Ааһан эрэр сылга СӨ Үүнэр көлүөнэ тус сыаллаах пуондатын “2016-2020 сылларга инники кэскилбит туһугар” 5 сыллаах тус сыаллаах бырагыраамата түмүктэнэр. АЛРОСА үбүлүүр бырагыраамата “Сайдыы” (“Развитие”) уонна “Көмөлөһүү” (“Содействие”) диэн икки хос бырагыраамалаах.
edersaas.ru
“Көмөлөһүү” хос бырагырааманы олоххо киллэрии чэрчитинэн кэнники 5 сылга эрэгийиэҥҥэ социальнай инфраструктура 11 эбийиэгэ тутулунна. Оттон бу күннэргэ тыа сиригэр өссө биир бөдөҥ эбийиэк – Мэҥэ Хаҥалас улууһун Майа сэлиэнньэтигэр Д.Ф.Ходулов аатынан элбэх хайысхалаах култуура-сынньалаҥ комплекса үөрүүлээхтик аһыллара күүтүллэр.
Майаҕа – Култуура уонна сынньалаҥ комплекса
Бу бырайыагы АЛРОСА үбүн өйөбүлүнэн Үүнэр көлүөнэ пуондата олоххо киллэрэр. Инвестиция кээмэйэ – 308 мөлүйүөн солкуобай. Сакаасчыт – “Тутуу дириэксийэтэ” ИСФ ХЭО, сүрүн тутааччы – “Мегинострой” ПК.
Ураты көстүүлээх икки мэндиэмэннээх дьиэ 3 000 квадратнай миэтэрэ кэриҥэ уопсай иэннээх. Бастакы этээскэ 300 миэстэлээх кэнсиэртиир саала, 100 миэстэлээх эбиэттиир саала, декорациялары харайар сир, доруобуйаларынан хааччахтаах дьон тахсалларыгар анал тэрил (подъемник), араас хостор уонна каасса, таҥас ыйыыр сир уо.д.а. баар буолуохтара. Иккис этээскэ 50 миэстэлээх киинэ көрдөрөр саала, фитнес-саала уонна үҥкүүнэн дьарыктанар кылаастар үлэлиэхтэрэ.
Саҥа комплекска нэһилиэнньэ улуустааҕы уонна өрөспүүбүлүкэтээҕи таһымнаах киэҥ хабааннаах култуурунай-маассабай тэрээһиннэргэ, айар дьоҕур уонна үҥкүү куруһуоктарыгар, успуорт-чэбдигирдэр сиэксийэлэригэр сылдьыаҕа.
«Улахан эбийиэги үлэҕэ киллэрии майаларга эрэ буолбакка, өрөспүүбүлүкэ бары олохтоохторугар үөрүүлээх уонна өр күүтүүлээх түгэнинэн буолар. Күүстээх уонна ситиһиилээх эрэгийиэн буоларга култуураны сайыннарыы, ыччат саҥаҕа үөрэнэригэр кыаҕы биэрии уонна бэйэни олоххо булунуу наадатын үчүгэйдик өйдүүбүт. Ол иһин, АЛРОСА социальнай бырагыраамалары олоххо киллэриигэ уонна бу Култуура дыбарыаһын курдук инфраструктура эбийиэктэрин тутууга көхтөөхтүк кыттар», – диэн АЛРОСА генеральнай дириэктэрин солбуйааччы Алексей Дьячковскай бэлиэтээн эттэ.
Баатаҕайга – терапия уонна оҕо отделениета
Ону таһынан, кэлэр сыл саҥатыгар өссө биир социальнай суолталаах эбийиэк – Дьааҥы оройуонун Баатаҕай бөһүөлэгэр 30 сытар миэстэлээх, күҥҥэ 180 киһи сылдьар поликлиникалаах терапия уонна оҕо салаата аһыллыаҕа.
