АЛРОСА этническэй ювелирнай кэллиэксийэ эскиистэрин куонкуруһун ыытар

Бөлөххө киир:

АЛРОСА «Кындыкаан» этно-култуурунай бырайыакка салгыы көмөлөһөр. Бырайыак Хотугу сир аҕыйах ахсааннаах төрүт норуоттарыгар, кинилэр култуураларыгар уонна үгэстэригэр, кинилэр олохторун, култуураларын уонна тылларын харыстааһыҥҥа уопсастыба болҕомтотун тардар.

Бырайыак хамаандата Хотугу сир аҕы­йах ахсааннаах норуоттарын харыстабылын дьаһалларыгар саҥа көрүүлэри киллэрэри уонна глобализация, бырамыысыланнас сайдар усулуобуйаларыгар кинилэри өйүүрү бэйэтин сүрүн соругунан ааҕар.

Бырайыагы биир кыысчаан туһунан остуоруйа кынаттаабыта. Кыысчааны 200 сыл анараа өттүгэр Үөһээ Дьааҥы хайаларын таһыгар уоспаттан бары өлбүт эбээн аҕа ууһугар тыыннааҕын булбуттара. Кындыкаан диэн кырачаан кыысчаан халбаҥнаабат күүстээх санаа, кут-сүр күүһүн, Хотугу сир аҕыйах ахсааннаах норуоттарын төрүт сыаннастарын уобараһынан буолбута. Билигин бу уобарас инникигэ эрэли үөскэтэр, Хотугу сир аҕыйах ахсааннаах но­­руоттарын бэйэтин тула мунньуохтаах.

«Кындыкаан» бырайыак 2020 сылтан саҕаламмыта. Эбэҥки кырачаан кыысчаанын устуоруйата аан дойдуну үчүгэй өттүгэр уларытар уонна аан дойдуга Саха сирин норуоттарын туһунан кэпсиир са­­наалаах дьону бэйэтин тула түмтэ.

Айар холбоһукка уопсастыбанньыктар, дизайнердар, суруналыыстар, артыыстар уонна учуонайдар киирдилэр.

АЛРОСА бииргэ үлэлээһин бастакы түһүмэҕин чэрчитинэн, эдэр суруйааччы Лидия Тарасова «Кындыкаан» остуоруйатын уонна итинник ааттаах кылгас анимационнай киинэ тахсыыларын өйөөбүтэ.

«Кындыкаан» остуоруйаҕа үлэлээбит улахан хамаандаҕа этнографтар, лингвис­тэр, Хотугу сир аҕыйах ахсааннаах төрүт норуоттарын тылларын уонна култууратын илдьэ сылдьааччылар көхтөөхтүк кытыннылар. Остуоруйа икки тылынан – нууччалыы уонна эбээннии тахсар. Тиэкиһи эбээн тылыгар биллиилээх хотугу суруйааччы Анатолий Степанов-Ламутскай тылбаастаата. Остуоруйаҕа сыанабылы эбээн тылын учебниктарын ааптара, өрөспүүбүлүкэ үтүөлээх учуутала Александра Кейметинова суруйда.
«АЛРОСА алмааһы Саха сиригэр хостуур, онон бэйэтин эппиэтинэһин, ол иһигэр төрүт норуоттарга, өйдүүр. Биһиги Хотугу сир норуоттарын халбаҥнаабат күүстэрин, баай устуоруйаларын уонна үйэлээх үгэстэрин сөҕөбүт-махтайабыт итиэннэ маны барытын кэлэр көлүөнэлэргэ хаалларыыны дьоһун суолталааҕынан ааҕабыт. Кындыкаан устуоруйата биһигини олус долгутта уонна саарбахтаан да көрбөккө, бырайыагы өйөөбүппүт. Биһиги хампаанньабыт Саха сирин аҕы­йах ахсааннаах төрүт норуоттарыгар тиһигин быспакка көмөлөһөр: омук үгэс буол­бут бырааһынньыктарыгар кыттан, ус­­туоруйа сыаннастарын харыстабылыгар уонна омук култууратын тилиннэрэргэ көмөлөһөр, табаһыттар уонна балыксыттар төрүт общиналарын өйүүр, кинилэри араас идэҕэ үөрэтэр уонна үлэлэтэр, олоххо-дьаһахха наадалааҕынан хааччыйар», – диэн АЛРОСА генеральнай дириэктэрэ Сергей Иванов бэлиэтээн эттэ.

«Кындыкаан» бырайыагы сайыннарарга салгыы аан дойдуга Кындыкаан саҥа персонаһын билиһиннэриэхтээх кылгас анима­ционнай киинэни оҥоруу буолар. Ону таһынан, «Кындыкаан» бастакы тус сыаллаах пуонда тэриллэр. Кинилэргэ саҥа бренҥэ ааптар бырааба бэриллэр. Бу пуон­даҕа дивиденнэр түмүллүөхтэрэ уонна Хотугу сир аҕыйах ахсааннаах төрүт но­­руоттарын тылларын, култуураларын, үгэс буолбут олохторун укулаатын харыстабылыгар уонна өрөспүүбүлүкэ креативнай кыахтарын өйүүргэ бэриллиэхтэрэ.

