Быйыл АЛРОСА «Хозактыып-2020” корпоративнай пуорумун чэрчитинэн, Саха сирин олохтоохторо бүддьүөккэ үтүмэн үбү-харчыны киллэрэр промышленнай тэрилтэ үлэтин бары хайысхатыгар сыһыаннаах ыйытыылары хампаанньа салалтатыгар аан бастаан быһа биэрэр кыахтаннылар.
edersaas.ru
Ол курдук, ким баҕалаах ыйытыытын батсаап, социальнай ситимнэр, сайтар, электроннай почта нөҥүө биэрбитэ. Барыта 500-чэ боппуруос киирбитэ. Хампаанньа үлэтигэр олохтооох нэһилиэнньэ өртүттэн улахан интэриэс баара АЛРОСА үлэһитэ бары кэриэтэ Саха сирин олохтоохторо буолалларын кытта ситимнээх. Хампаанньа аахсыйатын 33 бырыһыанын өрөспүүбүлүкэ бас билэр. Биллэрин курдук, АЛРОСА Саха сирин хотугулуу-арҕаа өттүгэр 8 муниципальнай оройуон сиригэр-уотугар (“алмаастаах түөлбэҕэ”) үлэлиир. АЛРОСА – бэйэтин нолуогун өрөспүүбүлүкэҕэ киллэрэр хайаны байытар хампаанньа буолар, чуолаан, кини төлөбүрдэрэ эрэгийиэн нолуокка хомуурдарын аҥаарын ылаллар.
Бүгүн эһиги болҕомтоҕутугар генеральнай дириэктэри солбуйааччы Алексей Дьячковскай интервьютун таһаарабыт. Алексей Прокопьевич Саха сирин олохтоохторуттан киирбит ордук сытыы уонна тирээн турар ыйытыыларга хоруйдаата.
— Алексей Прокопьевич, баһаалыста, биһиги ааҕааччыларбытыгар «Хаһаайыстыбаннай актыып» диэн кэпсэтии көрүҥүн туһунан билиһиннэр эрэ.
— “Хаһаайыстыбаннай актыып» – АЛРОСА хампаанньаларын бөлөхтөрө сыл аайы ыытар корпоративнай пуорумнара. “Хаһаайыстыбаннай актыыпка” үгэс быһыытынан, хампаанньа үлэлиир эрэгэйиэннэриттэн бары кэлэллэр. Дьаһал бастакы чааһыгар хампаанньа генеральнай дириэктэрэ уонна хампаанньа үлэтин базовай эрэгийиэнин – Саха сирин баһылыга ааспыт сыл түмүктэрин кэпсииллэр, кэлэр сыллааҕы былааннары үллэстэллэр уонна дьүүллэһэллэр. Иккис чааһыгар, олохтоммут үгэһинэн, үлэһиттэр ыйытыыларыгар хоруйдууллар. Быраабыла курдук, ыйытыылар хас да ый инниттэн хомуллаллар. Быйыл, аан бастакынан хампаанньа салалтата өрөспүүбүлүкэ нэһилиэнньэтэ эмиэ “Хаһаайыстыбаннай актыыпка” кыттан, ыйытыы биэрэригэр кыаҕы биэрдэ. Хомойуох иһин, аан дойдуга COVID-19 пандемиятынан сибээстээн, “Хаһаайыстыбаннай актыыбы” ыытары тохтоторго күһэлиннибит, ол эрэн, киирбит ыйытыыларга хоруйдаатыбыт. Мин бу интервьюга дьон-сэргэ ордук элбэхтик биэрбит сытыы ыйытыыларыгар хоруйдуурга кыһаллыам.
Үлэһиттэр бары кэриэтэ – Саха сирин олохтоохторо
— Соторутааҕыта өрөспүүбүлүкэ сонуну киэҥник тарҕатар сириэстибэлэригэр былырыын АЛРОСА-ҕа Саха сирин 1400 олохтооҕо үлэҕэ ылыллыбытын туһунан иһитиннэрии тахсыбыта. Тоҕо итиччэ аҕыйаҕый?
