АЛРОСА социальнай инвестициялары улаатыннарар уонна үлэ миэстэлэрин таһаарар

Саха сирин баһылыга Айсен Николаев уонна АЛРОСА генеральнай дириэктэрэ Сергей Иванов, үгэс курдук, сыл бүтүүтэ хампаанньа 2021 сыллааҕы үп-хаһаайыстыбаннай үлэтин түмүктэрин уонна 2022 сылга былааннарын көрдүлэр.

Сергей Иванов ааһан эрэр 2021 сылы «олус сити­һиилээҕинэн» ааттаата. АЛРОСА быйыл муҥутуур атыылааһыны ситистэ, дивиденд төлөбүрдэрин икки бүк үрдэттэ, нолуок төлөбүрдэрин улаатыннарда. Сыл түмүгүнэн хампаанньа ал­­маас-бриллиант бородууксуйатын муҥутуур кээмэйин — 46 мөлү­йүөн кэриэтэ караты атыылыыр былааннаах.
Ааһан эрэр сыл АЛРОСА хампаанньаҕа уонна акционердарыгар кэнники аҕыс сылга үчүгэй сылынан буолла. Ити туһунан өрөспүүбүлүкэ баһылыга Айсен Николаев хампаанньа 2021 сылга үп-хаһаайыстыбаннай үлэтин барыллаан түмүктэрин уонна 2022 сыл былааннарын көрүү кэмигэр эттэ.
«Быйыл Саха сирэ өрөспүүбүлүкэ түмүллүбүт бүддьүөтүгэр муҥутуур дивиденнэри — 50 миллиард кэриҥи ылла. Итинтэн аахсыйа­лаах, өрөспүүбүлүкэ аҕыс оро­йуонун бүддьүөтүгэр 11 мил­­лиард кэриҥэ үп киирдэ, бу хам­­паанньа устуоруйатыгар муҥутуур көрдөрүүнэн буолар уонна 2020 сыл дивидеҥҥэ төлөбүрдэрин кээмэйин икки төгүл аһарар. Быйылгы сыл дивиденнэрэ 2009-2016 сылларга диэри, 8 сыл устатыгар төлөммүт дивиденнэр уопсай кээмэйдэрин аһардылар», — диэн эрэгийиэн баһылыга бэлиэтээтэ.
Хампаанньа генеральнай дириэктэрэ Сергей Иванов иһитиннэрбитинэн, хампаанньа номнуо сыл саҥатыгар хос­тооһун кээмэйин улаатыннарарга ылсыбыта. Сыл бүтүүтэ быһа хо­­лоон 32,5 мөлүйүөн карат ал­­маас, 2020 сыл көрдөрүүтүттэн 8% элбэх хостонуоҕа. Быйыл хампаанньа аахсыйалаах хас биирдии оро­йуонун бүддьүөтүгэр 1,3-тэн тахса миллиард солкуобай киирдэ.
2021 сылга хампаанньа социальнай ороскуоттара — 6,5 миллиард солкуобай, ааспыт сылтан 10% бырыһыанынан элбэх. Эһиил өссө элбэтии – 7,4 миллиард солкуобайга тириэрдии былааннанар.
Быйыл АЛРОСА уонна Саха сирэ 5 сылга социальнай-экэнэмиичэскэй бииргэ үлэлээһин туһунан саҥа дуогабар түһэ­ристилэр. «Бу кэмҥэ АЛРОСА үөрэхтээһин, доруобуйа харыстабылын, социальнай хааччыйыы, култуура, успуорт, наука сайдарыгар, тулалыыр эйгэ харыстабылыгар уонна сири-уоту тупсарарга миллиард курдук солкуобайы ыытыаҕа. Быйыл бу сыалга-сорукка 700 мөлүйүөн, в 2022 году – 800 мөлүйүөн солкуобай бэриллиэ», — диэн генеральнай дириэктэри солбуйааччы Алексей Дьячковскай иһитиннэрдэ.
«Быйыл кэккэ үлэлэр тохтобул кэнниттэн саҕаламмыттарын кытта сибээстээх уустуктар баалларын да үрдүнэн, бу сыл хампаанньаҕа биир муҥутуур көрдөрүүлээх сылынан буолла, өрөспүүбүлүкэ уонна ал­­маастаах оройуоннар бүддьүөттэригэр киирбит нолуоктар ­улааталларыгар дьайда диэн билигин эрэллээхтик ­этиэххэ сөп», – диэн Сергей Иванов пресс-көрсүһүү кэмигэр эттэ. – Биһиги инвестициялаах бырагыраамаҕа көрүүлэри дьүүл­лэстибит, ол биллэрдик – уонунан бырыһыанынан улаатар. Бу — алмааһы хостуур эбийиэктэри уонна социальнай инфраструктураны тутуу».
