СӨ Бырабыыталыстыбата бас билэр «РИК Плюс” АУо иһигэр киирэр 10% «АЛРОСА-Ньурба» аахсыйатын Москва куоракка 12 млрд. солк. атыылаатылар. Онон, «АЛРОСА» кыттыгас хампаанньатыгар бэйэтин өлүүтүн 97,48% тиийэ улаатыннарда.
edersaas.ru
Ону туоһулуур дуогабарга АЛРОСА бырабылыанньатын бэрэссэдээтэлэ Сергей Иванов уонна РИК Генеральнай дириэктэрэ, РИК Плюс управляющайа Петр Алексеев илии баттаатылар.
СӨ Бырабыыталыстыбатын бэрэссэдээтэлин э.т. Владимир Солодов этэринэн киирбит үбү өрөспүүбүлүкэ 2030 с. диэри социальнай-экономическ’й сайдыытыгар туттуохтара, улахан суолталаах инвестиционнай бырайыактары үбүлүөхтэрэ, ол иһигэр Ньурба улууһугар.
Дьаһалта ороскуотун аччатарга, салайар үлэни киин сиргэ түмэргэ «АЛРОСА-Ньурба» тэрилтэни хампаанньаҕа холбуохтара. Бу иккис түһүмэх интеграция быһыытынан барыан сөп диэн этэллэр.
Санатан эттэххэ, алмааһы хостуур хампаанньа 33% аахсыйатын СӨ уонна аҕыс алмаастаах улуус бас билэллэр. Кинилэр өлүүлэрэ өрөспүүбүлүкэтээҕи сокуонунан көмүскэнэр. Ону атыылыыр санаабыт суох диэн Ил Дархан э.т. Айсен Николаев ТАСС сонуну киэҥник тарҕатар ааҕыныстыбаҕа иһитиннэрбит.
«АЛРОСА-Ньурба» Ньурбатааҕы уонна Ботуобуйатааҕы сиргэ алмаас хостуурга лицензиялаах. Бу эбийиэктэргэ Ньурбатааҕы ГОК үлэлиир. 2017 с. 7,7 мөл. караттаах күндү таас хостоммут.
Марианна Тыртыкова, «Саха сирэ», edersaas.ru