АЛРОСА Экологияҕа киинин исписэлиистэрэ, өрүстэргэ уонна күөллэргэ балыктары олохсутуу киэҥ хабааннаах үлэтин чэрчитинэн, чиир балык 1 мөлүйүөн ыаматын Бүлүү өрүс уҥа кытылыгар “Соколинай косаҕа” бэс ыйын 10 күнүгэр аан бастаан ыыттылар.
edersaas.ru
Экология киинин исписэлиистэрэ “Балык Чернышевскайдааҕы собуота” ГУП кытары Саха сиригэр Бүлүү өрүскэ балыктары аан бастаан киллэрдилэр. Манна 1949 сыллаахха сыаналаах боруода, бастакы алмаас көстүбүтэ.
“Бүгүн Саха сиригэр чиир курдук сыаналаах боруода балыгы аан бастаан ыытыы буолла. Бу 2019 сылга өрүстэргэ уонна күөллэргэ балыктары олохсутуу дьаһалларын үбүлээһин улаатыытын көмөтүнэн ситиһилиннэ. Ону таһынан биһиги олохсутуу географиятын кэҥэттибит. Наука-чинчийэр үлэ ыытыллыбытын түмүгэр, балыктары олохсутуу дьаһалларын Бүлүүтээҕи уонна Светлинскэй ууну хаайар сирдэргэ эрэ буолбакка, Бүлүү уонна Марха өрүстэргэ ыытылынна. Ону сэргэ Үөһээ Бүлүү сиригэр-уотугар баар Тимир Күндэ күөлгэ балыктары эмиэ аан бастаан ыытыахпыт”, – диэн АЛРОСА Экологияҕа киинин уу ресурсаларын уонна баайын-дуолун туһаныыны харыстааһын бөлөҕүн салайааччыта Алёна Дьяконова быһаарда.
Уопсайынан, 2020 сыл ыам-балаҕан ыйдарыгар 4 мөлүйүөнтэн тахса (чиир, күндүөбэй, быраҥаатта) уонна 65 тыһыынча хатыыс ыамалара ыытыллыаҕа. Бу балык Чернышевскайдааҕы собуотун кытта бииргэ үлэлээһин саҕаланыаҕыттан саамай улахан дьаһалынан буолуоҕа. Ити дьаһал Бүлүү, Өлүөнэ өрүстэргэ, Тимир Күндэ күөлгэ уонна Бүлүүтээҕи уу хаайар сиргэ (Аанньаах өрүс нөҥүө) былааннанар.
Манна даҕатан эттэххэ, АЛРОСА экологтара ыам ыйын 27 күнүгэр бастакы түһүмэххэ Өлүөнэ өрүскэ Ленскэй куорат оройуонугар Сибиир күндүөбэйин ыамаларын ыыппыттара. Балыктары олохсутуу дьаһалларын аныгыскы түһүмэҕэр Бүлүүтээҕи ууну хаайар сиргэ уонна Тимир Күндэ күөлгэ быраҥаатта ыамаларын тарҕатыахтара. Бу сайын былааннаммыт бырагыраама Бүлүү өрүскэ балык ыамаларын ыытыынан түмүктэниэҕэ.
Надежда ЕГОРОВА тылбааһа, “Саха сирэ”, edersaas.ru