«АЛРОСА» «Заря» туруупка баайдаах сирин туһаҕа таһаарыытын саҕалаата
17.04.2019
«АЛРОСА» компания сыл ахсын ыытар «Хозактив-2019» форумугар историяҕа киирэр түгэн буолла. Ол курдук, Айхал ГОК «Заря» баайдаах сиригэр промышленный дэлби тэбии оҥоһулунна. Маннык ньыманан өссө биир баайдаах сири туһаҕа таһаарыы саҕаланна диэн СИА Федор Григорьев суруйар.
Бастакы дэлби тэптэрии компания генеральнай дириэктэрэ Сергей Иванов хамаандатынан оҥоһулунна. СӨ Ил Дархана Айсен Николаев «АЛРОСА» кэлэктиибин үлэҕэ дьоһун кыайыытынан эҕэрдэлээтэ.
«Бу түгэн «АЛРОСА» компанияҕа уонна өрөспүүбүлүкэ бүттүүнүгэр чахчы историяҕа киирэр. Бу— Айхал бөһүөлэгин харыстааһын уонна салгыы сайыннарар суол. Бу — өрөспүүбүлүкэ бүддьүөтүгэр саҥа нолуоктары киллэрэр. Кэнники сыл аҥаарыгар маннык түгэн иккиһин буолбута үөрүүлээх», — диэтэ Ил Дархан.
Бэлиэтээн эттэххэ, ааспыт сыл алтынньы 31 күнүгэр, РФ Бэрэсидьиэнэ Владимир Путин кыттыылаах телемост форматынан АЛРОСА Үөһээ Муунатааҕы баайдаах сири үлэлэппитэ. Бу сир сылга 1,8 мөл. караат алмааһы биэриэхтээх, оттон саппааһа 20 сыл устатыгар, 2042 сылга диэри, тиийиэхтээх.
Компания бу сири туһаҕа киллэрэн, аан дойдуга алмааһы хостооһуҥҥа өссө төгүл бастыҥ хампаанньа буоларын бигэргэттэ. Сергей Иванов форум аһыллыытыгар эппитинэн, 2019 сылга 38 мөл. караат алмааһы булары былаанныыллар. «Биһиги ырыынак биэтэҥнээһинин этэҥҥэ уонна холкутук ааһарбытыгар балаансаламмыт уонна бигэргэммит үп бэлиитикэтэ тирэх буолар. Маныаха биһиги ыытар реформаларбытыгар, туруоруллубут сыалга-сорукка сатаан, сөптөөхтүк уларыйан биэрэрбитин ааспыт сыл көрдөрөр», — диэн бэлиэтээтэ.
Хаартыскаҕа Анатолий Шестаков түһэриилэрэ
+1
+1
+1
+1
+1
+1
+1