Нам улууһун Нам сэлиэнньэтигэр эһиил Култуура уонна духуобунай сайдыы дыбарыаһа аанын арыйыаҕа.
Эбийиэги Максим Аммосов төрөөбүтэ 125 сылын уонна Саха АССР 100 сылын чиэһигэр АЛРОСА хампаанньа үбүн суотугар Үүнэр көлүөнэ пуондата тутар.
Үс мэндиэмэннээх, 5 тыһыынчаттан тахса кв.м. иэннээх дьиэ — оройуоҥҥа дэҥҥэ көстөр тутуу. 2020 сыл муус устарыгар агент – «РДР Групп» ХЭУо уонна СӨ Үүнэр көлүөнэ тус сыаллаах пуондатын икки ардыгар уопсайа 422 мөлүйүөн солкуобай суумаҕа агентскай дуогабар түһэрсиллибитэ.
edersaas.ru
«Билигин эбийиэк быһа барыллаан 45% бэлэм. Тас эркини, ис быыстары ууруу үлэтэ ыытылла турар. Салгын ыраастыыры оҥорорго дуогабар түһэрсилиннэ, ону сэргэ эһиил матырыйааллары сакаастыырга үлэ барар. 2021 сылга оҥоһуллар үлэ кээмэйигэр матырыйаал барыта – бетон блоктар, муоста матырыйааллара атыылаһылыннылар, тимир конструкциялар оҥоһуллаллар. Эһиил ис уонна тас өттүн тупсарыы, сылааһы киллэрии, канализация, уу ситимин тардыы, салгыны ыраастыыры олордуу олунньуттан саҕаланыахтара», — диэн бэдэрээттэһэр тэрилтэ бэрэстэбиитэлэ – «РФА-Инвест» ИФК АУо генеральнай дириэктэрэ Семен Софронов иһитиннэрдэ.
Эбийиэк уопсай иэнэ — 5692 кв. м., манна 400 миэстэлээх көрөөччүлэр саалалара, кыраайы үөрэтэр мусуой, ЗАГС отдела, хартыына галереята уонна бибилэтиэкэ баар буолуохтара. Култуура уонна духуобунай сайдыы дыбарыаһа 2022 сыл ахсынньытыгар үлэҕэ киллэриллэрэ былааннанар.
«Нам улууһун нэһилиэнньэтин кытары көрсүһүүгэ оройуоҥҥа култуура суолталаах саҥа эбийиэк наадатын туһунан өрөспүүбүлүкэ Ил Дарханыгар этии киллэрбиттэрэ. Ил Дархан сорудаҕынан эбийиэк Үүнэр көлүөнэ тус сыаллаах пуондатын бырагырааматыгар киллэриллибитэ. Эбийиэк 2020 сылтан тутуллар, 2022 сылга, оруобуна Максим Аммосов үбүлүөйүгэр туттарар былааннаахпыт.
Үбүлээһин АЛРОСА үбүттэн толору көрүлүннэ. Эбийиэк үксэ бэлэм, эһиилгигэ тупсарыы үлэлэрэ хаалаллар. Биһиги эбийиэк кэмигэр үлэҕэ киириэҕэр эрэллээхпит. Саҥа тутуу архитектурата уустук оҥоһуулаах, банкеттыыр саалата ураһа быһыылаах, бырайыак дизайн-бырайыагын быһыытынан национальнай стиллээх буолуоҕа», – диэн СӨ Үүнэр көлүөнэ тус сыаллаах пуондатын «Көмөлөһүү» бырагыраама управлениетын начаалынньыгын солбуйааччы Алексей Ефремов эттэ.
Саҥа эбийиэк 1956 сылтан Нам сэлиэнньэтигэр үлэлиир Норуот айымньытын эргэ дьиэтин, бибилэтиэкэни уонна мусуойу солбуйуоҕа. Норуот айымньытын дьиэтин салайааччыта Николай Жирков этэринэн, Нам сэлиэнньэтин нэһилиэнньэтэ элбии турар уонна кэнсиэртэри, араас туруоруулары көрүөн баҕалаах дьону барыларын биир кыра саалаҕа батарар ыарахан этэ, муҥутаан сүүскэ тиийбэт киһи эрэ киирэрэ. Оттон Култуура уонна духуобунай сайдыы дыбарыаһа аһылыннаҕына, 400-чэ киһи батар кыахтаныа.
«Дьиэбит олус эргэ, 1956 сыллаахха тутуллубута, үлэлииргэ кыараҕас. Биһиги дьэ, кэмниэ кэнэҕэс саҥа дыбарыас тутулларыттан олус үөрэбит. АЛРОСА биһигини өйөөбүтүгэр, эбийиэги үбүлээбитигэр махтаныахпытын баҕарабыт. Өр сылларга ыра санаа оҥостубут баҕабыт эһиил туолуоҕа», – диэн Жирков астына бэлиэтээтэ.
