Оскуола үөрэҕэ ыраахтан олоруу эрэсиимигэр да буоллар түмүктэннэ. Оҕолор сайыҥҥы сынньалаҥ кэмигэр тугунан дьарыктаналлара быйыл өссө сытыытык турар — дьиэ таһыгар тахсар сэрэхтээх, уулуссаҕа күүлэйдиир бобуулаах. Тыаҕа эбээҕэ, эһээҕэ тахсыы эмиэ куттааллаах. Оччоҕо оҕо тугу гынар? Туһалаах сынньалаҥ биир көрүҥүн “Алтан” IT-оскуола биэриэн сөп.
edersaas.ru
Оҕолору көмпүүтэргэ үлэлииргэ үөрэтэр “Алтан” IT-оскуола үлэлээбитэ номнуо төрдүс сыла. Быйыл коронавирус ыарыы туран, үөрэтэр бырагыраамаларыгар улахан уларыйыылары киллэрэргэ күһэлиннилэр. От ыйыттан оҕолору түмэн, сайыҥҥы оскуолаларын аһыахтаах этилэр даҕаны, кэм ирдэбилинэн онлайн үөрэтиигэ көспүттэр.
Оскуоланы олохтооччулартан биирдэстэрэ Дьулустаан Осипов онлайн үөрэх хайдах ыытылларын туһунун маннык кэпсээтэ:
— Бу үөрэх биһиги оскуолабыт саамай кыра үөрэнээччилэригэр ананар. Иккис-төрдүс кылаас оҕолоругар анаан таҥыллыбыт бырагырааманы биир ый иһигэр үөрэтиэхтээхпит. Ирдэбил кыра — оҕоҕо үлэлиир көмпүүтэрдээх, веб-камера уонна микрофон баар буолуохтаах. Веб-камера хайаан да баара ирдэммэт, учуутал кини үлэтин микрофон нөҥүө салайыаҕа. Уопсайа 200-чэ оҕону мунньар санаалаахпыт, уруок биэс оҕолоох кыра бөлөххө ыытыллар. Ый иһигэр аҕыс онлайн уруок, (ол эбэтэр нэдиэлэҕэ икки биирдии чаастаах уруоктары) ыытыахпыт уонна биэс хачайданар видео уруок ыытыахпыт. Бу уруоктарга сүрүннээн “Scratch” диэн ааттаах, кыра оҕолору үөрэтэргэ ананан айыллыбыт көмпүүтэр тылыгар үөрэтэбит. Чэпчэтэн эттэххэ, бы тыл “Лего” конструкторга майгынныыр — оҕолор араас өҥнөөх блоктарынан хамсаныыны, дьүһүнү, тыаһы, уларыйыыны таҥаллар. Уонна эбиитин көмпүүтэр графикатыгар сыһыаннаах билиилэри биэриэхпит.
Бу куурустары барбыт оҕолор күһүн биһиги оскуолабытыгар арыый үрдүк таһымтан үөрэнэ кэлиэхтэрин сөп. Түмүккэ оҕо биһиги оскуолабытыттан аныгы идэни баһылааан тахсыан сөп.
Сиһилии бу үөрэх туһунан «Алтан» оскуола Инстаграм сирэйигэр билсиэххэ сөп:
https://www.instagram.com/altanschool/
Егор Карпов, «Саха сирэ» хаһыат, edersaas.ru
Хаартыскалар — оскуола архыыбыттан.