АЛРОСА социальнай эйгэ сайдыытыгар, ол иһигэр, Саха сиригэр үүнэр көлүөнэҕэ инфраструктура сайдарыгар, улахан болҕомтотун уурар. Үгэс курдук хампаанньа бүддьүөккэ төлөнөр нолуоктары уонна дивиденнэри таһынан, Саха сиригэр социальнай бырайыактарга уоннуу миллиард солкуобайы утары уунар.
Быйылгы үбүлүөйдээх сылга өрөспүүбүлүкэҕэ оҕолорго анаан элбэх үлэ оҥоһулунна. Холобур, Сунтаар улууһун Кириэстээх нэһилиэгэр бу күннэргэ 120 миэстэлээх оскуола үөрүүлээх быһыыга-майгыга аһылынна. Оскуола саҥа дьиэтэ АЛРОСА дивиденин суотугар Сунтаар улууһун олохтоох бүддьүөтүн үбүнэн тутулунна.
«Оскуола эбэтэр уһуйаан саҥа дьиэтин арыйыы мэлдьи үөрүүлээх сонун, онтон сэлиэнньэҕэ эбийиэги тутуу олохтоохторго дьиҥнээх бырааһынньык. Биһиги хампаанньабыт баар инфраструктураны сайыннарар эрэ буолбакка, Саха сиригэр оҕолор дьоһуннаах үөрэҕи ылалларыгар көмөлөһөр бырайыактарга кыттара олус суолталаах», – диэн оскуола аһылларыгар кыттыбыт Алексей Дьячковский бэлиэтээн эттэ.
Бу сотору, Саха Өрөспүүбүлүкэтин Судаарыстыбаннаһын күнүгэр Ньурба куоракка 360 үөрэнэр миэстэлээх саҥа оскуола тутуутун саҕалыахтара. Эбийиэк АЛРОСА уонна Ньурба улууһун икки ардыларыгар түһэрсиллибит сөбүлэһиини олоххо киллэрии чэрчитинэн тутуллуоҕа. Үгүс ахсааннаах бырайыак Үүнэр көлүөнэ тус сыаллаах пуондатын уонна АЛРОСА бииргэ үлэлээһиннэрин чэрчитинэн олоххо киллэриллэр. Пуонда үбүнэн өйөбүлэ – АЛРОСА бөдөҥ социальнай бырайыактарыттан биирдэстэрэ. 2021-2022 сылларга АЛРОСА үбүнэн Саха сирин оройуоннарыгар оҕолор сайдалларыгар уонна үөрэнэллэригэр 40-тан тахса социальнай эбийиэк тутулунна. Холобур, Хаандыга бөһүөлэгэр баар Оҕо эстетическэй киинигэр билигин 169 оҕо эбии үөрэҕи ылар. Аммаҕа А.А.Черемных аатынан оҕо ускуустубатын оскуолатыгар 326 оҕо үөрэнэр, онтон Чурапчыга Д.П.Коркин аатынан өрөспүүбүлүкэтээҕи спортивнай орто уопсай үөрэхтээһин оскуолата Саха сирин 28 оройуонуттан 428 эдэр спортсмены иитэр. Абый уонна Элгээйи 365 оҕото үөрэх аныгы стандартарын бары ирдэбиллэригэр эппиэттиир саҥа оскуолаларга хаачыстыбалаах үөрэҕи ылар. Ол курдук, АЛРОСА үбүнэн тутуллубут Култуура дыбарыастарыгар, оскуолаларга, успуорт комплекстарыгар Саха сирин хас да тыһыынча оҕото муусуканан, ырыанан, успуордунан дьарыктанар уонна саҥа билиини ылар.
Былырыын АЛРОСА уонна Үүнэр көлүөнэ тус сыаллаах пуондата өссө биир сүҥкэн бырайыагы олоххо киллэриини – Дьокуускай куоракка Үүнэр көлүөнэ пааркатын тутууну саҕалаабыттара. Паарка оҕолор сылы быһа аһаҕас халлааҥҥа уонна дьиэҕэ туһалаахтык дьарыктаналларыгар уонна сынньаналларыгар уопсастыбаннай эйгэнэн буолуоҕа.Аһаҕас уонна сабыылаах эйгэҕэ быыстапкалар, коворкиннар, эбии үөрэхтээһин оскуолалара, стартаптарга босхо былаһааккалар, күүлэйдииргэ уонна успуордунан дьарыктанарга аралдьытар уонна рекреационнай зоналар баар буолуохтара.