Нам улууһун баһылыга Юрий Слепцов эппитинэн, АЛРОСА үбүнэн кыттыытынан Култуура уонна духуобунай сайдыы дыбарыаһын тутуу Нам улууһун олохтоохторун өр сыллаах баҕа санааларын туолуутунан буолар. «Култуура саҥа дыбарыаһа национальнай култуура улахан комплексын киининэн буолуоҕа. Манна кэккэлэһэ саха уһулуччулаах бэйиэтэ Илья Винокуров-Чаҕылҕан мусуойа, саха национальнай архитектурата стиллээх дьиэлэр, Максим Аммосов аатынан болуоссат баар буолуохтара», – диэн Юрий Слепцов кэпсээтэ.
Билигин СӨ Үүнэр көлүөнэ тус сыаллаах пуондата АЛРОСА үбүнэн социальнай суолталаах 4 эбийиэги Нам, Уус Алдан, Үөһээ Халыма улуустарыгар уонна Дьокуускайга тутар.
«Биһиги АЛРОСА үбүлээн, билигин Уус Алдан улууһун Бороҕон сэлиэнньэтигэр Култуура киинин тутабыт. Култуура уонна духуобунай сайдыы дыбарыаһын Нам улууһун Нам сэлиэнньэтигэр тута сылдьабыт. Үөһээ Халыма улууһун Зырянкатыгар култуура-успуорт комплекса дьэндэйэр. Оттон Дьокуускайга Үүнэр көлүөнэ пааркатын тутууну саҕалаатыбыт. Бу — АЛРОСА салаатынан ыытыллар бөдөҥ эбийиэктэртэн биирдэстэрэ», – диэн СӨ Үүнэр көлүөнэ тус сыаллаах пуондатын бэрэстэбиитэлэ Алексей Ефремов иһитиннэрдэ.
Зырянка бөһүөлэгэр 2 475, 03 кв.м. уопсай иэннээх, 2 мэндиэмэннээх култуура-успуорт комплекса тутулла турар. Комплекс 3 блоктаах: успуорт, кулууп уонна ситимниир блок. Онно успуорт саалата, 218 миэстэлээх түрүбүүнэ, снаряднай, душтаах уонна санузеллаах таҥнар сир, тренажер-физкултуура саалата бааллар. Оттон кулууп блога 212 миэстэлээх көрөр саалалаах, эстрада, артыыстар, көстүүмнэргэ хостордоох, холлардаах, үлэһиттэр үлэлиир хостордоох.
Бороҕон сэлиэнньэтигэр Василий Никифоров-Күлүмнүүр аатынан Култуура киинин тутуу бүтэһик түһүмэҕэр тиийдэ. Үс мэндиэмэннээх, 3 880 кв.м. уопсай иэннээх дьиэҕэ бибилэтиэкэ, оҕолорго уонна улахан дьоҥҥо электроннай саалалар, киинэ хранилищета, 320 миэстэлээх актовай саала, буфет үлэлиэхтэрэ. Эбийиэк 2022 сылга, Саха сирин норуоттарын спортивнай оонньууларын иннинэ бүтэрэ былааннанар.
Пуонда быйыл өрөспүүбүлүкэ страгетическай эбийиэгин — Үүнэр көлүөнэ пааркатын олоххо киллэриини саҕалаата. Куорат олохтоохторо куорат киинигэр сылы быһа сынньанар улахан эбийиэктэрин үлэҕэ 2025 сылга киллэрии сабаҕаланар. Манна оҕолор бырайыактыыр үлэ, сыыппара технологияларын, урбаан уонна soft skills үөрүйэхтэрин билиэхтэрэ. Паарка киһи сайдар оскуолатынан буолуоҕа, үөрэх кластердарыгар араас дьаһаллар уонна дьарыктар тэриллиэхтэрэ.
СӨ Үүнэр көлүөнэ тус сыаллаах пуондатын кытта бииргэ үлэлээһин – АЛРОСА аһымал үлэтигэр биир саамай киэҥ хабааннаах хайысха. АЛРОСА 2011 сылтан пуонда социальнай соруктары быһаарарыгар 7,176 миллиард солкуобайы биэрдэ. 2012-2020 сылларга АЛРОСА үбүн суотугар 39 эбийиэк, ол иһигэр үөрэх – 8, успуорт – 10, култуура уонна сайдыы 10 эбийиэгэ, 4 балыыһа, 4 доруобуйаны чөлүгэр түһэрэр киин, 3 олорор дьиэ үбүлэннэ.
«Саха сирэ», edersaas.ru сайтка анаан АЛРОСА пресс-сулууспатын суруйуутуттан тылбаас.
АЛРОСА пресс-сулууспатын хаартыскалара