«АЛРОСА» хос тэрилтэтэ «Анаабыр алмаастара» ыһыаҕынан бэлэх оҥорор

Былыр-былыргыттан өбүгэлэрбит күн муҥутуурдук уһуур күнүгэр – бэс ыйын 21чыыһылатыгар – Үрүҥ тунах ыһыаҕы ыһар алгыстаах, күүтүүлээх күннэрэ үүнэрэ. Бу бэлиэ национальнай бырааһынньыгы көрсө АЛРОСА хос-тэрилтэтэ “Анаабыр алмаастара” Саха сирин олохтоохторугар ураты, сонун бэлэҕи бэлэмнээтэ.

edersaas.ru

Ол курдук, бу нэдиэлэҕэ хампаанньа корпоративнай саайтыгар “Сказки народов Севера” иккис чааһын онлайн-таһаарыыта сүрэхтэнэр. Бу сонун бырайыак – тыл учуонайдарын, артыыстар, уус-уран иллюстратордар уонна волонтердар айымьылаах бииргэ үлэлэһиилэрин үтүөкэн түмүгэ буолар. Диискэ аутентичнай контентан турар. Бу манна эбээн, эбэҥки, долган, юкагир, чукотка, саха уонна нуучча тылларынан бастыҥ, алыптаах остуоруйалар талыллан киирбиттэр.

Аны, саҥа бырайыак дьон киэҥ араҥатыгар тахсар күнэ-дьыла мээнэҕэ талыллыбатах. Ыһыах – дириҥ ис хоһоонноох, туһунан ис кистэлэҥнээх, итэҕэлбитигэр быһаччы сыһыаннаах (сакральнай) бырааһынньык. Бу күн үйэлэр тухары көлүөнэттэн көлүөнэҕэ бэриллэн испит омук мындыр өйө-санаата, муудараһа, эрэлэ, үтүө уонна мөкү туһунан өйдөбүлэ иҥмит тылынан уус-уран айымньытын, фольклорун ахтар-саныыр, толорор үтүө үгэс баар.  Өйдөнөр төрүөтүнэн, быйылгы үрүҥ тунах ыһыах онлайн-формакка барара быһаарыллыбыта. Бу түгэҥҥэ “Хотугу норуоттар остуоруйалара” (“Сказки народов Севера”) электроннай барыйаанынан тахсыыта – үгүстэргэ Ыһыаҕы көрсө дьоһуннаах бэлэх буолуо.

Бу бырайыак маҥнайгы түһүмэҕэ өссө 2018 сыллаахха, “Анаабыр алмаастара” аахсыйалаахтар уопсастыбалара сүүрбэ сыллаах үбүлүөйүн көрсө олоххо киирбитэ. Онно “Сказки народов Севера” диэн хоту сиргэ олохтоох сэттэ омук тылынан суруллубут 30 остуоруйа, үһүйээн түмүллүбүт мультимедийнэй диискэ тахсыбыта.

ВГТРК ФГУП филиала “Саха” ГТРК «Саха» РАН Сибиирдээҕи отделениетын Гуманитарнай чинчийиилэргэ уонна аҕыйах ахсааннаах омуктар кыһалҕаларыгар институт үлэһиттэрин кытта  М.К. Аммосов аатынан ХИФУ, Арктикатааҕы култуура судаарыстыбаннай институтун устудьуоннарын, Олоҥхо тыйаатырын, А.С. Пушкин аатынан судаарыстыбаннай академическай нуучча драмтыйаатырын артыыстаын уонна олоҥхоһуттар, көхтөөх уопсастыбанньыктар кыттыыларынан, Хоту сир норуоттарын фольклорун үйэтитиигэ, оҕо дьоҥҥо билиһиннэриигэ туһаайан, сүҥкэннээх үлэ оҥоһуллубута.
Айылҕа, күн-дьыл туругуттан, бултка-аска бааттаах буолууттан улаханнык тутулуктанар, тыйыс кыраайга олорооччулар күннээҕи олохторо барыта  хоту сир дьонун уус-уран айымньыларыгар арылыччы көстөн кэлэр. Ол барыта остуоруйа эйгэтигэр, дьоруойдар майгыларыгар-сигилилэригэр, айымньы хабар иэнигэр, кэпсиир-тиэрдэр истиилигэр кытта бэриллэн, олох ураты айымнылары үөскэтэр.

