Аан дойду ырыынагар синтетическай алмааһы таһаараннар, «АЛРОСА» хампаанньа ааҕыытынан, сыл ахсын 450-480 мөлүйүөн дуоллар хоромньу тахсар. Айылҕа биэрбит дьиҥнээх күндү тааһын харыстыырга уонна сымыйа киэргэлтэн сатаан араарарга хампаанньа бэйэтин бородууксуйатыгар идентификационнай нүөмэр туруорар буолуоҕа. Ол туһунан бэс ыйын 27 күнүгэр «АЛРОСА» алмааһы батарар тэрилтэтин дириэктэрэ Евгений Агуреев иһитиннэрдэ.
edersaas.ru
Сымыйа, синтетика бирилийээннэри утары охсуһарга хампаанньа атыы-эргиэн саҥа салаатын таһаарда. Билигин саҥа онлайн-платформа нөҥүө атыыланар бирилийээн цифровой пааспарыгар ханнык эрэгийиэҥҥэ хостообуттарын, ким кырыылаан таһаарбытын барытын суруйуохтара.
Платформа бэс ыйыттан саҥа үлэлээн эрэр эрээри, манна номнуо 2000 араас быһыылаах, ыйааһыннаах, дьүһүннээх бирилийээннэр бааллар. Онон хас биирдии күндү таас ID куодтаах буолуо, алмаас хаһан, ханна хостонон атыылаһааччыга тиийиэр диэри толору остуоруйатын электроннай түмэлгэ киллэриэхтэрэ.
«Алмаас кырыылааһынын биһиги бэйэбит оҥоруохпутун сөп, эбэтэр ALROSA Alliance киирэр партнердарбытыгар үлэһиэхпит. Лабораторияҕа синтетика таастары оҥорон, ырыынакка 2-4 мөлүйүөн карааты таһаардылар, онтон 80% кистээн, дьиҥнээх бирилийээн диэн атыылыыллар. Онон сыл ахсын алмаас бырамыысыланнаһыгар уопсай эргиитииттэн 3% хоромньу тахсар. Өскөтүн алмаас ырыынага 15-16 миллиард дуоллар буоллаҕына, 450-480 мөлүйүөн дуоллар искусственнай алмааһы оҥорооччуларга барар», — диэн этэр Евгений Агуреев.
Онон «АЛРОСА» алмааһа цифровой пааспарданан, атыылаһааччылар дьиҥнээх уонна лабораторияҕа оҥоһуллубут синтетика бирилийээни сатаан араара үөрэниэхтэрэ.
«Саха сирэ», edersaas.ru