— 1 400-чэ киһи – “Олохтоох каадырдары – бырамыысыланнаска” диэн өрөспүүбүлүкэтээҕи бырагыраама чэрчитинэн үлэҕэ ылыллыбыттар ахсааннара, оттон үлэҕэ киирээччилэр уопсай ахсааннара быдан элбэх. Дьиҥинэн, ити да аҕыйаҕа суох. Бастатан туран, Саха сиригэр АЛРОСА үлэһиттэрин уопсай ахсаана 25 тыһыынча курдугун умнар сатаммат. Кинилэртэн 1400 киһи, ол аата үлэһит ахсаанын 5 бырыһыанын кэриҥэ – бу ханнык баҕарар бырамыысыланнас хампаанньатыгар солбуллуу сыллааҕы орто көрдөрүүтэ. Өскөтүн солбуллуу көрдөрүүтэ улахана эбитэ буоллар, хампаанньаттан дьон тоҕо эрэ үгүстүк уурайар эбит диэн өйдөбүл үөскүө этэ. Ол эрэн, оннук буолбатах, АЛРОСА-ҕа үлэлии сылдьан, үлэлэрин мээнэ быраҕан барбаттар. Биһиэхэ үлэлиир усулуобуйа тэриллэр, хамнаһы да ылан көрдөххө, өрөспүүбүлүкэ үрдүнэн үчүгэй хамнастаах тэрилтэлэртэн биирдэстэрэ буоларбыт чуолкай. Ону сэргэ, үгүстэргэ кэлэктиип – биир идэлээхтэрэ эрэ буолбатах, иккис дьиэ кэргэннэрин тэҥэ буолар. Иккиһинэн, сүүмэрдээһин үлэни булуон баҕалаахтар ахсааннарынан буолбакка, тустаах идэлээх исписэлиистэргэ наадыйыыттан тутулуктааҕын умнумаҥ. Бакаансыйаттан ордук киһини үлэҕэ ылар кыаллыбат. АЛРОСА-ҕа үлэҕэ киирэргэ улуустарынан квоталар тоҕо олохтоммотторуй” диэн ыйытыы нэһилиэнньэттэн сотору-сотору киирэрин көрдүм. Хардата – үөһээ этиллибит төрүөттэр. Бачча бакаансыйа баар буолуо диэн бигэ мэктиэ суох, эбиитин квоталар наадалаах исписэлиистэр ахсааннарын чопчу хааччыйыахтара диэн этэр эмиэ кыаллыбат.
— Олохтоох нэһилиэнньэ үксүгэр атын эрэгийиэннэртэн баахтанан үлэлии кэлэр дьону аҕалары сөбүлээбэт. Кинилэр оннуларыгар үлэҕэ өрөспүүбүлүкэ олохтоохторун ылар тоҕо кыаллыбатый?
— Итинник ыйытыы дьон билбэтиттэн үөскүүр. Дьиҥэр, Саха сиригэр хампаанньа үлэһиттэрэ бары кэриэтэ – маннааҕы, олохтоох дьон. Баахталарга эмиэ оннук. Билигин биһиэхэ икки эрэ баахта былаһаакката: Үөһээ Муҥку уонна Ньурбатааҕы хайа-байытар кэмбинээт бааллар. Манна үлэһит үксэ – бу баайдаах сирдэртэн чугас сытар оройуоннар олохтоохторо.
