«АЛРОСА» Саха сирин балыыһаларыгар түргэн тестэри босхо биэрдэ

Өрөспүүбүлүкэ бүддьүөтүн үс гыммыт биирин нолуок быһыытынан киллэрэр итиэннэ сыл аайы Саха сирин социальнай сайдыытыгар 10 миллиард солкуобайга тиийэ үбү көрөр «АЛРОСА» хампаанньа Саха сиригэр коронавирус инфекцията тарҕамматын туһугар күүскэ көмөлөһөр.

edersaas.ru

Ону сэргэ, Саха сирин Ил Дархана Айсен Николаев көҕүлээһининэн, «АЛРОСА» көмөтүнэн Саха Өрөспүүбүлүкэтэ РФ эрэгийиэннэрин ортолоругар биир бастакынан  коронавирус инфекциятын быһаарар саҥа түргэн тестэри ылла.

«АЛРОСА» аахсыйалаах хампаанньа муус устар 10 күнүгэр Дьокуускай уонна Мииринэй куораттар лабораторияларыгар «Изотерм SARS- CoV-2 РНК-скрин» Covid-19 быһаарар сэттэ тыһыынча кэриҥэ тиэһи көмө быһыытынан босхо биэрбитэ.

Бу тестэр туһаларын туһунан маннык кэпсээтилэр:

Ольга Викторовна ТАТАРИНОВА, Өрөспүүбүлүкэтээҕи килиниичэскэй балыыһа кылаабынай бырааһа, мэдиссиинэ наукатын дуоктара:

— “Тиэстэри анаан-минээн, тоҕо чуолаан биһиги балыыһабытыгар биэрдилэр?” диир буоллахха, биһиги лабораториябыт уруккуттан даҕаны олус уустук молекулярнай-генетическэй анаалыстары оҥорорго үөрүйэхтээх. Биһиги лабораториябытыгар  үрдүк квалификациялаах исписэлиистэр үлэлииллэр, кинилэр истэригэр  фармаколог-быраастар, биологтар бааллар.

Бу түргэн тестэр, чуолаан,  ыалдьыбыттары, хантаактаахтары кытары алтыһар, үлэлэһэр мэдиссиинэ үлэһиттэрин, кырдьаҕастары суһаллык бэрэбиэркэлииргэ олус туһалаахтар. Тус бэйэм уонна кэлэктиибим аатыттан өрөспүүбүлүкэбит салалтатыгар уонна «АЛРОСА» АХ маннык эппиэтинэстээх үлэни биһиэхэ эрэнэн сүктэрбиттэригэр махталбытын тириэрдэбит.

Яна Валерьевна ЧЕРТОВСКИХ, үрдүк категориялаах килиниичэскэй фармаколог, СӨ доруобуйатын харыстабылын туйгуна, персонализированнай мэдиссиинэ киинин сэбиэдиссэйэ, мэдиссиинэ салаатыгар П.А.Петров аатынан судаарыстыбаннай бириэмийэ лауреата:
– Муус устар 10 күнүгэр “АЛРОСА” хампаанньаттан коронавирус инфекцията баарын-суоҕун быһаарар түргэн тестэри туттубут. Бу тестэри Дьокуускайга чинчийиини суһаллык ыытарга туһаныахпыт. Саҥа тестэринэн чинчийиилэр Өрөспүүбүлүкэтээҕи 3 №-дээх килиниичэскэй балыыһа персонализированнай мэдиссиинэҕэ киинин лабораториятыгар  оҥоһуллуохтара.
Саҥа тест-систиэмэ уратытынан, боруобаны чинчийии бириэмэтэ быдан кылгаан биэрэрэ буолар (урут түмүктэри ыларга ортотунан 6 чаас ирдэниллэр буолара).

Биһиги Ил Дархаммыт уонна «АЛРОСА» хампаанньа дьаһаллаах миэрэлэри ылбыттарын түмүгэр, нэһилиэнньэҕэ тест оҥоруу ахсаана элбиир уонна түргэтиир кыахтанна. Атыннык эттэххэ,  мэдиссиинэ үлэһиттэригэр, инбэлииттэр дьиэлэригэр, кырдьаҕастарга, үлэлии сылдьар дьоҥҥо уо.д.а. тест тоҕоостоох кэмҥэ оҥоһуллан, ыарыыны уонна коронавирус инфекцията тарҕанарыытын бохсорго, аҕыйатарга үлэ өссө күүһүрэригэр эрэнэбит.

СӨ Доруобуйа харыстабылын министиэристибэтэ:

– Бу Арассыыйа эмчиттэрэ оҥорбут тестэрин саҥа систиэмэтэ анаалыс түмүктэрин түргэнник быһаарарынан уонна атын саҥа тэрили ирдээбэтинэн уратылаах.

Саҥа тестэр, бастатан туран, РФ Доруобуйа харыстабылын министиэристибэтэ уонна Роспотребнадзор регламеннара бигэргэтиитинэн, ыалдьыан сөп эбэтэр ыалдьыбыт дьону кытары хантаактаспыт дьоҥҥо босхо оҥоһуллуохтара.

Өрөспүүбүлүкэ эмчиттэрэ Саха сирин Ил Дархана Айсен Николаевка уонна “АЛРОСА” аахсыйалаах хампаанньаҕа маннык аһымал көмө оҥорон өйөөбүттэригэр улаханнык махтаналлар.

Надежда ЕГОРОВА, «Саха сирэ» хаһыат, edersaas.ru