Сүрүн

АЛРОСА Үүнэр көлүөнэ пааркатын тутууну үбүлүүр

АЛРОСА Дьокуускай куоракка Үүнэр көлүөнэ пааркатын тутууну Саха сирин Үүнэр көлүөнэ тус сыаллаах пуондатыгар тиһигин быспакка көмөтүн суотугар үбүлүүр. Бырайыак уопсай суумата – 1,5 миллиард солкуобай.

edersaas.ru

СӨ Үүнэр көлүөнэ тус сыаллаах пуондатын кытта бииргэ үлэлээһин – АЛРОСА аһымал үлэтигэр биир саамай киэҥ хайысха. 2011 сылтан АЛРОСА социальнай соруктары быһаарарга пуондаҕа 7,176 миллиард солкуобайы биэрбитэ. 2012-2020 сылларга АЛРОСА үбүн суотугар 39 эби­йиэк үбүлэннэ, ол иһигэр, үөрэх – 3, успуорт – 10, култуура уонна сайдыы 10 эбийиэктэрэ, 4 балыыһа, 4 доруобуйаны чөлүгэр түһэрэр киин, 3 олорор дьиэ.
Онтон бу күннэргэ өрөспүүбүлүкэ киин куоратын 79-с кыбартаалыгар Үүнэр көлүөнэ пааркатын тутууну тэри­йэргэ бэлэмниир үлэлэр саҕаланнылар.
СӨ Ил Дархана Айсен Николаев саныырынан, “Үүнэр көлүөнэ паарката” өрөспүү­бүлүкэҕэ саҥа уопсастыбаннай сирдэр сайдыыларыгар стандартары биэриэхтээх, айылҕа-ки­­лиимэт ыксаллаах усулуобуйаларыгар олорор дьон бары ирдэбиллэригэр эппиэттиэхтээх уонна биһиги омук быһыытынан уратыбытын, хотугу колориты көрдөрүөхтээх.
Куорат олохтоохторо уонна ыалдьыттара сылы быһа сынньаналларыгар, үөрэнэллэригэр 2,4 гектар уопсай иэннээх уопсастыбаннай эбийиэк 2025 сылга үлэҕэ киллэриллэрэ былааннанар. Эбийиэги тутууну уонна ситэриини СӨ Үүнэр көлүөнэ тус сыаллаах пуондата сүрүннүүр. Бу эрэгийиэн килиимэтин уратытын учуоттуур сылы быһа үлэлиир бастакы аһаҕас туона буо­луоҕа. Манна актыыбынай сынньалаҥҥа, салгыҥҥа араас дьаһаллары ыытарга элбэх кыах баар үөскүөҕэ. Эдэрдэр кииннэрин дьиэтигэр сүрүн тирэх элбэх хайысхалаах, табыгастаах, аһаҕас буоларыгар уонна уларытыллар зоналарга уурулунна.
«LETO» диэн куорат эйгэтин тэрийии боппуруостарыгар анал кэмпэтиэнсийэлээх киин иһитиннэрбитинэн, Үүнэр көлүөнэ паарката – уопсастыбаннай паарка уонна үөрэхтээһин киинин функцияларын дьүөрэлиир эби­йиэк. “Паарка оҕолор уонна улахан дьон урбааҥҥа сыһыан­наах уонна креативнай үөрүйэхтэри сайыннаралларыгар хайысхаланыаҕа”, – диэн билиһиннэрдилэр.
Паарка бырайыага архитектура, бырайыактааһын, тутуу са­­лааларыгар кэккэ кэскиллээх наҕараадалары номнуо ылла. Ол иһигэр, бырайыак Architectural Review Future Project Awards 2021 аан дойдутааҕы бириэмийэ “Уопсастыбаннай уонна гражданскай тутуу” номинацияҕа кыа­йыылааҕынан билинилиннэ.
“Өскөтүн бу паарка, бэл 30 бырыһыана да олоххо киирдэҕинэ уонна кыайыылааҕынан да билиниллибитинэн, аан дойду бастыҥ пааркаларын ахсааныгар киирэригэр кыах баар дии саныыбын”, – диэн архитектура аан дойдутааҕы академиятын бэрэпиэссэрэ, дьүүллүүр сүбэ чилиэнэ Александр Ложкин санаатын үллэһиннэ.