Дьиҥинэн, толкуйдаан көрдөххө, үлэһиттэри атын эрэгийиэннэртэн аҕалыы барыһа суох. Олохтоох каадырдар аттыбытыгар бааллар, биһиги тэрийэн ыытар эбэтэр кыттар бакаансыйа дьаарбаҥкаларбытыгар кинилэр кэлэн үлэ көрдүүллэр. эбэтэр кыттар дьаарбаҥкаларбытыгар кинилэр кэлэн үлэ көрдүүллэр. Оттон атын эрэгийиэннэртэн дьону өссө көрдүөххэ, ыраахтан олорон кэпсэтиэххэ, бэрэбиэркэлиэххэ, көтөн кэлэллэрин төлүөххэ, уйунуохха наада. Биллэн турар, каадыр үлэһиттэрэ олохтоохтору кытары быһаччы үлэлииллэрэ быдан судургу.
Ол гынан баран, арыт Саха сиригэр наадалаах идэҕэ сөптөөх үлэһиттэри кыайан булбатахпытына, атын эрэгийиэннэртэн үлэһиттэри ыҥыран аҕалан үлэлэтэргэ тиийэбит. Холобур, суол инженердэрэ, грейдер машинистара тиийбэт буолааччылар. Уопсайынан бу исписэлиистэр элбэҕэ суохтара уонна олохтоох каадырдары үөрэтии ситэ кыайтара илигэ эмиэ кыһалҕаны үөскэтэр.
— Олохтоох үрдүк үөрэх кыһаларын кытары бииргэ үлэлиигит дуо?
— Биллэн турар, бииргэ үлэлиибит, биһиэхэ үлэлиэхтээх исписэлиистэри үүннэрэргэ интэриэстээх буоллахпыт. Бу үлэ өссө оскуолаттан, холобур, АЛРОСА профиллаах кылааһа баар оскуолаттан ыытыллар, онтон салгыы үрдүк үөрэх кыһаларын кытары үлэ барар. Чуолаан, Мииринэйгэ хайа үлэһиттэрин бэлэмниир өрөспүүбүлүкэҕэ соҕотох ХИФУ салаата уонна Мииринэйдээҕи политехническай институт бааллар. Киин куораттарга үрдүк үөрэх кыһаларыгар, Сибиир үөрэҕин тэрилтэлэригэр тус сыаллаах үөрэтии эмиэ тэриллэр. Сотору бастакы куурус устудьуоннарыгар буолбакка, үөһээ куурустарга онуоха майгынныыр үөрэх саҥа бырагыраамата саҕаланыаҕа. Хампаанньа наадыйар идэтигэр үөрэнэр уонна зачеткатыгар орто баала 4-тэн намыһаҕа суох буоллаҕына, устудьуон хампаанньаны кытта дуогабар түһэрсиэн, истипиэндьийэ ылыан уонна эксээмэннэрин барытын туттаран баран үлэҕэ киириэн сөп.
Уларыйыылар мүччүрүйбэттэр
— Хампаанньаҕа сотору-сотору үлэ миэстэтэ сарбылларын туһунан сурахтар иһиллэллэр. Тоҕо?
— Билиҥҥи кэм уларыйыылары ирдиир. Хампаанньа олус өр нус-хас, этэргэ дылы, “харгытааһын” усулуобуйатыгар олордо. Баайдаах сир хостоноро, алмаастар атыыланаллара, тугу эрэ уларытар туһунан толкуй киирбэт этэ, тоҕо диэтэххэ, “онто да суох барыта үчүгэйдик үлэлиир» курдуга. Оттон олох, дьиҥэр, чахчы уларыйда, онно биһиги улаханнык хаалан иһэрбит көһүннэ. Кэм ирдэбилинэн, үлэ көдьүүһүн, таһаарымтыатын үрдэтиэххэ, ороскуоттары намтатыахха наада. Онон, уларыйыылар син биир тахсаллар. Өскөтүн биһиги ити хайысханан үлэлээбэтэхпитинэ, хампаанньа сотору салаа атын кыттааччыларыттан хаалар уонна күрэстэһэр кыаҕа суох буолар куттала баар. Ол аҥаардас тэрилтэҕэ эрэ буолбакка, үлэһиттэргэ уонна бүтүн өрөспүүбүлүкэҕэ, алмаастаах түөлбэҕэ быдан охсуулаах буолуон сөп.
