«АЛРОСА» коронавируһу быһаарар саҥа суһал-тиэстэри босхо биэрдэ
«АЛРОСА» Саха сирин балыыһаларыгар түргэн тестэри босхо биэрдэ
Өрөспүүбүлүкэ бүддьүөтүн үс гыммыт биирин нолуок быһыытынан киллэрэр итиэннэ сыл аайы Саха сирин социальнай сайдыытыгар 10 миллиард солкуобайга тиийэ үбү көрөр «АЛРОСА» хампаанньа Саха сиригэр коронавирус инфекцията тарҕамматын туһугар күүскэ көмөлөһөр.
sdersaas.ru
Ол курдук, АЛРОСА коронавируһу утары дьаһалларга ыыппыт өрөспүүбүлүкэҕэ көмөтүн кээмэйэ бу күннэргэ 200 мөлүйүөнтэн тахса суумаҕа тэҥнэстэ. Бу үп-харчы хааны кислородунан хааччыйар мэдиссиинискэй тэриллэри, тыҥа искусственнай вентиляциятын (ИВЛ) аппарааттарын, харыстанар мааскалары, бэрчээккэлэри, эмтэри уо.д.а. атыылаһарга туһаныллар.
Ону сэргэ, Саха сирин Ил Дархана Айсен Николаев көҕүлээһининэн, АЛРОСА көмөтүнэн Саха Өрөспүүбүлүкэтэ РФ эрэгийиэннэрин ортолоругар биир бастакынан коронавирус инфекциятын быһаарар саҥа түргэн тестэри ылла.
«АЛРОСА» аахсыйалаах хампаанньа муус устар 10 күнүгэр Дьокуускай уонна Мииринэй куораттар лабораторияларыгар «Изотерм SARS- CoV-2 РНК-скрин» Covid-19 быһаарар сэттэ тыһыынча кэриҥэ тиэһи көмө быһыытынан босхо биэрдэ.
“АЛРОСА” АХ Мэдиссиинэҕэ киинин дириэктэрэ Юлия Кулакова иһитиннэрбитинэн, Арассыыйаҕа оҥоһуллубут тест коронавируһу быһаарарга ПЦР (полимеразная цепная реакция) диагностикаҕа олоҕурар. Бу тестэри боростуой лабораторияларга туттан барыахха сөп, а.э. эбии атын тэриллэр ирдэниллибэттэр. Онон, Саха сирин эмчиттэрэ коронавирус инфекциятын быһаарарга боруобаҕа суһаллык элбэх тест оҥорор кыахтаннылар.
Ону таһынан, барыллаан бэлэмнэниитэ уустуктардаах атыыга баар атын тиэстэргэ холоотоххо, «Изотерм SARS- CoV-2 РНК-скрин» систиэмэҕэ олох саҥа ньыма (петлевая изотермальная амплификация), ол эбэтэр ДНК кытта үлэ туһаныллар. Бу ньыманы туһанарга киһиттэн ылыллыбыт анаалыһы анал булкааска сылытан баран, реактивтарга эбэн, планшекка көһөрүллэр, ол кэннэ тута чинчийии ыытыллар. Исписэлиис быһаарарынан, бу саҥа ньыманы туһаныы, анаалыстар түмүктэрин кэтэһэр бириэмэни уонна сыыһа түмүктэри оҥорор кутталы аччатар (үс бүк!). Чуолаан, образецтары анал ирдэбиллэрин тутуһан бэлэмнииргэ 35 мүнүүтэ, оттон чинчийиигэ 25 мүнүүтэ кэриҥэ барарын учуоттаан, эмтэнээччи анаалыстарын түмүгэ номнуо 1 чааһынан биллэр. Анаалыстары -20-тэн -70 кыраадыска диэри харайыыны ирдиир атын тиэстиир тиһиктэртэн уратыта диэн, бу нобуордары +2 до +8 кыраадыска харайыахха сөп. Бу эмиэ саҥа ньымат туттуллуута быдан судургутун көрдөрөр.
Кэнники чахчыларынан, билиҥҥитэ SARS-CoV-2 саҥа коронавируһу утары эмтэр уонна вакциналар суохтар. Киһи саамай эрэнэ күүтэр барыллааһынынан, тустаах вакцинаны оҥорорго 18-24 ыйтан итэҕэһэ суох кэм ирдэниллэр. Онон, чугастааҕы кэмҥэ саатар коронавирус салгыы тарҕанарын бопсорго уонна бытаардарга көмөлөһөр табыгастаах миэрэ — түргэн тестэри туһаныы буолар. Исписэлиистэр этэллэринэн, тест оҥоруута инфекцияҕа сыстыбыт дьону уонна ыарыы тарҕанар кутталлаах сирдэрин түргэнник быһаарарга көмөлөһөр. Өрөспүүбүлүкэ бас билиитигэр аахсыйатын 33% баар “АЛРОСА” АХ суһал тиэстэри Өрөспүүбүлүкэтээҕи 3 №-дээх килиниичэскэй балыыһаҕа бээтинсэҕэ босхо биэрбитэ.
Надежда ЕГОРОВА, “Саха сирэ” хаһыат, edersaas.ru