АЛРОСА  үөрэнээччилэрдиин   экологияҕа бииргэ үлэлэһэр

Бөлөххө киир:

АЛРОСА Саха сирин үөрэнээччилэригэр сыл аайы ыытыллар “КүнЭко”  экология өрөспүүбүлүкэтээҕи научнай-чинчийэр эспэдииссийэтигэр бииргэ үлэлэһээччинэн буолла. Эспэдииссийэ быйыл САССР 100 сылыгар ананна уонна  Үөһээ Бүлүү улууһугар “Н.Г. Соломонов аатынан сайыҥҥы научнай-чинчийэр оскуола”  чэрчитинэн ыытылынна.

edersaas.ru

Эспэдииссийэ от ыйын 10 күнүттэн саҕаламмыта.  Нэдиэлэ  устата Дьокуускай куорат, Сунтаар, Үөһээ Бүлүү, Бүлүү, Ньурба, Горнай, Эбээн Бытантай улуустар оскуолаларыттан  28 үөрэнээччи хонуу усулуобуйатыгар  чинчийэр үлэлэргэ кытынна.

Үөрэнээччилэр араас хайысхалаах үлэҕэ, ол иһигэр, орнитологияҕа, ботаникаҕа, энтомологияҕа, гидробиологияҕа, экологияҕа, туризмҥа уонна археологияҕа улахан интэриэстээхтик сыһыаннастылар.

Бу дьаһалга тус сыаллаах өйөбүлү оҥорбут бииргэ үлэлэһээччилэр көмөлөрүнэн оҕолор идэлээх дьону кытары үлэлииллэригэр  кыах бэрилиннэ. Эспэдииссийэҕэ оҕолору  өрөспүүбүлүкэ сүрүннүүр научнай институттарын учуонайдара, наука үлэһиттэрэ, Саха сирин Экологияҕа министиэристибэтин исписэлиистэрэ,  учууталлар арыаллаатылар. Кинилэр эдэр экологтарга хас биирдии булумньуларын туһунан кэпсээтилэр. Ол курдук, оҕолор айылҕаны уонна  Үөһээ Бүлүү улууһун  экологияҕа  балаһыанньатын билистилэр, бэйэлэрин билиилэрин кэҥэтэр уонна  биллэ үрдэтэр кыахтаннылар.

АЛРОСА үлэтигэр  айылҕаны харыстааһыны уонна оннунан хаалларыыны өрө тутар. Хампаанньа Саха сиригэр экологияны уонна айылҕаны харыстыыр  дьаһалларга сыл аайы 6 миллиартан тахса үбү ыытар  уонна тулалыыр эйгэ харыстабылыгар уопсастыбаннас көҕүлээһиннэрин өйүүр.

«Хампаанньа  араас көрүҥнээх сөбүлэһиилэр эбэтэр дуогабардар нөҥүө хардарыта сыһыаҥҥа туруктаах быраактыканы киллэрдэ. АЛРОСА хампааанньа сыл аайы СӨ Экологияҕа министиэристибэтин уонна араас пуондалары кытары бииргэ үлэлиир туһунан сөбүлэһиилэри түһэрсэр. Бу пуондаларга  ыытыллар үбүнэн Экология министиэристибэтэ  өрөспүүбүлүкэ сиригэр-уотугар экологияҕа араас дьаһаллары ыытар. 2022 сылга 12 мөлүйүөнтэн тахса суумалаах сөбүлэһии түһэристибит. Ити ааспыт кэмнэри кытары тэҥнээтэххэ,          биллэ үчүгэй улаатыы. Бу кэмнээҕи сөбүлэһии чэрчитинэн  Маалыкай орто оскуолатын үөрэнээччилэригэр экология хайысхалаах “Эврика” лааҕыры үбүлүүргэ, Элгээйи сэлиэнньэтигэр Б.Н. Андреев аатынан эрэгийиэннээҕи мусуой-экология киинин лабораториятын наадалаах тэриллэринэн хааччыйарга, Саха сиригэр тулалыыр эйгэ харыстабылын салаата атаҕар туруутун туһунан кинигэни таһаарарга уонна экологияҕа аналлаах уус-уран киинэни устарга көмөлөһөргө былааннанабыт. “КүнЭко” экология эспэдииссийэтигэр көмөлөһүү 2022 сыллааҕы сөбүлэһиигэ көрүллүбүт дьаһаллар ахсааннарыгар киирсэр”, — диэн Экология киинин салайааччы, “АЛРОСА” АХ (ПАО) кылаабынай инженерин солбуйааччы Полина Анисимова кэпсээтэ.

АЛРОСА-ны сэргэ эспэдииссийэҕэ бииргэ үлэлэһээччинэн Уһук Илиҥҥэ экологияҕа куттал суох буолуутун пуондата буолар. Эспэдииссийэни тэрийээччилэр — Саха сирин Экологияҕа, айылҕаны туһаныыга уонна ойуур хаһаайыстыбатыгар министиэристибэтэ, Саха сирин Наукаларын академията, Биология кыһалҕаларын уонна криолитозона института, Үөһээ Бүлүү улууһун дьаһалтата уонна успуорка Ю.Н. Прокопьев аатынан уопсай үөрэхтээһин орто оскуолата.

«Оҕолору экология хайысхатынан сырдатарга, иитэргэ, үөрэтэргэ ордук дьоһуннааҕа – бырактыычаскай үөрүйэхтэр. Ол иһин, бу эспэдииссийэлэр оҕолор наукаҕа бырактыычаскай чинчийиилэргэ интэриэстэрин үрдэтэргэ улаханнык көҕүлүүллэр. Биһиги АЛРОСА-ҕа уонна Уһук Илиҥҥэ экологияҕа куттал суох буолуутун пуондатыгар  өйүүллэрин  иһин махтанабыт. Эһиил эспэдииссийэбитин өссө киэҥ хабааннаахтык ыытыахпыт,  наукаҕа чинчийиинэн дьарыктанар өссө элбэх оҕолору тардыахпыт”, — диэн СӨ Ууга сыһыаннаһыыга уонна экологическай сырдатыыга департаменын сүрүн исписэлииһэ Ньургуйаана Гуринова иһитиннэрдэ.

“АЛРОСА” пресс-киинин суруйуутуттан тылбаас.

СӨ Экологияҕа министиэристибэтин хаартыскалара.

+1
0
+1
0
+1
0
+1
0
+1
0
+1
0
+1
0