Сарбыйыылар – булгуччу үлэһити ууратыы диэн буолбатах, үгүс түгэҥҥэ атын подразделениеларга функциялары туспа араарыы эмиэ буолар. Холобур, Мииринэйгэ уонна Новосибирскайга Уопсай хааччыйыы киинэ (ОЦО) тэриллибитигэр, салайар аппарааттан каадырдар уонна бухгалтерия үлэһиттэрин улахан аҥаардара итиннэ көһөрүллүбүттэрэ. Дьиҥэр, сокуон быһыытынан көрдөххө, кинилэр хампаанньаттан ууратыллыбыттарынан ааҕыллаллар. Чопчу маннык процесс «Алмаздортранс» уонна АЛРОСА IT тэрилтэлэригэр ыытыллыбыта. Функциялары туспа араарыы – булгуччулаах миэрэ. Бу салайыы көдьүүһүн, үлэ таһаарыытын үрдэтэр, үлэһиттэри үөрэтэргэ уонна сайдыы бырагырааматын олоххо киллэрэргэ быдан судургу буолар. Саҥа технологияны 20 араас тэрилтэҕэ киллэриэх кэриэтэ, биир тэрилтэҕэ киллэрэр судургутугар сөбүлэһэргит буолуо.
Дьону тулалыыр эйгэҕэ дьайыы, экология долгутар
— Ыйытыылар дьону ордук экология уонна хампаанньа тулалыыр эйгэҕэ дьайыыта, бастатан туран, 2018 сыллаахха Бүлүүгэ тахсыбыт быһылаан содуллара долгуталларын көрдөрдүлэр. Маннык быһылаан аны хатыламматын курдук, быһыттары бөҕөргөттүгүт дуо? Быһылаан төрүөтэ буолбут, билигин хаһаайына суох Таборнай үрэх дьылҕатын туһунан тугу этиэ этигит?
– Быһылаан кэнниттэн “Иирэлээх” бириискэни оҥоруу бырайыагар нуорманы таһынан түспүт сөҥүүлэр кэннилэриттэн өрүскэ уу кээмэйин учуоттаан, уларыйыылар киллэриллибиттэрэ. ДВ7, ДВ6, ДВ2 уонна ДВ1 быһыттар бырайыактыыр параметрдара чөлүгэр түһэриллибиттэрэ. РОК 2 руслоотводной ханаал тутуллан үлэлии турар, Иирэлээх уута дражнай котловаҥҥа ааһа турарын наадатыгар, РОК1 ханаалга өрүс түгэҕин кэҥэтии уонна ууну ыытар кыаҕын улаатыннарыы ньыматынан саҥардылынна. ДВ4 быһыт оҥоһуллан, ДВ6 котловаҥҥа уу кээмэйин кыччатарга уонна “Иирэлээххэ” ДВ4 котлованы оҥорорго көмөлөстө. Руслоотводнай саҥа ханааллар 2019 сыл халаанын этэҥҥэ аһарбыттара.
Таборнай үрэх туһунан этэр буоллахха, үрэҕи уонна кини быһытын АЛРОСА бас билбэт этэ, урут ол быһыты чугастааҕы оҕуруот-саад табаарыстыбатын олохтоохторо бэйэлэрин тус наадаларыгар оҥостубут этилэр. Таборнай турар сирин АЛРОСА хаһан да бас билбэтэҕэ, билигин да бас билбэт. Билигин онно быһыт суох.
— Бүлүү өрүскэ мониторинг ыытыллар дуо, туох түмүктэри көрдөрдө? Бүлүү бөлөх улуустарын олохтоохторугар ханнык чэпчэтиилэр эбэтэр төлөбүрдэр оҥоһуллалларый?
