Сыл аайы ыытыллар “Хаһаайыстыбаннай актыып” (“Хозактив”) корпоративнай пуорумҥа бэлэмнэнии чэрчитинэн, «АЛРОСА» баҕалаах дьон бары хампаанньа салалтатыгар ыйытыылары биэрэллэригэр кыах баарын туһунан өссө олунньуга иһитиннэрбитэ.
Маннык быраактыканы хампаанньа икки сыллааҕыта саҕалаабыта. Ол гынан, оччолорго ыйытыылары бэйэлэрин үлэһиттэрэ эрэ биэрэр кыахтаахтара. Онон, быйылгыттан Саха сирин олохтоохторо аан бастаан ыйытыы биэрэр кыахтаннылар.
Коронавируһунан сибээстээн, “Хаһаайыстыбаннай актыыбы” ыытыыны тохтотон эрэргэ тиийиллибитэ, ол гынан баран, хампаанньа киирбит ыйытыыларга хоруйдуурга эрэннэрбитэ. Хампаанньа аахсыйатын 33 бырыһыана – өрөспүүбүлүкэ уонна алмаастаах улуустар гиэннэрэ. Инньэ гынан, нэһилиэнньэ хампаанньаны уруккуттан даҕаны бэйэтин киэнин быһыытынан уонна Саха сирин аныгы социальнай-экэнэмиичэскэй олоҕун төрүтүнэн ааҕар.
Онон, биһиги Саха сирин олохтоохторо ордук интэриэһиргээбит ыйытыыларыгар хоруйдары билиһиннэриини саҕалыыбыт. Бүгүн өрөспүүбүлүкэ олохтоохторо ордук элбэхтик биэрбит суолталаах ыйытыыларын таллыбыт.
Ыйытыылары хомуйуу сибээс бары ханаалларынан тэриллибитэ. Хампаанньа билиҥҥитин уонна инники кэскилин интэриэһиргиир дьоҥҥо барыларыгар анаан, анал төлөпүөн нүөмэрдэрэ, электроннай почта аадырыстара ыйыллыбыттара, социальнай ситимнэргэ уонна WhatsApp мессенджергэ аккауннар оҥоһуллубуттара.
Аахсыйа кэмигэр киирбит 500-чэ ыйытык тиэмэлэринэн наардаммыта, тэҥ ыйытыылар бииргэ түмүллүбүттэрэ. Ол түмүгэр 189 дьоһуннаах ыйытыыттан – 80-ча бырыһыана «АЛРОСА» үлэ кэлэктиибин чилиэннэрин ыйытыылара, оттон хаалбыт 20 бырыһыанын өрөспүүбүлүкэ олохтоохторо ыыппыттар.
Хампаанньа үлэһиттэрэ үксүгэр хамнаһы уонна араас төлөбүрдэри, социальнай бэлиитикэни, оҥорон таһаарыыны, саҥа технологиялары уонна хампаанньа инники кэскилин кытта сибээстээх ыйытыылары интэриэһиргээбиттэр. Өрөспүүбүлүкэ олохтоохторо, сүрүннээн, «АЛРОСА» хампаанньаларын бөлөхтөрүгэр хайдах үлэҕэ киирэри, хампаанньа өрөспүүбүлүкэҕэ кылаатын уонна инвестициятын туһунан быһаарарга көрдөспүттэр. Ону таһынан, эрэгэйиэн олохтоохторун экология боппуруостара уонна бу эйгэҕэ «АЛРОСА» төһө үбү-харчыны кутара долгутар.
Киирбит ыйытыылартан хампаанньа генеральнай дириэктэрэ Сергей Ивановка быһаччы сыһыаннаахтары бэлиэтиэххэ сөп. Элбэх киһи хампаанньа ханнык эмэ сүҥкэн боппуруостарын быһаарарга көрдөспүт. Холобур, “Ханнык офис ордук бас-көс буоларый? Мииринэй дуу, Москва дуу?”, “Хампаанньаҕа омук инвестордара тоҕо наадаларый?” уонна “Хампаанньа тоҕо профильнайа суох актыыптартан босхолоноруй?” уо.д.а.
Чопчу этии киллэриилээх ыйытыылары туспа бэлиэтиэххэ наада. Чуолаан:
— дойду сүрүн үрдүк үөрэҕин кыһаларыгар каадырдары тус сыаллаах бэлэмнээһини тэрийии көрүҥнэрин;
— уопуту атастаһарга эдэр исписэлиистэри кросс-командировкалааһын;
— каадыр, бухгалтерия уонна да атын дьыалалары оҥоруу боппуруостарынан дьарыктанар Киин колл-киинэ суһаллык үлэлиирин үрдэтэр тустарынан.
Сокуоҥҥа биэнсийҕэ тахсар сааска уларытыылар киллэриллибиттэринэн сибээстээн, эдэр исписэлиис сааһыгар үөһээ кыраныыссаны улаатыннарар, дьону тиэйэр-таһар тырааныспар көдьүүстээхтик үлэлиирин уонна куттал суох буоларын үрдэтэр туһунан этиилэр киирбиттэр.
Киирбит этиилэргэ барыларыгар харда, эппиэт бэлэмнэннэ, оттон кыһалҕалаах боппуруостар хонтуруолга ылылыннылар.
