Күн ахсын федеральнай кыһыҥҥы суолунан 200 тырааныспар үс-түөрт ый устата Хоту оройуоннарга аһы-үөлү, тутуу матырыйаалларын, оттугу тиэрдиэҕэ. Кыстык суолу 15 гусеничнай бульдозердаах ыарахан механизированнай тиэхиньикэ бэлэмнээтэ.
edersaas.ru
«Дьиҥэр, Бүлүү айан суолугар сырыы ахсынньы 15 күнүттэн саҕаланыахтаах этэ даҕаны, күһүн уһаан, механизированнай биригээдэлэр хойутаан тахсаннар, кыһыҥҥы суол ахсынньы бүтүүтэ биирдэ аһылынна. Уһун кэмнээх ардах түһэн, уулаах кута сирдэр массыына түспэт гына хам тоҥоллорун кэтэстибит», — диэн этэр Мирнэйдээҕи массыына суолун управлениетын начаалынньыга Александр Кондратьев.
Бүлүү хайысхатынан кыһыҥҥы суол быһа холоон, муус устар 1 күнүгэр диэри аһаҕас буолуоҕа. Ол кэнниттэн улахан масыына сырыыта эһиилги кыһыҥҥа диэри тохтуура күүтүллэр.
Марианна ТЫРТЫКОВА, «Саха сирэ» хаһыат, edersaas.ru