– АЛРОСА ууну тиһигин быспакка чинчийэр. Мониторинг чахчыларынан, Бүлүү өрүс уута өссө 2018 сыл алтынньытыгар үчүгэй туруктаммыта. Онно боруобалары ылыы түмүктэрэ химиичэскэй биэссэстибэлэр 2018 сыл бэс-от ыйдарыгар тэҥнэспиттэрин көрдөрбүтэ. 2019 сыллааҕы мониторинг көрдөрбүтүнэн, фоновай концентрациялар нуорманы аһарбатахтара. Онуоха 2018 сыллааҕы киртийии ханнык эрэ химия ууга түспүтүттэн буолбатаҕын өссө төгүл тоһоҕолоон этэр наадалаах: алмааһы дражнай хостооһун – мэхэньиичэскэй процесс. Ууга элбэх уу аннынааҕы былыык, кумах, туой иҥмиттэрэ. Кинилэр сөҥмүттэригэр уу нуорматыгар түспүтэ.
Төлөбүрдэр тустарынан этэр буоллахха – хампаанньа нэһилиэнньэни ыраас уунан хааччыйыыны кытта сибээстээх улахан үлэҕэ кииристэ. АЛРОСА 2019-2024 сылларга Бүлүү бөлөх улуустарын 29 нэһилиэнньэлээх пуунун уунан хааччыйыыны сайыннарыы бырагырааматын үбүлүүр уонна биэс сыл устатыгар 833 мөлүйүөн солкуобайы ыытыаҕа. Бырагыраама чэрчитинэн, оройуоннар экологияларын туругар, нэһилиэнньэ доруобуйатыгар уонна нэһилиэнньэни ыраас уунан хааччыйыы боппуруостарыгар сыанабыл оҥоһуллуоҕа, тыа хаһаайыстыбатын бородууксуйатын хаачыстыбата үөрэтилиннэ. Бүлүү уонна Марха өрүстэр экологическай систиэмэлэрин техногеннай дьайыыттан харыстааһын ымпыктара-чымпыктара бары өртүттэн көрүллүбүттэрэ.
Нэһилиэнньэҕэ быһаарар үлэ наада
— Бу тахсыбыт быһылаан туохха үөрэттэ?
— Эбийиэктэр үлэлэрин өттүнэн көрдөххө, биллэн турар, куттал суоһааһынын аччатыыга мониторинг боппуруостарыгар болҕомтобутун өссө күүһүртүбүт. «Иирэлээх» баайдаах сиргэ быһыттар нуормаҕа барытыгар эппиэттээн тутуллубуттара. Ол гынан баран, ол нуормаларга маннык аномальнай элбэх сөҥүү түһүөн сөбө учуоттамматах этэ. Саахал кэнниттэн гидротехническай тутууларга барыларыгар киэҥ хабааннаах аудит ыыппыппыт, куттал суоһуон уонна алдьархай тахсыан сөптөөх көрүҥнэрин суоттаабыппыт. Хонтуруол эмиэ биллэ күүһүрдүллүбүтэ, гидротехническай тутуулар бары бөҕөргөтүллүбүттэрэ.
