АЛРОСА 850 мөлүйүөнү тус сыаллаах пуондаҕа ыытыаҕа

Бөлөххө киир:

АЛРОСА бөлөҕө уонна СӨ Үүнэр көлүөнэ тус сыаллаах пуондата бииргэ үлэлиир туһунан Сөбүлэһии түһэристилэр. Докумуон өрөспүүбүлүкэҕэ эрдэттэн сайдыы бырайыактарын олоххо киллэриини, социальнай инфраструктура эбийиэктэрин тутууну, тустаах сайдыыга усулуобуйаны тэрийиини уонна оҕолор, ыччаттар айар кыахтарын арыйыыны көрөр.

edersaas.ru

Сөбүлэһии усулуобуйатынан АЛРОСА пуондаҕа тус сыаллаах үбүнэн өйөбүлү салгыы оҥорор. Хампаанньа биэрбит үбэ өрөспүүбүлүкэ сиригэр социальнай суолталаах соруктары быһаарарга: култуура, үөрэхтээһин, доруобуйа харыстабылын, физичэскэй култуура уонна успуорт саҥа эбийиэктэрин тутарга, оҕолору аан дойду бастыҥ стандартарын таһымыгар үөрэтэргэ, тулалыыр эйгэ харыстабылын күүһүрдэргэ туттуллар.

Бу соруктары толорорго АЛРОСА 2021 сылга пуондаҕа 850 мөлүйүөн солкуобайы ыытыаҕа. Үп-харчы Бороҕон сэлиэнньэтигэр Василий Күлүмнүүр аатынан Култуура киинин, Нам сэлиэнньэтигэр Култуура уонна духуобунай сайдыы дыбарыаһын уо.д.а. социальнай эбийиэктэри тутууга туһаныллыаҕа. Ааспыт сыл бүтэһигэр АЛРОСА уонна тус сыаллаах ­пуонда 5 сылга суоттаммыт урукку сөбүлэһиилэрин дьаһаллара түмүктэммиттэрэ. 2011- 2020 сылларга АЛРОСА социальнай соруктары быһаарыыга Үүнэр көлүөнэ тус сыаллаах пуондатын нөҥүө 7 миллиартан тахса үбү ыытта.

«Үүнэр көлүөнэ тус сыаллаах пуондатын кытары бииргэ үлэлээһин – АЛРОСА аһымал санааланыыга үлэтигэр биир саамай киэҥ хабааннаах хайысха. Аҥаардас кэнники биэс сылга хампаанньа үбүнэн Саха сиригэр социальнай суолталаах 13 эбийиэк тутулунна уонна 150-тан тахса бөдөҥ быра­йыак олоххо киллэрилиннэ. Кэнники сылларга саҥа хайысхаларынан дьоҕус нэһилиэнньэлээх пууннарга оҕо оонньуур комплекстарын оҥоруу, кэмиэрчэскэйэ суох сиэктэр тэрилтэлэрин уонна гражданнар көҕүлээһиннэрин өйөөһүн, муниципалитеттарга сири-уоту биир кэлим сайыннарыы боппу­руостарыгар көмөлөһүү уонна кэккэ нэһилиэнньэлээх пууннары иһэр уунан хааччы­йыы буолла”, – диэн АЛРОСА генеральнай дириэктэрин солбуйааччы Алексей Дьячковскай иһитиннэрдэ.

«АЛРОСА 2032 сылга диэри тус көрүүлээх, 2025 сылга диэри сайдыы саҥа кэнсиэпсийэтин олоххо киллэриини саҕалыыр. Докумуон өрөспүүбүлүкэ баһылыга Айсен Николаевы кытары сөбүлэһиннэриллибитэ уонна пуонда үрдүкү сэбиэтэ бигэргэппитэ. Биһиги үлэбитин өрөспүүбүлүкэ сайдыытын стратегиятыгар сөп түбэһиннэрэр санаалаахпыт. АЛРОСА өлүүтүгэр Үүнэр көлүөнэ тус сыаллаах пуондата ылар уопсай үбүн 90% тиксэр. Ол иһин, алмаастаах хампаанньаны кытары сөбүлэһиигэ илии баттааһын биһиэхэ турар соруктары быһаарыы сүрүн усулуобуйатынан буолар. 2021-23 сылларга суоттанар “Инникибит туһугар” саҥа бырагыраама итинник хабааннаах оҥоһулунна”, – диэн Үүнэр көлүөнэ тус сыаллаах пуондатын генеральнай дириэктэрэ Владимир Егоров бэлиэтээн эттэ.

АЛРОСА-тан киирэр сүрүн үп-харчы 2016-2020 сылларга “Инникибит туһугар” бырагыраамаҕа ыытыллыбыта. Ону сэргэ, 2019 сылтан АЛРОСА пуонда нөҥүө Бүлүү бөлөх улуустарын экологиятын уонна манна олорор нэһи­лиэнньэ доруобуйатын туругун чинчийэргэ биир кэлим научнай чинчийиилэри үбүлүүр. АЛРОСА ону тэҥэ, бэйэтин үбүнэн “Сир уустара” өрөспүүбүлүкэтээҕи үөрэх-чэбдигирдэр киин үлэтин өйүүр.

«Саха сирэ», edersaas.ru  анаан АЛРОСА уонна  СӨ Үүнэр көлүөнэ тус сыаллаах пуондатын пресс-сулууспата.

+1
0
+1
0
+1
0
+1
0
+1
0
+1
0
+1
0