Быйыл Аляска-Сибиир (АлСиб) салгынынан ааһар байыаннай сөмөлүөттэр трассалара 80 сылллаах үбүлүөйүн бэлиэтиир.
Аляска-Сибиир салгын суола Аҕа дойду Улуу сэриитин кэмигэр Эмиэрикэ байыаннай сөмөлүөттэрэ Аляска, Чукотка уонна Сибиир нөҥүө ааһалларын хааччыйбыта.
АлСиб салгын суола төрүттэммитэ 80 сыла Саха АССР тэриллибитэ 100 сылын кытта сөп түбэһэр. Саха сиригэр сөмөлүөттэр сууллубут миэстэлэринэн экспедицияны тэрийии былааҥҥа турбута.
Бүгүн Өймөкөөн улууһун олохтоохторо сүүнэ улахан байыаннай бөртөлүөт төттөрү-таары көппүтүгэр соһуйан, батсаап ситимигэр кэпсэттилэр. Онуоха улуус баһылыга Иннокентий Сивцев улуустааҕы «Хотугу сардаҥа» батсаап-бөлөҕөр «былырыын Нуучча географическай уопсастыбата тэрийбит бөлөҕө АлСиб аэродромнарын үөрэтэ кэлэ сылдьыбыта. Быйыл Ми-26 бөртөлүөт экспедиция кыттыылаахтарын эмиэ илдьэ кэллэ. Быйылгы үлэ сэрии саҕана Өймөкөөн сиригэр-уотугар саахалламмыт сөмөлүөттэри көрдөөһүҥҥэ ананна», диэн быһааран биэрдэ.
Томтордооҕу кыраайы үөрэтэр мусуой дириэктэринэн өр сылларга үлэлээбит Розалия Дягилева сэрии кэмигэр саахалламмыт сөмөлүөттэри көрдөөһүҥҥэ үгүс матырыйаалы хомуйбута. Экспедиция кыттыылаахтара Розалия Тимофеевнаны «Татаев хайатыгар» илдьэ тиийэн, Аҕа дойду сэриитин кэминээҕи өйдөбүнньүгү — саахалламмыт сөмөлүөтү булан Томторго аҕалан, үөрэтэ сылдьаллар.
Аҕа дойду Улуу сэриитин дуораана бүгүн Тымныы полюһугар Өймөкөөн улууһун Томтор нэһилиэгэр биллэн ааста…
Елена ПОТОЦКАЯ, «Саха сирэ» хаһыат.
Хаартыска: улуустааҕы «Хотугу сардаҥа» хаһыат батсаап бөлөҕүттэн.