Үлэ бастакы чааһыгар дьоруойдар майгылара-сигилилэрэ, хотугу фольклор поэтиката таллааннаах худуоһунньук Роман Марков иллюстрацияларыгар чаҕылхайдык уонна ырылхайдык көстөр. Оттон иккис чааска хотугу остуоруйалар уруһуйдарын эдэр, талааннаах худуоһунньук Степан Данилов айан-тутан таһаарда.

Оҕо дьону, кинилэр төрөппүттэрин уонна хоту сир аҕыйах ахсааннаах омуктарын тылларын үөрэтэр учууталлары, устудьуоннары бу сонун электроннай таһаарыы олус сэҥээрдиэ, интэриэһиргэтиэ диэн хомуурунньугу өйөөн таһаарааччылар бүк эрэнэллэр. Айымньылар икки – ийэ тылларынан (оригинал) уонна нууччалыыга тылбаастаммыт буолан,  ааҕааччы лаппа  киэҥ араҥата ааҕарыгар тирэх буолуо.

«Бу интэриэһинэй бырайыагы биһиги өрөспүүбүлүкэҕэ, чуолаан “Анаабыр алмаастара” үлэлиир сирдэриттэн чугас тайаан сытар сирдэргэ олохсуйбут олорор, үлэлиир төрүт омуктар  төрөөбүт тыллара сүппэккэ-өспөккө, үйэтийэ турарыгар баҕаран туран, түмэн таһаардыбыт. Бу биһиги биир сүбэнэн бэлэмнээн таһаарар дьоҕус кылааппыт буолар, бу хайыскаҕа кэнэҕэһин да салгыы үлэлэһиэхпит», — диэн, “Анаабыр алмаастара” АУо генеральнай дириэктэрэ Павел Маринычев анаан бэлиэтиир.

“Анаабыр алмаастара” АУо киирсэр «АЛРОСА» АУо (ПАО) хампаанньа уонунан сыллар усталарыгар өрөспүүбүлүкэҕэ олорор норуоттар үтүө үгэстэрин, тылларын-өстөрүн сайыннарыыга уонна үйэтитиигэ күүс-өйөбүл буолар. Ол курдук, 2019 сыллаахха  “Өбүгэлэрим тыла” (“Язык предков”) диэн оҕолорго уонна эрдэҕэс оҕолорго анаммыт өрөспүүбүлүкэтээҕи куонкурус тэриллэн, Саха сирин араас муннуктарыттан айар кэлэктииптэр көхтөөхтүк кыттыбыттара элбэҕи этэр.

Быйыл “Колодец сказок” оҕолор ортолоругар ыытыллар күөн көрүс түмүгэ балаҕан ыйын ортотугар тахсыаҕа. Маны таһынан урукку сылларга  АЛРОСА – “«Большая литературная премия России» диэн Бүтүн Арассыыйатааҕы ааттаах-суоллаах күөн-күрэс солбуллубат учредитела этэ. Ол куонкуруска араас кэмҥэ биһиги өрөспүүбүлүкэттэн лауреат үрдүк аатын  саха литэрэтиирэтин, тылын бастыҥ маастардара, Саха сирин норуодунай суруйааччылара сүкпүттэрэ. Кинилэр ортолоругар   Дмитрий Кононович Сивцев-Суорун Омоллоон, Савва Иванович Тарасов, Андрей Васильевич Кривошапкин, Николай Алексеевич Лугинов,  Наталья Ивановна Харлампьева уо.д.а. бааллар.

«Саха сирэ», edersaas.ru сайтка анаан

«Анаабыр алмаастара» АУо пресс-сулууспата