АЛРОСА генеральнай дириэктэрэ ону сэргэ быйыл чуолаан Саха Өрөспүүбүлүкэтигэр 1800 үлэ миэстэтэ тэриллибитин бэ­­лиэтээтэ. Салгыы уустук 2020 сылга тахсыбыт сарбыйыылары толу­йарга былааннаналлар.
Айсен Николаев хампаанньа быйыл социальнай инвестицияны ордук Мииринэй улууһугар олус дьоһуннаахтык улаатыннарбытын бэлиэтээтэ. Ону кини Саха сиригэр эрэ буолбакка, уопсайынан Арассыыйаҕа урут буолбатах түгэнинэн ааттаата. «Биһиги алмааһы хостуур уонна өрөспүүбүлүкэ үтүө туругун оҥорсор дьон диэки ха­­йыһыахтаахпыт. АЛРОСА-тан өрөспүүбүлүкэ түмүллүбүт бүддьүөтүгэр киирэр үп 2022 сылга уопсай кээмэй үс гыммыт биириттэн ордуоҕа», — диэн өрөспүүбүлүкэ баһылыга эттэ уонна Мииринэй оройуонун доруобуйа харыстабылын, үөрэхтээһинин үлэһиттэрэ билигин уоппускаҕа хампаанньа төлөбүрүн суотугар көтүөхтэрин, оттон үөрэнээччилэр бары оскуолаларга итии аһылыгынан хааччыллыахтарын сөбүн холобурдаата.
«Хампаанньа 2021 сылга Мииринэй уонна Ленскэй оройуоннарын социальнай сайдыыларыгар үчүгэйдик дьайда. Оройуон, хампаанньа уонна СӨ бырабыыталыстыбатын икки ардыларыгар сыһыан саҥа үрдүк таһымҥа көстө уонна бүгүҥҥү күн атын соруктарын быһаарарга көмөлөһөр. Хампаанньа Мииринэй оройуонун бүддьүөтүн эйгэтин үлэһиттэригэр хаһан да ылыллыбатах өйөбүл дьаһаллары ылла. Итини Мииринэй оройуонун саҥа салалтатыгар эмиэ улахан көмө уонна өйөбүл буолар диибин. Хампаанньа уонна Мииринэй оройуонун салалтатын холбоһуктаах күүстэринэн, өрөспүүбүлүкэ бырабыыталыстыбатын өйөбүлүнэн доруобуйа харыстабылын систиэмэтэ сайдарыгар, саахалланар кутталлаах дьиэлэртэн көһөрүүгэ, уулуссалары уонна уулусса-суол ситимин тутууга, куорат тупсаҕай эйгэтин оҥорорго дьоһун суолталаах соруктар быһаарыллыахтарыгар эрэнэбин. Бу барытын түмүгэр биһиги өрөспүүбүлүкэбит экэнэмиичэскэй туругун уһансар дьон олоҕун хаачыстыбата тупсуоҕа», — диэн Айсен Николаев бэлиэтээн эттэ.
Сергей Иванов ону таһынан, АЛРОСА эһиилги сылга туруктаах сайдыытын бэлиэтээтэ. Кини хампаанньа бүддьүөтэ үрдэтиллибит хайысхалаах — 34-35 мөлүйүөн карат оҥоһуллубутун туһунан эттэ.
Мунньахха экология балаһыанньата эмиэ таарылынна. Сергей Иванов эппитинэн, айылҕа харыстабылын үлэтигэр АЛРОСА ороскуотун эһиил эмиэ улаатыннарыы былааннанар — 7 миллиартан тахса солкуобай буолуоҕа.
Ону таһынан, хампаанньа экология уонна килиимэт стратегиятын аан бастаан ылынарга былаанныыр. «Ону оҥорорго аан дойдутааҕы сүрүн хампаанньа тардылынна, тоҕо диэтэххэ, биһиги бу үлэни АЛРОСА-ҕа эрэ буолбакка, өрөспүүбүлүкэҕэ эмиэ дьоһун суолталааҕынан ааҕабыт. Ити хампаанньа үлэлиир зонатыгар экологияҕа куттал суоһуурун аҕыйатарга, «углерод суолун» кыччатарга уонна инникитин туруктаах сайдыыга хайысхаламмыт, барытын хабар докумуоннар буолуохтара», – диэтэ Сергей Иванов.