Хампаанньа салалтата уонна исписэлиистэрэ «АЛРОСА» инникитин интэриэһиргиир уонна кыһаллар өрөспүүбүлүкэ олохтоохторугар уонна хампаанньа ыйытыы биэрбит үлэһиттэригэр махталларын биллэрэллэр. Кинилэр көхтөөх көрүүлэрэ хампаанньа баар кыһалҕалары чопчу билэригэр уонна бэлиэтииригэр эрэ буолбакка, ону толорорго тустаах миэрэлэри кэмигэр ылынарыгар уонна толороругар көмөлөһөр. Ол курдук, аһаҕастык иһитиннэрии уонна үлэ кэлэктиибин, Саха сирин олохтоохторун кытары быһаччы сибээс, нэһилиэнньэ санаатын уонна баҕа санаатын учуоттааһын – барыта туһалаах буолуо, аахсыйалар хонтуруолунай бакыаттарын судаарыстыба бас билиилээх эрэгийиэн хайа уруудалаах соҕотох хампаанньатын үлэтигэр-хамнаһыгар көмөлөһүөхтэрэ.
ЫЙЫТЫЫЛАР-ХОРУЙДАР
Ыйытыы: Сир баайын ким бас билэрий? Аахсыйалары омук инвестордарыгар атыылыыр тоҕо наада этэй? Ама, онто суох сатаныа суох этибит дуо? Биһиги сирбит баайбытыттан киирбит дивиденнэр ханна эрэ таска баар киһиэхэ тоҕо бэриллиэхтээхтэрий?
“АЛРОСА” АК (ПАО) генеральнай дириэктэрэ С.С.Иванов:
– АЛРОСА аахсыйалара көҥүл эргииргэ приватизация түмүгэр, Арассыыйа Федерацията уонна Саха сирэ бас билэр сыаналаах кумааҕыларын сорҕотун бүддьүөтү толороору атыылаабыттарыгар, тахсыбыттара. Процесс бары кыттыылаахтарыгар турбут сорук – аахсыйалар иһин үрдүк уонна сөптөөх үбү-харчыны ылыы. Хомойуох иһин, оччолорго Арассыыйа ырыынагын сабардама ону уйумматаҕа, ол иһин, аахсыйа сорҕотун омук пуондаларыгар атыылыырга быһаарыы ылыныллыбыта. Акционердар Арассыыйа инвестордарынан эрэ хааччахтаммыттара буоллар, кэлин сайдыыга бэриллибит үп-харчы быдан кыра буолуо этэ.
Билигин омук пуондаларыгар «АЛРОСА» аахсыйаларын 10-15 бырыһыанын кэриҥэ тиксэр. Онуоха омук акционердарын хас биирдиилэрин өлүүтэ олус кыра, онон ханнык эмэ быһаарыылары ылынарга дьайар да кыахтара суох. Мин сонуну киэҥник тарҕатар сириэстибэлэргэ «АЛРОСА-ны» омук олигархтара хонтуруоллууллар» диэн санаа этиллибитин көрбүтүм. Суох, оннук буолбатах. Сир баайын-дуолун кинилэр бас билбэттэр.
Омук инвестордара баалларынан биһиги киэн туттуохпутун сөп, ити хампаанньа бигэ тирэхтээҕин туоһулуур индикатор буоларын тоһоҕолоон бэлиэтиир наада.
Улахан омук пуондалара (бэл, Арассыыйаҕа сааҥсыйа оҥорбут омук дойдулара эмиэ) бэйэлэрин үптэрин биһиги аахсыйаларбытыгар угар буоллахтарына, ол аата кинилэр «АЛРОСА-ны» туруктаах, үп өттүнэн бигэ, кэскиллээх хампаанньанан ааҕаллар.
ЫЙЫТЫЫ: Устудьуоннарга тус сыаллаах миэстэ. Дуогабары ханна түһэрсиэххэ сөбүй?
Алла Попова, Каадырдары бэлэмниир киин дириэктэрэ:
– «АЛРОСА» бакалавриат бырагырааматынан уонна үрдүк үөрэх кыһаларын тэрилтэлэригэр үөрэнэр уонна 2-ис, онтон үөһээ куурустары бүтэрэргэ специалитеттаах устудьуоннары кытары, ону сэргэ, магистратура бырагырааматынан үөрэтиигэ бастакы куурустан саҕалаан дуогабар түһэрсэр. Бу барыта хампаанньа хос салааларыгар ханнык анал идэлээх исписэлиис төһө наадатын учуоттаан оҥоһуллар.
Дуогабар түһэрсэргэ устудьуон булгуччулаах ирдэбиллэргэ эппиэттиэхтээх: үөрэнэрин тухары орто баала 4-тэн кыччыа суохтаах уонна анал тестированиены, тургутууну ситиһиилээхтик ааһыахтаах. Сиһилии иһитиннэрии уонна дуогабар түһэрсии боппуруостарын Каадырдары бэлэмниир киинтэн билсиэххэ сөп.
Надежда ЕГОРОВА, “Саха сирэ” хаһыат, edersaas.ru
Хаартыскалар: хампаанньа архыыбыттан.