Хой. Бу нэдиэлэҕэ быһаарыллыбакка сылдьар боппуруостарга хоруйдары ылыаххыт, барыта табыллан иһэриттэн соһуйуоххут. Ол эрээри, бэйэҕит тускутунан хоп-сип тарҕанарыттан сэрэниҥ. Дьон эһиэхэ ымсыырыан сөп, ол туһуттан онно-манна биллибэккэ-көстүбэккэ сылдьа сатааҥ. Күүстээх эбэтэр кэрэ аҥааргытын кытта чугасыһар, иһирэхтик кэпсэтэр түгэн үүнүөҕэ диэн сулустар сабаҕалыыллар.
Оҕус. Үлэҕитигэр ситиһии кэмэ үүммүт. Саҥа соруктары толорорго, харчылаах кэпсэтиилэр киирэллэригэр бэлэм сылдьыҥ. Ол эрээри, дьон ымсыы санаатыттан сэрэниҥ, этиһимэҥ, мөккүһүмэҥ. Сынньаныҥ, стресскитин таһаарыҥ.
Игирэлэр. Ситиһии кэлиэн баҕарар буоллаххытына, тугу да харыһыйбакка, кимтэн да толлубакка, иннигит диэки эрдэн иһиҥ. Үлэҕэ, тус олоххо – ситиһии кэмэ. Аҥааргытын була илик буоллаххытына көрсүөххүтүн сөп, иэйии киириэҕэ диэн сулустар кэпсииллэр.
Араак. Араактарга алтынньы иккис нэдиэлэтэ – харчы киирэр кэмэ. Тапталгытыгар даҕаны сатаныаххыт. Номнуо тапталлааххытын көрсүбүт буоллаххытына – барыта үчүгэй, оттон соҕотохтор хараххыт хайгыы көрөр киһитин кытта билсиэххит. Өрөбүллэргэ дьиэ ис-тас үлэтиттэн сынньаныҥ, бу күннэри бэйэҕитигэр анааҥ.
Хахай. Олорор усулуобуйаны тупсарарга, дьиэни-уоту өрө тардарга, өрөмүөннэнэргэ тоҕоостоох кэм үүммүт. Уруккуттан иэтэ сылдьар санааларгытын мунньан, баҕа санааҕыт дьиэтин-уотун оҥостуҥ. Билигин элбэҕи толкуйдаабыт, түбүгүрбүт сыраҕыт-сылбаҕыт бэртээхэй түмүктэри аҕалыаҕа.
Кыыс. Тас көрүҥҥүтүн, ис туруккутун тупсарарга үлэлэһиҥ. Бу табылыннаҕына үлэҕэр-хамнаскар үрдээһин, харчы кэлиитэ баар буолуоҕа диэн сулустары кэтээн көрөөччүлэр кэпсииллэр. Омук тылын үөрэтэргэ тоҕоостоох кэм үүммүт. Чугас дьоҥҥутун кытта кэпсэтиҥ, санааларын истиҥ.
Ыйааһын. Ыарахаттары көрсүөххүт, сылайыаххыт. Ол эрээри, наһаа санааҕытын түһэримэҥ. Мэһэйдэри, кыһалҕалары түргэнник быһаарыаххыт, барыта орун-оннугар түһүө. Харчыгытын харыстаан туттуҥ, халтайга бараамаҥ.
Скорпион. Күннээҕи түбүктэртэн сынньанан, доҕотторгутун кытта көрсүҥ, ирэ-хоро кэпсэтиҥ, күүлэйдээҥ, сибиэһэй салгыҥҥа сылдьыҥ. Бу эһиэхэ туһаны эрэ аҕалыаҕа. Дьиэ түөрт истиэнэтин манаан олорумаҥ. Спордунан дьарыктанарга, тас көрүҥү тупсарарга, саҥа таҥас атыылаһарга бэртээхэй нэдиэлэ үүммүт. Кытаатыҥ!
Охчут. Саҥаны саҕалыырга соччото суох нэдиэлэ үүммүт. Ол эрээри, ыһыктан кэбиһэргэ бу төрүөт буолуо суохтаах. Салалтаҕытыгар сатыыргытын-билэргитин барытын көрдөрүҥ. Ситиһии, үп-харчы кэлиэҕэ. Чугас дьоҥҥут эһиги сүбэҕитигэр наадыйар эбит.
Чубуку. Доруобуйаҕытын көрүнүҥ, профилактикаланыҥ. Халыҥнык таҥна сылдьыҥ, саҥа таҥас атыылаһарга тоҕоостоох кэм. Чугас дьоҥҥутун кытта тылга тииһимэҥ, күнүүлэһимэҥ. Тус олоххутугар саҥа сүүрээн киириэ.
Күрүлгэн. Бэйэҕитигэр саҥа талааны арыйыаххытын сөп. Бу туһуттан иэйии киллэрэ таарыйа сынньаныҥ, салгыҥҥа сылдьыҥ, интэриэһинэй дьону кытта кэпсэтиҥ. Сүрэҕэлдьээмэҥ. Нэдиэлэ бүтүүтэ соһуччу үөрүү күүтэр диэн сулустар кэпсииллэр.
Балыктар. Күүскүтүн көдьүүһэ суохха бараамаҥ, бэйэҕит иннигитин көрүнүҥ. Бу нэдиэлэ балык бэлиэлээх дьоҥҥо таһаарыылаах уонна ситиһиилээх буолуоҕа. Сыалгытын ситиһэргэ санааҕытын ууруҥ, барыта табыллыаҕа. edersaas.ru