Быйыл таһаҕас тиэйэргэ хаһааҥҥытааҕар даҕаны күһүн хойут тымныйан, өрүс уута өр кэмҥэ толору туран, 2018 сыллааҕы навигация 166 күнүн иһигэр хампаанньа былаанын аһары толордо.
edersaas.ru
Ол курдук, 132 тыһ. туонна ньиэп уонна 140 тыһыынча туонна таһаҕас тиэлиннэ.
Владимир Козлов, АЛРОСА генеральнай дириэктэрин солбуйааччы:
— Ленскэйдээҕи өрүс пуордугар аан бастаан габаритнайа суох улахан таһаҕаһы көрүстүбүт. Үөһээ Муунаҕа автопоезтары, дьоҕус погрузчиктары, уопсайынан алмаас рудаатын хостуурга уонна тиэйэргэ туттуллар 3,5 миллиард солкуобай суумалаах тиэхиньикэни тиэйдибит. Табаар алдьаммакка барыта бүтүн тиийдэ. Хампаанньа УМТС салаатын уонна өрүс пуордун үлэһиттэрэ ыгым кэмҥэ ыарахан үлэни толордулар. Хата үчүгэй гидрологическай усулуобуйа баар буолан уонна күһүн уһаан, устар ааллар хойукка диэри сырыттылар.
Навигация кэмигэр саамай тыын суолталаах оттугу «АЛРОСА-Лена» танкердара Ленскэйдээҕи нефтебазаҕа тиксэрдилэр. Кыһыҥҥы суол аһылыннаҕына, бытарҕан тымныыга тоҥмот «Арктика” оттугу Үөһээ Муунаҕа тиэйиэхтэрэ.
Куттал суоһаабатын туһугар уонна сыананы хонтуруоллуурга ньиэби тиэйэр танкердар ахсааннарын элбэтэн биэрбиппит.
Быйыл өрүс уута толору туран, суудуналар таһаҕастарын 100% тиэннилэр, эргиир суолунан айаннаабатылар, ол иһин уу суолунан табаары тиэйии төлөбүрэ 20% түһэн, хампаанньа үбүн кэмчилээн тутунна.
Марианна Тыртыкова, «Саха сирэ», edersaas.ru