АЛРОСА уонна Үүнэр көлүөнэлэр пуондалара Үөһээ Дьааҥы оҕолоругар саҥа оонньуур былаһаакканы бэлэхтээтилэр. Оҕо көмүскэлин күнүгэр Дьааҥы улууһун Сартаҥ нэһилиэгин Үҥкүр сэлиэнньэтигэр «Полярная звезда» оҕо спортивнай-оонньуур былаһааккатын үөрүүлээх аһыллыыта буолла.
edersaas.ru
Дьааҥы улууһун Сартаҥ нэһилиэгэ Үүнэр көлүөнэлэр пуондалара «Кэнэҕэски туһугар» бырагыраама иһинэн “Сайдыы” хос бырагыраама чэрчитинэн биллэрбит 2019-2020 сыллардааҕы “Мин былаһааккам” өрөспүүбүлүкэтээҕи куонкуруһугар кыайан, оҕо спортивнай-оонньуур былаһааккатын туттар кыахтаммыта. Пуонда бу бырагырааматын АЛРОСА быһаччы үбүлүүр.
“Былаһаакка арыллыыта биһиэхэ улахан үөрүүлээх сонун. Оҕолор уонна төрөппүттэр саҥа дьэрэкээн былаһааккабытын олус күүппүппүт. Биһиги баҕа санаабытын олоххо киллэрэргэ көмөлөспүт дьоҥҥо махтанабыт”, – диэн элбэх оҕолоох ийэ Любомира Слепцова астына бэлиэтээтэ.
Саха сиригэр бу куонкурус чэрчитинэн 2020 сылга оҕо оонньуур-спортивнай 11 былаһаакката оҥоһулларын үбүлээһин былааннанар.
Санатар буоллахха, Дьааҥы улууһугар Covid-19 дьаҥ бэлиэтэммэтэх буолан, ыраах бөһүөлэккэ былаһаакканы арыйыы көҥүллэммитэ.
Надежда ЕГОРОВА, «Саха сирэ», edersaas.ru