттан, Нигерия өрөспүүбүлүкэтиттэн тиийэ кытталлар, санааларын атастаһаллар, уопуттарын үллэстэллэр.
Михаил Кириллин, СӨ бырамыысыланнаска уонна геологияҕа миниистирин 1-кы солбуйааччы:
— Бу улахан тэрээһиҥҥэ Ил Дархан Айсен Николаев, СӨ Бырабыыталыстыбатын Бэрэссэдээтэлин 1-кы солбуйааччы Кирилл Бычков, СӨ бырамыысыланнаска уонна геологияҕа миниистирэ Максим Терещенко, «Сахатранснефтегаз» АУо генеральнай дириэктэрэ Алексей Колодезников, уо.да.а. кыттыахтара.
Форумҥа «Газпром” АУо бары салааларын тэрилтэлэрин уонна Арассыыйа бырамыысыланнаһыгар биллэр-көстөр хампаанньалар салайааччылара, бэрэстэбиитэллэрэ кэлэн, анал кэмпириэнсийэлэргэ, сэминээрдэргэ, быыстапкаларга кыттан, гаас уонна ньиэп бырамыысыланнаһын сайыннарыыга санааларын, көрүүлэрин этиэхтэрэ. Саха сирин дэлигээссийэтэ «Газпром газомоторное топливо» ХЭУо салалтатын кытта көрсөн, инники өттүгэр бииргэ үлэлиир былааннарын, соруктарын тустарынан кэпсэтиэхтэрэ. Саха сиригэр гаас бырамыысыланнаһын сайыннарыы былааныттан саҕалаан тимир көлөлөргө гаас уматыгын оҥорууга саҥа технологияны туһаныы тустарынан билиһиннэриэхтэрэ.
РФ Бэрэсидьиэнэ Владимир Путин Анал этиитигэр социальнай гаастааһын бырагыраамата олоххо киллэриллиэхтээҕин туһунан эппитэ. Бырагыраама хайдах-туох үлэлиэхтээҕин, үбүлэниэхтээҕин барытын быһаарсан кэлиэхтэрэ. Маны таһынан Саха сиригэр гааһы переработкалааһынтан саҕалаан улахан инвестиционнай бырайыактары олоххо киллэрии былааннаныллар. Итилэри олоххо киллэриигэ «Газпром» хампаанньа кыттар. Онон олору быһаарыыга тустаах кэпсэтиилэр ыытыллыахтара. Форум таһыма уонна суолтата олус улахан. Гаас уонна ньиэп боппуруостарын быһаарыыга Арассыыйа эрэ таһымнаах буолбакка, аан дойду үгүс дойдуларыттан бэрэстэбиитэллэр кэлэн кыттар түһүлгэлэринэн буолар.
Саха Өрөспүүбүлүкэтин туһунан этэр буоллахха, бэйэтин гааһынан хааччыйар кыахтаах уонна ураты гаас ситимнээх эрэгийиэнинэн буолар. Бу гаас ситимин олохтоох хампаанньа «Сахатранснефтегаз» АУо үрдүк таһымнаахтык, эппиэтинэстээхтик көрөр-истэр. Нэһилиэнньэлээх пууннары гааһынан түүннэри-күнүстэри тохтоло суох хааччыйар. Онон форумҥа бу хампаанньа инники сайдыытын туһунан эмиэ кэпсэтиэхтэрэ. Холобур, хампаанньа бас билиитигэр баар Орто Түҥнээҕи уонна Отраднинскайдааҕы гаас баайдаах сирдэри инники өттүгэр хайдах быһыылаахтык туһанар туһунан «Газпром» хампаанньа салалтатын кытта быһаарсыахтара.
Саха сирэ тыйыс айылҕалаах эрэгийиэн буоларын быһыытынан кыһыҥҥы кэмҥэ сылааһынан хааччыллыы тыын боппуруоска тэҥнээх. Онон биһиги эрэгийиэммитигэр гаастан сылаас уонна уот оҥоһуллар. Сылга аҕыс ый устата гааһы тохтоло суох туһанан нэһилиэнньэлээх пууннары сылааһынан хааччыйан олоруу ханна даҕаны суоҕа биллэр. Онон биһиэхэ ураты болҕомто ууруллара хайаан да наада.
Александр Тарасов, edersaas.ru