“АЛРОСА” АК (ПАО) хампаанньа салалтатыгар уларыйыылар тахсыбыттарын туһунан иһитиннэрдэ.
Сотору кэминэн хампаанньаттан бырабылыанньа икки чилиэнэ – генеральнай дириэктэри солбуйааччы Юрий Окоемов уонна быраап управлениетын начаалынньыга Александр Матвеев барыахтара. АЛРОСА кырыылыыр комплексын үлэтин сүрүннээбит Юрий Окоемов уонна Александр Матвеев бэйэлэрэ баралларын биллэрдилэр. Кинилэргэ иккиэннэригэр Арассыыйа Федерациятын үбүн миниистирин махтала биллэрилиннэ. Кырыылыыр комплекс үлэтин салгыы АЛРОСА генеральнай дириэктэрэ Сергей Иванов бэйэтэ сүрүннүөҕэ. Оттон быраап управлениетын – генеральнай дириэктэри солбуйааччы Константин Машинскай.
От ыйыгар хампаанньаттан генеральнай дириэктэр сүбэһитэ, АЛРОСА бэрэстэбиитэлистибэтин Дьокуускайга салайбыт Александр Терентьев эмиэ барда. Кини “СӨ сыаналаах металларга уонна сыаналаах таастарга кэмитиэтэ” АУо салайааччытын бастакы солбуйааччынан ананна. АЛРОСА Дьокуускайга баар бэрэстэбиитэлистибэтэ, урут иһитиннэриллибитин курдук, реструктуризацияланыа. Маннык быһаарыныыны АЛРОСА Кэтээн көрөр сүбэтэ ылыммыта. Бэрэстэбиитэлистибэ оннугар Былаас уорганнарын кытта үлэҕэ отделы тэрйиэхтэрэ уонна генеральнай дириэктэри солбуйааччы Алексей Дьячковскайга бас бэриниэҕэ.
АЛРОСА генеральнай дириэктэрэ Сергей Иванов: “Хампаанньа үлэтин үгүс сылларыгар Юрий Константинович, Александр Григорьевич уонна Александр Владимирович бэйэлэрин идэлэрин дэгиттэр баһылаабыттарын көрдөрөн, хампаанньа аата-суола аан дойдуга үрдүүрүгэр тирэх буоллулар. АЛРОСА кэлэктиибин уонна тус бэйэм ааппыттан хампаанньа уонна алмаас салаатын туһугар сыралаах үлэлэрин иһин махтанабын”.
Маны сэргэ саҥа анааһыннар эмиэ буоллулар. Ол курдук, хампаанньа сүрүн байытааччытынан АЛРОСА-ҕа 22 сыл үлэлээбит Сергей Имангулов буолла. Маныаха диэри Сергей Имангулов “Якутнипроалмаз” институтугар байытар кэлимсэ отдел начаалынньыгынан үлэлээбитэ. АЛРОСА каадырдарын бэлэмниир киин дириэктэринэн Алла Попова ананна.
Юрий Константинович Окоемов АЛРОСА салааларыгар 1993 сылтан салайар үлэҕэ сырытта. 2009 сылтан 2018 сылга диэри вице-бэрэсидьиэн, оттон 2018 сылтан АЛРОСА генеральнай дириэктэрин солбуйааччынан үлэлээтэ.
Хампаанньаҕа кириисис кэннинээҕи уустук кэмҥэ кини салалтатынан АЛРОСА саҥа батарар концепцията оҥоһуллубута. Кини көхтөөх кыттыытынан Арассыыйаҕа алмаас сырьетун батарыы нормативнай ирдэбиллэрэ тупсарыллыбыттара, ол курдук, аукционнарга кыттыыга таможня хонтуруола, алмааһы атыылыах иннинэ суортааһын эҥин. Юрий Окоемов алмаас сырьетун суортааһын уонна сыаналааһын эйгэтигэр наукаҕа тирэҕирбит саҥа технологиялары олоххо киллэриини тэрийээччилэртэн биирдэстэринэн буолар. АЛРОСА-ҕа тэхиньиичэскэй саҥардыы бырагырааматын олоххо киллэриигэ төһүү буолбута.
Александр Григорьевич Матвеев АЛРОСА быраапка управлениетын 2009 сылтан салайбыта. Суукка мөккүөдэри быһаарыыга, ол иһигэр норуоттар икки ардыларынааҕы арбитражнай сууттарга кини салалтатынан мэлдьи үтүө түмүктэр ситиһиллибиттэрэ. Александр Григорьевич 2018-2024 сылларга АЛРОСА Бөлөҕүн сайдыытын уһун болдьохтоох бырагырааматын оҥорууга кыттыбыта. Ону тэҥэ Арассыыйа Федерациятыгар алмааһы хостуур бырамыысыланнас үлэтин сүрүннүүр нормативнай аактары оҥорууга.
Александр Владимирович Терентьев 2011 сылтан Дьокуускайга АЛРОСА бэрэстэбиитэлистибэтин салайбыта. 2017-2018 сылларга вице-бэрэсидьиэн быһыытынан эрэгийиэн уорганнарын кытта ыкса үлэлээбитэ. 2018 сылтан АЛРОСА генеральнай дириэктэрин сүбэһитинэн анаммыта. Кини Саха Өрөспүүбүлүкэтин судаарыстыбаннай былааһын уорганнарын кытта ыкса ситимнээх үлэни тэрийбитэ.
Сергей Вениаминович Имангулов АЛРОСА-ҕа 1996 сылтан үлэтин Айхаллааҕы хайа-байытар кэмбинээтин 14 №-дээх байытар фабрикатыгар оборудованиены өрөмүөннээһиҥҥэ дьуһуурунай слесарь быһыытынан саҕалаабыта. Байытыы учаастагын маастарынан үлэлээбитэ, фабрика кылаабынай инженерин производствоны сайыннарыыга солбуйааччынан, кэмбинээт кылаабынай байытааччытын (обогатитель) солбуйааччынан уонна АГОК кылаабынай байытааччытынан үлэлээбитэ. 2012 сыллаахха “Якутнипроалмаз” институтугар байытыы кэлимсэ отделын начаалынньыгынан көһөрүллүбүтэ. АЛРОСА-ҕа 22 сыл үлэ ыстаастаах. Кылаабынай байытааччы дуоһунаһыгар кини Владимир Карнацкайы солбуйбута.
Алла Сергеевна Попова АЛРОСА-ҕа 2016 сылтан ЦПК сүбэһитинэн саҕалаабыта. 2018 сыллаахха ыччат бэлиитикэтин отделын начаалынньыга буолбута. АЛРОСА-ҕа көһүөр диэри кини Астраханскай уобалас социальнай сайдыыга уонна үлэҕэ миниистирин солбуйааччынан үлэлээбитэ.
СИА.