Биир ый анараа өттүгэр АЛРОСА уонна «Кындыкаан» айар холбоһук «Кындыкаан сөҕүмэр устуоруйата» диэн эбэҥки остуоруйатын матыыбынан ювелирнай киэргэллэр этническэй кэллиэксийэлэрин оҥорорго эскиистэр куонкурустарын биллэрбиттэрэ.

Саха ювелирнай дизайнердарын, үгэс курдук, хотугу сир кэрэ айылҕата, бэлиэлэр хомуһуннара, норуот остуоруйалара уонна номохторо өрө күүрдэр. Кэрэхсэбиллээх уус-уран уобарастар муодунай кэллиэк­сийэлэринэн буолалларын сэргэ, чэгиэн до­­руобуйа уонна нус-хас буолуу харысхалларынан буолаллар. «Кындыкаан» кэллиэк­сийэлэрин Арассыыйаҕа уонна аан дойдуга ювелирнай куонкурустарга көрдөрүү бы­­лааннанар.

Куонкурус сыала-соруга – аныгы маастардар айар үлэлэрин билиһиннэрии уонна Хотугу сир төрүт норуоттарын култуурунай кодтарын дьиктитин, Арассыыйа араас култууралааҕын көрдөрүү.

Куонкуруска кыттарга дизайнердар, ювелирнай дизайнердар, график-худуоһунньуктар уонна 18-тан үөһээ саастаах маастардар ыҥырыллаллар. Кыайыылаахтары салаа эспиэртэрэ кыттыылаах эспиэр­тиир дьүүллүүр сүбэ талыаҕа. Куонкурус кыа­йыылаахтарын киэргэллэрин АЛРОСА ювелирнай бөлөҕө оҥоруоҕа уонна https://alrosadiamond.ru/ интэриниэт-платформаҕа атыыланыахтара. Кыайыылаахтарга хам­­паанньа кэллиэксийэлэригэр бииргэ үлэ­лииргэ этиилэр киириэхтэрэ. Маны таһынан айар куонкурус бириистээх пуондатыгар графическай планшеттар бааллар.

Бириис пуондата:

1 миэстэ – Wacom Cintiq 24 Pro
2 миэстэ – Apple iPad Pro (2021), Apple Pencil
3 миэстэ — Wacom Cintiq 22.

Куонкуруска кыттарга сайаапкалары ылыы 2022 сыл муус устар 15 күнүгэр диэри салҕанар. https://jewelry.kyndykan.com/ ­саайтка сайаапкалары биэриэххэ уонна усулуобуйаны сиһилии билсиэххэ сөп.

Кыайыылаахтары муус устар 29 күнүгэр https://kyndykan.com/ саайтка уонна куонкурус социальнай ситимнэригэр биллэ­риэхтэрэ.


АЛРОСА Саха сирин аҕыйах ах­­сааннаах төрүт норуоттарын көхтөөхтүк өйүүр. Хампаанньа туруктаах социальнай-экэнэмиичэскэй сайдыыны ситиһэр, олох хаачыстыбатын тупсарар, норуоттар култуураларын харыстыыр уонна сайыннарар туһугар судаарыстыба, биисинэс уонна аҕыйах ахсааннаах төрүт норуоттар интэриэстэригэр балаансы буларга дьулуһар.
Хампаанньа Саха сирин алмаастаах түөлбэтин тоҕус улууһун үбүлүүр, хотугу улуустар олохторун-дьаһахтарын өйүүргэ улахан болҕомтотун уурар, тыа хаһаайыстыбатыгар уонна оҥорон таһаарыы үлэтигэр көмөлөһөр, социальнай дьаһаллары үбүлүүр, итинэн эрэгийиэн сайдыытыгар биллэр кылаатын киллэрэр.

АЛРОСА Саха сирин аҕыйах ах­­сааннаах төрүт норуоттарын култуураларын уонна үгэстэрин тарҕатарга кыһаллар: хампаанньа култуура-успуорт комплекстарын подразделениеларыгар саха норуотун 13 самодеятельнай кэлэк­тиибэ баар, манна 200-тэн тахса киһи дьа­­рыктанар. Хампаанньа ону таһынан Хотугу сир аҕыйах ахсааннаах төрүт но­­руоттарын бырааһынньыктарын, тылларын, ­үгэстэрин өрө таһаарыынан дьа­рыктанар.

Маргарита Попова, «Кындыкаан» бырайыак ааптара:

«Кындыкаан персонаһа – биһиги хамаандабыт күүрээннээх үлэтин ахсын чаҕылхайдык кырыыланар бриллиант. Кинини планета инникитэ долгутар дьоно кырыылыыллар».

«Саха сирэ», edersaas.ru саайтка анаан АЛРОСА пресс-сулууспатын суруйуутуттан тылбаас.

+1
0
+1
0
+1
0
+1
0
+1
0
+1
0
+1
0