24 алмааска Саха сирин олохтоохторун — Социалистическай Үлэ дьоруойдарын аата иҥэрилиннэ

АЛРОСА генеральнай дириэктэрэ Сергей Иванов ахсынньы 21 күнүгэр Саха сирин баһылыга Айсен Николаевка Саха сирин олохтоохторун — Социалистическай Үлэ Дьоруойдарын ааттарынан ааттаммыт 24 ювелирнай алмаас сэртипикээтин уонна репликаларын (куоппуйаларын) туттарда.
«АЛРОСА хампаанньа Саха Өрөспүүбүлүкэтин сиригэр-уотугар хос­­тообут 100 бөдөҥ алмааһыгар Саха сирин 100 уһулуччулаах киһитин аатын биэрэрин туһунан этиини биһиги бэтэрээннэрбит киллэрбиттэрэ. Былырыын, Аҕа дойду Улуу сэриитин Кыайыы 75 сылын чэрчитинэн Сэбиэскэй Сойуус Дьоруойдарын аатын ылбыт дьон аата 100 бөдөҥ ал­­мааска үйэтитиллибитэ. Оттон быйыл алмаастарга Саха сирин дьонун — Социалистическай Үлэ Дьоруойдарын ааттара иҥэрилиннилэр. Маннык кэрэхсэбиллээх бырайыак көмөтүнэн өрөспүүбүлүкэ төрүттэммитэ 100 сылыгар АЛРОСА хампаанньа хос­­тообут ал­­маастарыгар Саха сирин 100 уһулуччулаах киһитин аата үйэтитил­лиэҕэр эрэнэбин», — диэтэ Айсен Николаев.
Онтон АЛРОСА генеральнай ди­­риэктэрэ Сергей Иванов бырайыак чэрчитинэн быйыл 100 бөдөҥ алмааска тыа хаһаайыстыбатын, бырамыысыланнас, наука, култуура эйгэтигэр уонна атын салааларга улахан ситиһиилэммит дьоҥҥо иҥэриллибитин туһунан эттэ.
«Биһиги өрөспүүбүлүкэни кытары «САССР 100 сылыгар 100 анал алмаас» холбоһуктаах бырайыакпыт көмөтүнэн хорсун быһыылара уонна олоҕу көрүүлэрэ үүнэр көлүөнэҕэ холобур буолар уһулуччулаах дьоммут ааттарын үйэтитиэхпитин сөп», – диэтэ Сергей Иванов.

Санатан эттэххэ, «САССР 100 сылыгар 100 анал алмаас» 2019 сылтан, «Интернациональнай» рудникка хостоммут биир бөдөҥ алмааска саха норуотуттан бастакы драматург, саха литературатын төрүттээччи Анемподист Софронов-Алампа аатын иҥэрииттэн саҕаламмыта.
Саха Өрөспүүбүлүкэтигэр Патриотизм сылыгар, Аҕа дойду Улуу сэриитигэр Кыайыы 75 сылыгар эрэгийиэн баһылыга Айсен Николаев көҕүлээһининэн алмаастарга Саха сирин дьонун – Сэбиэскэй Сойуус Дьоруойдарын аатын иҥэрэр туһунан быһаарыы ылыллыбыта. Бу 50 караттан үөһээ ыйааһыннаах алмаастарга Саха сириттэн Аҕа дойду сэриитин фронугар ыҥырыллыбыт Сэбиэскэй Сойуус Дьоруойдарын аатын иҥэрэргэ көмөлөспүтэ. Кинилэр ортолоругар Сергей Александрович Асямов, Семен Васильевич Достовалов, Клавдий Карпович Краснояров, Федор Кузьмич Попов, Георгий Иванович Шавкунов, Владимир Денисович Лонгинов уонна да атыттар бааллар.
Быйыл алмаастарга Саха сирин дьонун – Социалистическай Үлэ Дьоруойдарын аатын иҥэрии үһүс түһүмэҕэ саҕаламмыта.
Кинилэр ортолоругар Саха АССР Үөһээ Бүлүү оройуонун Молотов аатынан холкуос бэрэссэдээтэлэ, ССРС Үрдүкү Сэбиэтин үһүс ыҥырыылаах дьокутаата Степан Иннокентьевич Васильев, САССР сибээһин производственнай-тиэхиньиичэскэй управлениетын начаалынньыга Пётр Иванович Дудкин, табаһыт, «Томпо» сопхуос дириэктэрэ Василий Михайлович Кладкин, Мэҥэ Хаҥалас оройуонун Ленин аатынан холкуос агронома, оҕуруот үүннэрээччи Екатерина Иннокентьевна Новгородова уо.д.а. дьоруойдар бааллар. Ол курдук, үлэҕэ килбиэн ситиһиилээх дьоруойдар албан ааттара АЛРОСА хостообут анал алмаастарыгар үйэтитиллиэхтэрэ.
Алмаастар сэртипикээттэрэ уонна репликалара (куоппуйалара) өрөспүүбүлүкэ оройуоннарын мусуойдарыгар эспэнээт быһыытынан бэриллиэхтэрэ.

