Бу туһунан Ил Дархан Егор Борисов «Якутия 24» биэриигэ эттэ. 2017 с. түмүгүнэн алмааһы хостуур хампаанньа 70 млрд. солк. суумалаах ыраас барыс ылбыт. Онтон аҥаарын 38,6 млрд. үбү акционердар дивидент быһыытынан үллэстиэхтэрэ.
Онтон өрөспүүбүлүкэ бүддьүөтүгэр 38,6 миллиартан 9,6 млрд. кутуллан киириэҕэ.
«Былырыын хампаанньа бары салааларынан Удачнайга, Айхалга, Накыыҥҥа 39,6 млн. караттаах алмааһы хостоон, сылы муҥутаан үрдүк көрдөрүүлээх түмүктээтэ. Онон, атыы кээмэйэ кыччаабата», — диэн Егор Борисов иһитиннэрдэ.
Кэтээн көрөр сүбэ мунньахха дивиденнары төлүүргэ 2017с. биир акцияны 5,24 солк. сыаналаатылар.
Ону таһынан, алмааһы кырыылыыр бырамыысыланнаһы сайыннарарга болҕомто ууруллан, Смоленскайга баар «Кристалл» АУО «АЛРОСА-ҕа» атыылыырга сорудахтаатылар.
Алмаастаах хампаанньа акционердарын сыллааҕы мунньаҕа аны сайын бэс ыйын 26 күнүгэр ыытыллыаҕа.
Марианна Тыртыкова, «Саха сирэ», edersaas.ru