Алта киһини быыһаабыт иниспиэктэргэ «СӨ айылҕа харыстабылын туйгуна» бэлиэ туттарылынна
РФ Тулалыыр эйгэни харыстааһын сыла түмүктэнэн эрэр. Бу бэлиэ сыл чэрчитинэн, үлэҕэ бастыҥнары, ситиһиилээхтэри наҕараадалааһын буолла. СӨ Айылҕа харыстабылын миниистирэ Сахамин Афанасьев «Биологическай ресурсалар уонна ураты харыстанар сирдэр дирекцияларын» иниспиэктэригэр Иннокентий Егоровка «СӨ айылҕа харыстабылын туйгуна» бэлиэни үөрүүлээх быһыыга-майгыга туттарда.
edersaas.ru
Санатан эттэххэ, балаҕан ыйын 2 күнүгэр Уус Алдан улууһугар Чэриктэй нэһилиэгиттэн 1,5 көс кэриҥэ тэйиччи сытар учаастакка Иннокентий Егоров кэргэнинээн Алдан өрүскэ түспүт алта киһини өрүһүйбүттэрэ. Ол дьон балыктаан иһэннэр, лодкалара түҥнэстибит. Быһылаан буолар күнүгэр өрүс үрдүгэр эбиитин хойуу туман турбут, ардах түспүт.
Сахамин Афанасьев, СӨ Айылҕа харыстабылын миниистирэ:
— Биһиги эйгэбитигэр хорсун дьон үлэлииллэр. Ол курдук, быйыл Горнай улууһугар айылҕа харыстабылын иниспиэксийэтин исписэлииһэ Сардаана Кривошапкина «За спасение утопающих» мэтээлинэн наҕараадаламмыта. Онтон бүгүн бочуоттаах бэлиэни Иннокентий Егоровка туттардым. Кинилэр курдук дьонтон холобур ылыахтаахпыт.
Николай ПОПОВ, «Саха сирэ» хаһыат, edersaas.ru