АЛРОСА уонна Үүнэр көлүөнэлэр пуондалара Дьааҥы оҕолоругар былаһаакка бэлэхтээтилэр
Оҕо көмүскэлин күнүгэр Дьааҥы улууһун Сартаҥ нэһилиэгин Үҥкүр сэлиэнньэтигэр «Полярная звезда» оҕо спортивнай оонньуур былаһааккатын үөрүүлээх арыллыыта буолла.
Үүнэр көлүөнэлэр пуондалара «Кэнэҕэски туһугар» бырагыраама чэрчитинэн биллэрбит 2019-2020 сыллардааҕы “Мин былаһааккам” өрөспүүбүлүкэтээҕи куонкуруһугар кыайан, Дьааҥы улууһун Сартаҥ нэһилиэгэ саҥа оҕо спортивнай оонньуур былаһааккатын туттар кыахтаммыта. Пуонда бу бырагырааматын АЛРОСА быһаччы үбүлүүр.
«Былаһаакка арыллыыта биһиэхэ улахан үөрүүлээх сонун. Оҕолор уонна төрөппүттэр саҥа дьэрэкээн былаһааккабытын олус күүппүппүт. Биһиги баҕа санаабытын олоххо киллэрэргэ көмөлөспүт дьоҥҥо махтанабыт”, – диэн элбэх оҕолоох ийэ Любомира Слепцова бэлиэтээтэ.
Саха сиригэр бу куонкурус чэрчитинэн бу сылга 11 оҕо оонньуур спортивнай былаһаакката үбүлэнэрэ былааннанар.
Санатар буоллахха, Дьааҥы улууһугар COVID-19 дьаҥ бэлиэтэммэтэх буолан, ыраах бөһүөлэккэ былаһаакканы арыйыы көҥүллэммитэ.
edersaas.ru