АЛРОСА алмаастарга Сэбиэскэй Сойуус дьоруойдарын ааттарын иҥэриэҕэ
«АЛРОСА» АХ генеральнай дириэктэрэ Сергей Иванов бу сыл тохсунньутугар 76,64 карааттаах алмааска Саха сириттэн Сэбиэскэй Сойуус дьоруойун аатын ылбыт Сергей Александрович Асямов аатын иҥэрэр туһунан бирикээһи таһаарбыта. Бу дьаһал Саха АССР 100 сылыгар бэлэмнэниинэн “Өрөспүүбүлүкэ 100 сылыгар — 100 алмааһы” бырайыак чэрчитинэн ылынылынна.
Ил Дархан Айсен Николаев бу бырайыак тэриллэригэр этии киллэрбитин, «АЛРОСА» генеральнай дириэктэрэ Сергей Иванов өйөөбүтэ. Кини Саха сиригэр булуллубут 50 карааттан үөһээ ыйааһыннаах алмааска Саха сирин 100 чулуу дьонун аатын иҥэрэр санаалаах. Онон, Кыайыы күнүгэр 21 алмааһы өрөспүүбүлүкэбититтэн Аҕа дойду сэриитигэр кыттан, Сэбиэскэй Сойуус дьоруойун аатын ылбыт дьоҥҥо аныыллара күүтүллэр.
Санатан суруйдахха, дьоруойдар — Федор Охлопков, Федор Попов, Николай Степанов, Николай Кондаков ааттара номнуо күндү таастарга иҥэриллибиттэрэ. Онон, 2022 сылга диэри өрөспүүбүлүкэ социальнай-экэнэмиичэскэй, духуобунай сайдыытыгар кылааттаах дьонун, ол иһигэр Социалистическай Үлэ дьоруойдарын ааттара алмааһынан үйэтитиллиэҕэ.
Сергей Александрович Асямов 1907 сыллаахха оробуочай дьиэ кэргэҥҥэ Красноярскайга төрөөбүтэ. Ейскэйдээҕи байыаннай-морской авиационнай училищены бүтэрэн, летчик-инструктор идэтин баһылаабыта. 1933 сылтан — ГВФ-ка, 1935 сылтан — Ленскэйдээҕи авиационнай Главсевморпуть бөлөҕөр летчигынан үлэлээбитэ. 1941 сыллаахха аармыйаҕа ыҥырыллыбыта. Ол сыл от ыйыттан үһүс авиационнай дивизия 746-с полкатыгар тиийэн сэриилэспитэ. 1942 сыл тохсунньутугар 48 байыаннай көтүүнү оҥорбута. Кини экипаһа өстөөххө сүүс туонна буомбаны быраҕан, улахан хоромньуну таһаарбыта. Сергей Александрович муус устар 29 күнүгэр 1942 сыллаахха уочараттаах байыаннай сорудаҕын толоро сылдьан саахалланан, тыына быстыбыта. Киниэхэ Сэбиэскэй Сойуус дьоруойун аатын от ыйын 20 күнүгэр 1942 сыллаахха иҥэрбиттэрэ, ону тэҥэ Ленин, Кыһыл Знамя уордьаннарынан, мэтээлинэн наҕараадалаабыттара. Билигин дьоруой аатын Лаптев муоратыгар баар Петр арыытын буухтата уонна Үөһээ Халыма Зырянкатыгар баар уулусса сүгэр.
Дьоруой Асямов аатын «Заполярная» алмаастаах сиртэн хостообут 4 Black Sawables Coloured диэн ювелирнэй хаачыстыбалаах кристаллга иҥэрбиттэрэ.
Яна Байгожаева.