Андрей Жарков оннугар “Сбербаан” вице-президенэ Сергей Иванов (РФ президенин анал бэрэстэбиитэлэ Сергей Иванов уола) кэлиэх курдук. Бу туһунан бүгүн вице-премьер Юрий Трутнев иһитиннэрдэ.
Аграфена Кузьмина, «Саха сирэ» хаhыат, edersaas.ru
Бу иннинэ Юрий Петрович “АЛРОСА” президенэ Андрей Жарков үлэтиттэн уурайарын туһунан сайабылыанньа номнуо суруйбутун иһитиннэрэн турар. Бу боппуруоһу хампаанньа кэтээн көрөр сэбиэтигэр көрүөхтээхтэр. Сэбиэт салайааччыта, РФ үбүн миниистирэ Антон Силуанов бэлиэтииринэн, мунньахтарын бу күннэргэ ыытыахтаахтар.
Санатан эттэххэ, Андрей Жарков “АЛРОСА” хампаанньа президенинэн 2015 с. муус устарга анаммыта. Үлэтин хантараага эһиил 2018 с. бүтүөхтээх этэ. Бу иннинэ кини РФ Гохранын салайааччытын солбуйааччынан үлэлии сылдьыбыта.
Ыспыраапка: Андрей Жарков 1973 с. Женеваҕа төрөөбүтэ. Москватааҕы судаарыстыбаннай уонна лингвистическэй университеттары үөрэнэн бүтэрбитэ. Үлэтин РФ Киин бааныттан саҕалаабыта. Кэлин “Норильский никель”, «Центрстройреконструкция», «РУСАЛ Глобал Менеджмент Б.В.» хампаанньаларга, Приокскайдааҕы өҥнөөх металлар собуоттарыгар үлэлии сылдьыбыта.
Аграфена КУЗЬМИНА, «Саха сирэ» хаhыат, edersaas.ru