Сергей Домброван: «Олохтоох каадырдары — бырамыысыланнаска» бырайыак каадыр тиийбэт боппуруоһун быһаарарга көмөлөһөр

Саха сирин Ил Дархана бэйэтин Анал этиитигэр каадыр тиэмэтигэр элбэхтик тохтоото. Өрөспүүбүлүкэҕэ «Олохтоох каадырдары – бырамыысыланнаска» бырайыак номнуо хаһыс да сылын олоххо киллэриллэр. Бу кэм устата Саха сирин 10 тыһыынчаттан тахса олохтооҕо бырамыысыланнас тэрилтэлэригэр үлэҕэ киирдэ. АЛРОСА АХ Айхаллааҕы ХБК-тин управлениетын уопсай боппу­руостарга дириэктэри солбуйааччы Сергей Домброван саныырынан, бырайыак, биллэн турар, өрөспүүбүлүкэ бырамыысыланнаһын тэрилтэлэригэр каадыр тиийбэт боппуруоһун быһаарарга көмөлөһөр.
— Айсен Сергеевич бырамыысыланнаска олохтоох каадырдарыгар ылар туһунан боппуруоһу хаста да көтөхпүтэ. Бу тиэмэ быйылгы уонна ааспыт сыллааҕы Анал этиигэ эмиэ иһиллибитэ. АЛРОСА хампаанньа бэрэстэбиитэлин быһыытынан бэлиэтээн эттэхпинэ, биһиги бу боппуруоска өрөспүүбүлүкэ салалтатын уонна бырабыыталыстыбатын кытары ыкса ситимнээхтик үлэлиибит. Холобур, кэнники үс сылга Айхаллааҕы ХБК-кэ олохтоох нэһилиэнньэттэн 377 киһи үлэлиирэ бу кэпсэтиилэр түмүктэринэн буолар. Ити – хампаанньаҕа суолталаах сыыппара, каадыр тиийбэт кыһалҕата сабыллар. Онуоха эбии биллэр социальнай суолталаах, тоҕо диэтэххэ, олох­тоох каадырдары үлэҕэ тардан, биһиги Саха сирин олохтоохторо туруктаах олохтоох буолууларын ситиһэбит, — диэн Домброван быһаарда.

ЫСПЫРААПКА:

2018 сыл тохсунньу 30 күнүгэр СӨ Дьарыктаах буолууга судаарыстыбаннай кэмитиэтин уонна АЛРОСА икки ардыларыгар 2018-2022 сылларга «Олохтоох каадырдары – бырамыысыланнаска» дьоһун суолталаах бырайыагы олоххо киллэрэргэ хардарыта бииргэ үлэлиир туһунан сөбүлэһии түһэрсиллибитэ (2018-2022 сылларга 1400 олохтоох киһини үлэҕэ ылар, отут сааһыгар диэри — 320 киһини, олохтоох нэһилиэнньэ 320 киһитин ылар былааннаах көрдөрүүлээх).
Хампаанньа 2018 сылга — Саха сирин 950, 2019 сылга 1 392 олохтооҕор үлэ биэрдэ. 2020 сыл түмүгүнэн хампаанньа Саха сирин 1 587 киһитигэр үлэ миэстэтин таһаарда. 2021 сыл 9 ыйыгар АЛРОСА Саха Өрөспүүбүлүкэтин сирин-уотун 2 321 олохтоох киһитигэр үлэ булла.

«Саха сирэ», edersaas.ru сайтка анаан Алексей РУДЫХ суруйуутуттан тылбаас.

АЛРОСА пресс-сулууспатын хаартыскалара