«Манна Ыччат киинэ баар буолуоҕа, онно оҕолору XXI үйэҕэ наадалаах бырайыактааһын, урбаан үөрүйэхтэригэр, сыыппаралаах технологияларга үөрэтиэхтэрэ. Паарка биирдиилээн киһи сайдар оскуолатынан буолуоҕа, үөрэх кластердарыгар араас тэрээһин-быраап көрүҥнэрин тэрийии дьаһалларын уонна дьарыктарын ыытар кыахтаныахтара. Ол иһигэр, креативнай индустрия араас хайысхаларыгар – медиаттан, дизайнтан саҕалаан аһылык индустриятыгар тиийэ. Бу барыта IT-технологиялардаах», – диэн СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров санаатын үллэһиннэ.
Билигин пуонда тутуллуохтаах үөрэх эйгэтин ис чааһын актыыбынайдык бэлэмниир.
Паарка сорох бырагыраамалара үлэлээн, хайыы үйэ ситиһиилэннилэр. Билигин күнүскү уонна онлайн-көрүҥнэргэ 150 оҕоҕо дьарык ыытыллар. Үлэҕэ үрдүк таһымнаах исписэлиистэр: оҕолору кытары үгүс сыл үлэлээбит уопуттаах тириэньэрдэр, педагогтар уонна психологтар сыстан үлэлииллэр.
«Proskills Yakutia» үөрэх оскуолатын «Proдвижение бренда» бырагыраамата
Бырагыраама аныгы медиа-индустрия төрүттэрин биэрэр: маркетинг, хаартыска, видео, SMM, дизайн, анимация, араатардыыр ускуустуба. Үөрэҕи медиа-ускуустуба уонна медиа-индустрия эйгэтигэр хаартыскаҕа түһэрээччилэр, видео-оператордар уонна исписэлиистэр уопсастыбалара» ЯРОО-ну кытары бииргэ тэрийэллэр. Былырыын 40-тан тахса үөрэнээччи бырагыраама түмүк чааһыгар Саха сирин биллэр бреннэрэ KYN, «Якутия» ФАПК, «Чороон 21-й век» уонна «Триумф» СК үрдэтэргэ кейстэри билиһиннэрбиттэрэ.
«Биһиги иитиллээччилэрбит медиа эйгэтигэр дьиҥнээх быраактыка үөрүйэхтэрин уонна дьоҕурдарын ылбыттара. Мин оҕолор бэйэлэрин илиилэринэн айан бородуукта оҥорон таһааралларыгар хаартыска уонна видео-контеннары оҥоруу төрүттэрин баһылыылларыгар бары күүспүн уурбутум. «Proskills Yakutia» оскуола бастакы кууруһа маннык ыгым болдьоххо ситиһиилээхтик ааста дии саныыбын, салгыы сайдарга былааннар бааллар», – диэн Саха сирин хаартыскаҕа түһэрээччилэрин уонна видео-оператордарын идэлээх уопсастыбатын бэрэссэдээтэлэ Алексей Павлов бастакы түмүктэри таһаарда.
Үүнэр көлүөнэ пааркатын «Мини-шеф» кулинарнай куурустара
Паарка кулинарияҕа хайысхатыгар үөрэх саҥа бырагырааматын СӨ Үүнэр көлүөнэ тус сыаллаах пуондата «FoodLife» кулинария устуудьуйатын кытары үлэлэттилэр. Үөрэнээччилэр биллэр-көстөр шеф-асчыттар салалталарынан ас бэлэмнииргэ үөрэннилэр.
Шеф-асчыт Уйгулан Мандаров бу оҕолору кытары үлэлиир бастакы үөрүйэҕэ.
«Биһиги куурустарбыт олус бэһиэлэйдик уонна элбэх оҕо кыттыылаах аастылар. Мин аһылыгы астыырга эрэ буолбакка, түөрүйэҕэ үөрэттим. Дьиҥэр, дьиҥнээх кулинар аһылык туһунан барытын билиэхтээх! Сүрүннээн, аһы бэлэмнээһин базатын быһаарарга кыһаллабын. Тоҕо диэтэххэ, эрэсиэбинэн ханнык баҕарар киһи астыан сөп, оттон сүрүнэ -– билиини уонна үөрүйэҕи иҥэрии», -– диэтэ Уйгулан Мандаров.
Куурустар кэмнэригэр 50-ча оҕо бэйэтигэр кулинария ускуустубатын саҥа эйгэтин арыйда. Тэрийээччилэр уонна преподавателлар биһиги оҕолорбутугар аан дойду таһымнаах «мишленовскай шефтэргэ» тиийэ үүнэргэ төрүөттэр баалларыгар эрэллээхтэр.
