Бүгүн муус устар 17 күнүгэр «АЛРОСА» хампаанньа сыл ахсын ыытыллар «Хозактив-2019» диэн форума буола турар.
Манна Айхаллааҕы хайаны байытар кэмбинээт иһинэн «Заря» айылҕа баайдаах сир аһыллыыта сүрэхтэннэ. Форум иккис чааһыгар хампаанньа үлэһиттэриттэн «АЛРОСА» салалтатыгар 200 ыйытыы киирдэ. Шахтердар, улахан тиэхиньикэ машинистара, маркшейдердар, электрогазосварщиктар о.д.а. хамнас хаһан үрдүүрүн сурастылар. Чуолкайдаан эттэххэ, алмаас бырамыысыланнаһыгар орто хамнас 110-120 тыһыынча солкуобай. Арассыыйа араас муннуктарыттан баахта ньыматынан үлэлии кэлбит дьон дойдуларыгар баралларыгар айан төлөбүрүн ыйыталастылар. Айхал олохтоохторо истиэнэлэрэ хайа барбыт, уулара хам тоҥон хаалар хаарбах дьиэҕэ олороллорун кэпсээтилэр. Онуоха Ил Дархан Мииринэй оройуона саахалланар туруктаах дьиэттэн дьону көһөрүү бырагырааматыгар киирсэрин, чуолаан Айхалга 150 хаарбах дьиэттэн дьону көһөрүөхтээхтэрин туһунан эттэ.
Бүгүҥҥү форумҥа Удачнайтан, Айхалтан, Үөһээ Муунаттан, Накыынтан, Анаабыртан о.д.а. алмаасчыттар быһа эфиргэ холбонон, үлэлэрин, олорор дьиэлэрин-уоттарын усулуобуйатын туһунан үрдүкү салалтаны кытта кэпсэттилэр, кыһалҕаларын быһаартардылар.
Марианна ТЫРТЫКОВА, «Саха сирэ» хаһыат, edersaas.ru