«АЛРОСА» хампаанньа Ньурбаҕа биэрэр үбэ-харчыта оннунан хаалыаҕа

Ил Дархан Айсен Николаев «АЛРОСА» хампаанньа салалтатын кытта мунньахтаата. Онно Ньурба улууһун кытта сөбүлэһиигэ илии баттастылар. Оройуоҥҥа бэриллэр үп-харчы оннунан хаалыаҕа. 

«Биһиги «АЛРОСА-Нюрба» хампаанньабыт оройуоҥҥа социальнай хабааннаах тэрээһиннэри үбүлээн кэллэ. Ол үгэс салгыы барыаҕа», — диэтэ хампаанньа бэрэсидьиэнэ Сергей Иванов. Ону таһынан Саха сирэ уонна алмаас хостуур хампаанньа салгыы бииргэ үлэлэһиилэрин быһаарыстылар.

«АЛРОСА-ны кытта биһиги ыкса үлэлэһэбит. Күн бүгүн эһиилги бүддьүөт ылыныллан турар. Дивиденнэргэ кэккэ боппуруос баар. Ону алмаас аан дойдутааҕы ырыынагыттан көрөн атын акционердары кытта бииргэ быһаарсыахпыт«, — диэтэ Ил Дархан. 

Ону кытта Айсен Николаев АЛРОСА өрөспүүбүлүкэҕэ суолтатын санатта. Итиэннэ сыл аайы Бүлүү өрүскэ оҥоһуллубут хоромньуну боруостаан сыл аайы 150 мөл. солк. Үүнэр көлүөнэлэр тустаах пуондаларыгар төлүөхтэрэ.

edersaas.ru