Бу быһылаан кэннэ өссө биир түмүк оҥоһулунна – нэһилиэнньэҕэ иһитиннэрии оҥорорго, быһааран биэрэргэ олус күүстээх үлэ наада. Олоҕуран хаалбыт олус элбэх санаа баара билиннэ. Холобур, “хампаанньа саахалланар быһыттардааҕа” диэн бигэ санаалаахтар. Хампаанньа саахалланар кутталлаах быһыттааҕа бэйэтигэр барыһа суоҕун туһунан өйдөбүл дьоҥҥо киирбэт. Бастатан туран, быһыт куһаҕаныттан сылтаан үлэҕэ-хамнаска ханнык эрэ ыксаллаах быһыы-майгы таҕыстаҕына – хоромньу бөҕө тахсар буоллаҕа. Иккиһинэн, хампаанньа аата-суола алдьанар. Хампаанньа бэйэтин эбийиэктэригэр барыта үчүгэй буоларыгар бастатан туран уонна сүрүн интэриэстээх. Эбэтэр “Хаһаайыстыбаннай актыыпка” “Хампаанньа бырабылыанньатын тоҕо Новосибирскайга көһөрдүлэр? Мииринэйгэ радиация фона куһаҕанын иһин дуо?” диэн ыйытыы киирбит. Бырабылыанньа Мииринэйгэ баарын курдук баар. Куоракка даҕаны радиационнай фонд сөбүгэр. Алмааһы хостуурга уонна байытыыга ханнык да радиоактивнай элэмиэннэр туһаныллыбаттар, радиационнай фон куһаҕан буоларыгар биир да төрүөт суох. Итинник холобурдар элбэхтэр. Ол аата, дьон элбэҕи билбэт-көрбөт, боппуруостардаах. Ону кытта үлэлииргэ соҕотох ньыма – быһаарыы. АЛРОСА сыл аайы айылҕа харыстабылыгар, экологияҕа 6 миллиард солкуобай кэриҥэ үбү-харчыны кутарын этэн аһарар эмиэ тоҕоостоох.
10 миллиард сыл аайы социальнай бырайыактарга ананар
— Социальнай боппуруостарга киириэххэ. АЛРОСА өрөспүүбүлүкэ баайын туһанарын иһин туох көмөнү оҥороруй?
– Бастатан туран, АЛРОСА сыл аайы өрөспүүбүлүкэҕэ нолуоктары уонна дивиденнэри төлүүр. Нолуоктарга сыһыаннаан эттэххэ, хампаанньа Мииринэйгэ регистрациялаах, ол иһин, чуолаан Саха сиригэр төлөбүрдэр 90 % тиксэр. Оттон дивиденнэр тустарынан эттэххэ, Саха сиригэр уонна улуустарга хампаанньа аахсыйаларын 33% тиксэр, ол эбэтэр, АЛРОСА бэйэтин аахсыйалаахтарыгар төлүүр үбүн барытын үс гыммыт биирэ. Өскөтүн, Саха сиригэр киирбит нолуоктары уонна дивиденнэри холбоотоххо, 2018 сылга ити суума 80 миллиард солкуобай буолбута, оттон 2019 сылга салаа кириисиһиттэн сылтаан – 60 миллиартан тахсыбыта.
Иккиһинэн, социальнай бырайыактарга көрүллэр үп суумата – сыл аайы 10 миллиард кэриҥэ. Манна үлэһиттэргэ уонна кинилэр дьиэ кэргэннэригэр социальнай бырагыраамалар, куораттарга уонна оройуоннарга көмө бырагыраамалар уонна өрөспүүбүлүкэҕэ социальнай бырайыактарга төлөбүрдэр, алдьархайга түбэспит дьоҥҥо аадырыстаммыт көмөлөр эмиэ киирэллэр.
Үлэ миэстэтин туһунан боппуруоһу эмиэ умнумаҥ. Саха сиригэр АЛРОСА-ҕа 25 тыһыынча кэриҥэ үлэһитэ баарын санатабын, кинилэр дьоһуннаах хамнаһы ылаллар уонна социальнай бакыаттаахтар.
— Хампаанньа үбүнэн көмөнү тоҕо “алмаастаах” улуустарга эрэ оҥороруй, атын улуустары арыылаан хаалларарый?