3 000 квадратнай миэтэрэ уопсай иэннээх дьиэ ыарыыны быһаарар уонна эмтиир, терапия ыарыһахтарын доруобуйаларын чөлүгэр түһэрэр дьаһаллары ыытарга ананыаҕа. Поликлиника өҥөтүн чэрчитинэн оҕо терапевтарын уонна анал исписэлиистэр өҥөлөрө баар буолуоҕа. Сакаасчыт – “Атлант” ХЭТ, тутар тэрилтэ – “ТЭЛ” ХЭТ.
«Үйэ чиэппэриттэн ордук кэм устата ситиһиилээхтик үлэлиир пуонда социальнай эйгэ 130-тан тахса араас эбийиэгин тутта, саҥардан киллэрдэ уонна өрөмүөннээтэ. Бу барыта оҕолор уонна эдэр ыччат доруобуйатын чэбдигирдэригэр, өй-санаа, эт-сиин өттүнэн сайдарыгар уонна духуобунай кыаҕын арыйарыгар тирэх усулуобуйалары оҥордо. Өрөспүүбүлүкэҕэ саҥа эбийиэктэр тутулланнар, федеральнай уонна аан дойдутааҕы суолталаах маассабай дьаһаллар ыытылыннылар. Бу Саха сирин билиһиннэрэр каартатынан буолбут дьаһаллар өрөспүүбүлүкэ олохтооҕо инники идэтин таларыгар уонна сайдарыгар көмөлөһөр кыаҕы биэрдилэр. Билигин пуондаҕа киһи хапытаалын сайыннарар дьоһун суолталаах соруктары толорорго хайысхаламмыт улахан соруктар тураллар. Биһиги инникитин даҕаны өрөспүүбүлүкэ туруктаах сайдыытын хааччыйар туһугар биисинэс, судаарыстыба уонна уопсастыба кыахтарын түмэн, социальнай инфраструктура аныгы эбийиэктэрин тутуохпут, оҕо аймах бүттүүн экосистиэмэтэ сайдарын хааччыйар бырайыактары олоххо киллэриэхпит”, – диэтэ СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров.
АЛРОСА Саха Өрөспүүбүлүкэтин Үүнэр көлүөнэ тус сыаллаах пуондатын нөҥүө култуура, үөрэхтээһин, наука, доруобуйа харыстабыла сайдыыларыгар, дьиэ кэргэни, успуорду уонна физкултуурунай хамсааһыны, экология харыстабылын өйөөһүҥҥэ анаммыт сүүһүнэн бырайыагы олоххо киллэрэр.
АЛРОСА уонна тус сыаллаах пуонда бииргэ үлэлээһиннэринэн, киһи хапытаалын өйүүргэ уонна элбэтэргэ анаммыт 100-тэн тахса үөрэх, успуорт, култуура уонна социальнай эбийиэктэри тутуу уонна өрөмүөннээһин ситиһилиннэ. АЛРОСА үбүнэн Саха сиригэр өрөспүүбүлүкэ 18 улууһугар уонна куораттарыгар олорор дьиэлэр, оскуолалар уонна үөрэх тэрилтэлэрэ, успуорт, култуура эбийиэктэрэ, доруобуйаны чөлүгэр түһэрэр кииннэр уонна балыыһалар дьэндэйдилэр.
Саха сиригэр АЛРОСА Үүнэр көлүөнэ пуондатын нөҥүө социальнай бырайыактары үбүлээһинин сыллааҕы кээмэйэ 800-900 мөлүйүөҥҥэ тэҥнэһэр. Бу араас источниктан пуондаҕа ыытыллар үп 90-тан тахса бырыһыанын ылар. 2011-2020 сылларга АЛРОСА эрэгийиэннээҕи социальнай соруктары быһаарыыга Үүнэр көлүөнэ пуондатын нөҥүө 7 миллиард 175 мөлүйүөн солкуобайы ыытта.
СӨ Үүнэр көлүөнэ тус сыаллаах пуондатын уонна АЛРОСА пресс-сулууспалара «Саха сирэ», edersaas.ru саайтка анаан.
Ирина КУСТОВА, Анастасия ФЕДОРОВА хаартыскалара