«Үүнэр көлүөнэ паарката – креативнай экэниэмикэ сайдыытын тирэҕэ”

«Быйыл АЛРОСА өйөбүлүнэн өрөспүүбүлүкэ стратегическай эбийиэгин – Үүнэр көлүөнэ пааркатын, Дьокуускай куорат килбэйэр киинигэр куорат олохтоохторо сылы быһа сынньанар туоналарын олоххо киллэрии саҕаланна. Эбийиэги үлэлэтии 2025 сылга былааннанар, билигин тутулла турар кэмигэр биһиги номнуо оскуола үөрэнээччилэригэр уонна ыччакка үөрэтии өттүн саҕалаатыбыт. Биһиги бырагыраамаларбыт оҕолор бырайыактыыр үлэҕэ үөрү­йэхтэнэллэригэр, сыыппара технологияларын баһылыылларыгар, урбаан сатабылыгар уонна тус кэмпэтиэнсийэлэргэ сыһыарыыга – ХХI үйэҕэ наадалаахха барытыгар хайысхаланаллар. Паарка киһи сайдар ос­­куолатынан буолуоҕа. Үөрэхтээһин кластердарыгар тэрийэр-быраап формалаах араас тэрилтэлэр кэккэ дьаһаллары уонна дьарыктары ыытар кыахтаныахтара. Ол иһигэр, ­креативнай индустрия араас хайысхаларыгар – медиаттан, дизайнтан саҕалаан, аһылык индустриятыгар тиийэ барыта IT-технологиялар туһаныллыахтара”, – диэн СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров кэпсээтэ.

 