— Бу этии төрдүттэн сыыһа. Бастатан туран, эрдэ эппитим курдук, АЛРОСА нолуогун уонна дивиденин төлөбүрдэрэ бүддьүөккэ түһэллэр, ол аата өрөспүүбүлүкэҕэ барытыгар көмөлөһөллөр. Иккиһинэн, үлэ атын хайысхата эмиэ баар. Ол чэрчитинэн, көмө алмаастаах улуустартан атын сиргэ барар. Өрөспүүбүлүкэ социальнай-экэнэмиичэскэй сайдыытын туһунан Сөбүлэһии чэрчитинэн, Үүнэр көлүөнэ пуондатыгар АЛРОСА сыл аайы дуогабарга олоҕуран, үп көрөр. Сыл аайы түһэр төлөбүр уопсай суумата – 850 мөлүйүөн солкуобай, ол иһигэр 150 мөлүйүөн солкуобай Бүлүү бөлөх улуустарын уунан хааччыйыы бырагырааматыгар ыытыллар, 700 мөлүйүөн солкуобай тыын суолталаах социальнай инфраструктуралар эбийиэктэригэр уонна үөрэх, наука, култуура, успуорт, экология, доруобуйа харыстабылын уонна социальнай эйгэ бырайыактарын өйүүр дьаһалларга бэриллэр.
Профильнайа суох актыыптартан урут да барыһы ылбатахпыт
— Профильнайа суох актыыптартан босхолонууну хайдах быһаараҕыт? Кинилэр эмиэ социальнай хайысхалаахтар ээ.
– Эппитим курдук, АЛРОСА билигин биисинэс көдьүүһүн үрдэтэргэ дьулуһар. Бу процесстары уларытарга уонна ороскуоттары аҕыйатарга туһаайыллар дьоһуннаах уонна киэҥ хабааннаах үлэ. Онон, профильнайа суох актыыптартан босхолонуу – ити үлэ сорҕото. Бу профильнай биисинэскэ, алмааһы хостооһуҥҥа уонна атыылааһыҥҥа күүһү түмэр уонна үбү-харчыны ыытар кыахтанар туһугар оҥоһуллар.
АЛРОСА профильнайа суох актыыптартан биллэр барыһы хаһан да ылбатаҕа, оттон сорохторо олох да ороскуоттаах этилэр. Биһиги биисинэспит – алмааһы хостооһун, оттон гостиницалары, бааннары, биэнсийэ пуондатын, ниэптээх-гаастаах сирдэри көрөргө-истэргэ толору бырааптаах буолар кыаҕа суохпут туһунан бэйэҕэ чиэһинэйдик билинэр наада. Биһиги ити хампаанньалар балысхан сайдыыларын сүрүн үлэбититтэн өрө тутан, кыайан хааччыйыа суох этибит. Маны барытын биһиги актыыптарбытын атыылыыр профильнай инвестордарбыт ордук көдьүүстээхтик оҥорор кыахтаахтар.
Ол гынан баран, бу актыыптар ханна да сүппэттэрин, арай бас билээччилэр уларыйалларын эрэ бэлиэтээн этиэххэ наада. Тыа хаһаайыстыбатын тэрилтэлэрэ “Туймаада” ҮАПК састаабыгар киирэн, өрөспүүбүлүкэ көрүүтүгэр көспүттэрэ. АЛРОСА ити тэрилтэлэр Мииринэй оройуонугар салгыы үүнэн-сайдан, туруктаахтык үлэлээтиннэр диэн 670 мөлүйүөнү биэрбитэ. Кэлэр да өттүгэр үчүгэйдик үлэлиэхтэрэ. Бу тэрилтэлэр инникилэрин туһугар хампаанньа сөптөөх тэриллэринэн хааччыйбыта.
“Алмаастаах күһүн” НПФ уруккутун курдук үлэлиэҕэ, АЛРОСА-ны кытта олохтоммут биэнсийэ бары бырагыраамалара оннунан хаалыахтара, дьон уурунуута сүтүө суоҕа.
Надежда ЕГОРОВА, «Саха сирэ» хаһыат, edersaas.ru сайт
Мария ВАСИЛЬЕВА (СИА) түһэриитэ