РФ Бырабыыталыстыбатын бэрэссэдээтэлэ Михаил Мишустин хамнаһы хаалларан туран, уһун өрөбүлү биллэрэр туһунан этиитин РФ Бэрэсидьиэнэ Владимир Путин өйөөтө. Ол курдук, бэҕэһээ «Об установлении на территории Российской Федерации нерабочих дней в октябре – ноябре 2021 г.» диэн Ыйаахха илии баттаата.
Коронавирус дьаҥын тарҕаппат уонна нэһилиэнньэ доруобуйатын бөҕөргөтөр сыалтан, РФ Бэрэсидьиэнэ алтынньы 30 күнүттэн сэтинньи 7 күнүгэр диэри хамнаһы хаалларан туран, өрөбүл күннэри биллэрдэ.
Ыйаахха этиллэринэн, субьектар баһылыктара санитарнай-эпидемиологическай балаһыанньаттан көрөн, эрэгийиэннэригэр алтынньы 30 күнүн иннинэ өрөбүл күннэри биллэриэхтэрин уонна сэтинни 7 күнүн кэнниттэн салгыы уһатыахтарын сөп. Ону тэҥэ, Владимир Путин алтынньы-сэтинньи ыйдарга өрөбүл күн биллэрэллэринэн сибээстээн, аччыгый уонна орто урбааны өйүүр миэрэни ылалларыгар сорудахтаата.