Алтынньы 1 күнүттэн социальнай төлөбүрү уонна босуобуйаны МИР каартаҕа ыытыахтара
Алтынньы 1 күнүттэн Арассыыйаҕа, ол иһигэр Саха сирин олохтоохторугар социальнай төлөбүрү уонна босуобуйаны “МИР” национальнай төлөбүр систиэмэтин банковскай каартатыгар эрэ ыытыахтара.
“Сокуоҥҥа уларыйыылар киирбэттэринэн сибээстээн, биэнсийэни уонна атын социальнай төлөбүрдэрэ каартаҕа түһэр дьон, алтынньы 1 күнүгэр диэри “Мир” каартаны оҥорторуохтарын наада. Маныаха бэйэҕит бааҥҥытыгар бараргыт ирдэнэр. Салгыы счеккут реквизитын олорор сиргитинэн Социальнай харалта управлениетыгар тиксэрэҕит”, — диэн СӨ үлэҕэ уонна социальнай сайдыыга миниистирэ Елена Волкова иһитиннэрэр.
Федеральнай босуобуйаны уонна төлөбүрү баан каартатыгар ылар өрөспүүбүлүкэ бары олохтоохторо “МИР” төлөбүр систиэмэтин каартатын оҥортороллоро эбэтэр платежной каарта көмөтүнэн операция оҥоһуллубат банковскай счет астарыахтарын наада. Алтынньы 1 күнүн кэнниттэн социальнай төлөбүрдэр атын каарталарга кыайан барбат буолаллар. Олор кэккэлэргэр федеральнай сокуонунан көрүллэр радиация содулуттан эмсэҕэлээбиттэргэ, “Оҕолоох дьоҥҥо судаарыстыбаннай босуобуйа туһунан” федеральнай сокуонунан бигэргэммит оҕолоох дьоҥҥо анаммыт босуобуйалар, 3-7 саастаах оҕолорго көрүллэр ыйдааҕы төлөбүрдэр эмиэ. “Мир” каартаҕа ыытыы үлэтэ сыл устата барар.
СӨ үлэҕэ уонна социальнай сайдыыга министиэристибэтэ.