Үөрэнээччилэргэ «Твой старт» биисинэс-акселератор
Никита Кузьмин уонна Олег Ши-Бао-Хен оҕолору тиэйэр бастайааннай суоппардары көрдүүргэ төрөппүттэргэ көмөлөһөн, саайт арыйарга быһаарыммыттара. «Бу олус суолталаах. Тоҕо диэтэххэ, биһиэхэ тымныы уонна үөрэнээччилэр куоракка сылдьаллара уустук, оттон төрөппүттэр кинилэри илдьэр-таһар бириэмэлэрэ суох буолар уонна такси да сыаната ыарахан. Ол иһин, кинилэр оҕолорун куруук илдьэр-аҕалар уонна кинилэргэ куттал суох буоларын хааччыйар суоппары булбут ордук», – диэн урбаанньыт буолуохтаах эдэр дьон санааларын үллэстэллэр.
Мантан да атын санаалары «Твой старт» обургу оҕолоругар биисинэс-акселератор кэмигэр толкуйдаабыттара. Бу — Үүнэр көлүөнэ Пааркатын чэрчитинэн Саха сирин үөрэнээччилэригэр анаан-минээн тэриллибит, креитивнай үөрүйэҕи уонна урбаанньыт толкуйун сайыннарарга аналлаах босхо бырагыраама. Акселераторы тэрийээччилэр -– Үүнэр көлүөнэ тус сыаллаах пуондата, глобальнай биисинэс оскуолата уонна «detiMBA» тинейджердэригэр аан дойдутааҕы биисинэс-оскуола.
Оҕолор 3 ый устата биисинэс төрүттэрин үөрэттилэр уонна идэлээх эспиэртэри кытары инновацияҕа бэйэлэрин бырайыактарын оҥордулар. Бырагыраама кыттыылаахтарын түмүк бырайыактарын «Венчурная компания «Якутия» АУо, «Корпорация развития Республики Саха (Якутия)» АУо, биллиилээх стартаптар уонна «Edudo» бырайыактар, «Emerging Europe Awards», «Рамблер», «TTM Mobile» уонна «HRM» бэрэстэбиитэллэрэ сыаналаатылар. Көмүскээһин түмүктэринэн бастыҥ бырайыактарга менторскай үлэ тэрилиннэ, оттон сорох оҕолорго бииргэ үлэлэһэргэ этиилэр киирдилэр.
ЫСПЫРААПКА:
Саха сирин Үүнэр көлүөнэ тус сыаллаах пуондатын кытта бииргэ үлэлээһин-– АЛРОСА аһымал үлэтигэр биир саамай киэҥ хабааннаах хайысхата. АЛРОСА 2011 сылтан пуондаҕа социальнай соруктары быһаарарга 8 миллиард кэриҥэ үбү биэрбитэ. 2012-2022 сылларга АЛРОСА үбүн суотугар 40-тан тахса эбийиэк, ол иһигэр, үөрэх — 8, успуорт — 10, култуура уонна сайдыы 10 эбийиэктэрэ 4 балыыһа, 4 доруобуйаны чөлүгэр түһэрэр киин, 3 олорор дьиэ үбүлэннилэр.
АЛРОСА сыл аайы араас хайысхалаах 500-тэн тахса социальнай эбийиэги өйүүр, үбүлээһин кээмэйэ – 10 миллиард кэриҥэ.
Биир итинник бырайыагынан АЛРОСА «Настарыанньа» бэстибээлэ буолар, манна оҕолор күрэхтэһэр эрэ буолбатахтар уонна Арассыыйа спортсменнарын, аан дойду уонна Олимпийскай оонньуулар чөмпүйүөннэрин түмүк көрдөрүүлэригэр, маастар-кылаастарыгар кытталлар. Быйыл үс күн устата үгэс буолбут «Настарыанньа» успуорт бэстибээлин кэмигэр мөлүйүөнүнэн киһи кумира, саахыматчыт Сергей Карякин Саха сирин эдэр саахыматчыттарыгар аһаҕас уруоктары уонна сеанстары биэрдэ. Ону таһынан АЛРОСА — оҕолор успуорка талааннарын арыйарга «Чөмпүйүөн буол!» федеральнай бырайыак кыттыылааҕа. Хампаанньа хаста даҕаны «Азия оҕолоро» успуорт аан дойдутааҕы оонньууларын генеральнай спонсорунан буолбута.
АЛРОСА уонна СӨ Үүнэр көлүөнэ тус сыаллаах пуондатын пресс-кииннэрэ.