Тутууга бэлэммит

Пуонда былааннаммыт тутуу сирин барытын сиһилии үөрэппитэ. Онуоха Роспотребнадзор Сибиирдээҕи уонна Уһук Илиҥҥи чумааны утары охсуһар Иркутскайдааҕы научнай-чинчийэр институкка анал научнай-чинчийэр эспэртиисэни са­­каастаан ыыттарбыта. Институт исписэлиистэрэ 79 кыбар­таал сириттэн 450 кырыс бо­­руобатын араас дириҥтэн хос­тоон ылан, толору микробиологическай анаалыһы оҥорбуттара. Лаборатория чинчийиилэрин уонна Дьокуускайга сотуун ыарыы эпизотолого-эпидемиологическай балаһыанньатын ырытан көрүү түмүгүнэн, бу сиргэ сотуунтан өлбүт сүөһүлэр көмүллүбэтэхтэр. Бу сир сотуун ыарыылаах кыыл-сүөл көмүллүбүтүн туһунан этиллэр федеральнай реестртэн таһаарыллыбыта.
Билигин бэлэмнэнии үлэтигэр тутуу барар сирин усталыы бы­­лаанын оҥоруу киирэр. Ол аата паарка тутуллуохтаах сирин-­уотун бөхтөн-сыыстан, урукку тутуу атахтарыттан ыраастыыллар, буор-кумах куталлар, тутуу ыытыллар сирин иилии быстах хахха күрүө тутуллар”, – диэн “Тутуу дириэксийэтэ” инвести­циялыыр-тутуу фирма иһитиннэрдэ.
Санатан эттэххэ, паарканы тутуу туһунан сөбүлэһии быйыл балаҕан ыйыгар Саха сирин Үүнэр көлүөнэ тус сыаллаах ­пуондатын уонна “Тутуу дириэксийэтэ” инвестициялыыр-тутуу фирма икки ардыларыгар түһэрсиллибитэ.
Паарка тутулла турар кэмигэр Үүнэр көлүөнэ тус сыаллаах ­пуондата АЛРОСА өйөбүлүнэн оҕолорго уонна ыччакка үөрэх саҥа бырагыраамаларын номнуо киллэрдэ.
Ол курдук, бу күннэргэ тус сыаллаах пуонда “Хаартыскаҕа түһэрээччилэр, видео-оператордар уонна медиаискусство, медиаиндустрия эйгэтигэр исписэлиистэр уопсастыбалара” ЯРОО-ну кытта «Proskills Yakutia» оскуоланы үлэлэттилэр. “Тутуу саҕаламмытынан биллэрилиннэ, онтон биһиги үөрэҕи, ол иһигэр креативнай экэниэмикэҕэ, урбаан үөрүйэхтэригэр үөрэнээччилэргэ куурустары, бырагыраамалары саҕалаатыбыт. Билигин Дьокуускай куорат 6-10 кылааһын үөрэнээччилэригэр “Proдвижение бренда” куурус саҕаланна. Бу – медиа эйгэтигэр идэ сатабылларыгар үөрэтии, үөрэнээччилэри сайыннарыы уонна профориентация”, – диэн СӨ Үүнэр көлүөнэ тус сыаллаах пуондатын тус сыаллаах бырагыраамаларга управлениетын начаалынньыга Сардана Попова кэпсээтэ.
Үөрэх Саха сирин бреннэрин кейстэригэр ыытыллыаҕа. Преподавателлар састааптарыгар өрөспүүбүлүкэҕэ медиа уонна маркетинг эйгэтигэр бастыҥ идэлээхтэр киирдилэр.
Онлайн уонна офлайн форматтарга хаартыскаҕа түһэрии, видеомонтаж, саҥарыы ускуустубатын, маркетинговай стратегияны, медиапланы оҥоруу, каадырдаах анимация төрүттэригэр уонна да атын суолталаах хайысхаларга теория уонна быраактыка дьарыктара былааннаннылар.
«Биһиги быраактыка дьа­­рыктарыгар тирэҕирэн бырагырааманы бэлэмнээтибит, оҕолор айарга-тутарга, бэйэ илиитинэн оҥорорго үөрэнэллэр. Мин санаабар, аныгы үөрэнээччилэри чопчу ити дьарыктарга үөрэтиэххэ наада, ити аныгы эйгэҕэ ураты суолталаах”, – диэн ааҕар “Пространство” айар платформаны төрүттээччи Алексей Павлов.
«Онуоха оҕолору коммуникация үөрүйэхтэригэр, дьон иннигэр саҥарарга үөрэтиэххэ наада. Тоҕо диэтэххэ, бэйэтин ис санаатын сатаан сааһылаан этэр, дьону кытары аһаҕастык кэпсэтэр киһи мэлдьи ситиһиилээх уонна наадалаах исписэлииһинэн буолуоҕа», – диир «Proдвижение бренда» куурус преподавателэ, эксперт Анна Фомина-Миронова.
«Proskills Yakutia» оскуоланы бүтэрбиттэр Дьокуускай куоракка «Квартал труда» креативнай ­кластер дьиҥнээх резиденнэринэн буолуохтара.
Ити курдук, АЛРОСА ал­­мааһы хостуур хампаанньа Үүнэр көлүөнэ пааркатын өйөбүлэ, СӨ Үүнэр көлүөнэ пуондатын үөрэххэ бырайыактарын үбүлээһин Саха сирин креативнай экэниэмикэтэ тиһигин быспакка сайдарыгар сүрүн усулуобуйанан буолуоҕа.

«Cаха сирэ», edersaas.ru сайтка анаан АЛРОСА пресс-сулууспатын суруйуутуттан тылбаас.

АЛРОСА пресс-сулууспатын хаартыскалара

0
0