Алмазнай бөһүөлэгэр саҥа оскуола аһылынна

Ааптар: 
Бөлөххө киир:

Мииринэй оройуонун Алмазнай бөһүөлэгин 4-с нүөмэрдээх оскуолатын үөрэнээччилэригэр үөрэх дьыла саҥа дьиэҕэ саҕаланыаҕа. Бүгүн, атырдьах ыйын 31 күнүгэр, Билии күнүн иннинэ 275 миэстэлээх үс мэндиэмэннээх оскуола аһыллыытын үөрүүлээх түгэнэ буолла.

edersaas.ru

Саҥа оскуола аһыллыбытынан олохтоохтору СӨ Ил Дархана Айсен Николаев эҕэрдэлээтэ. Лоп курдук, икки сыл анараа өттүгэр Мииринэй улууһугар командировкаҕа кэлэ сылдьан оскуола бастакы сыбаайатын түһэрсибитэ.

2018 сыллаахха балаҕан ыйын 3 күнүгэр саҥа оскуола бастакы сыбаайата түспүтэ. Алмазнай бөһүөлэк үөрэнээччилэрэ, учууталлара, төрөппүттэрэ, олохтоохторо хайдах курдук үөрбүттэрин өйдүүбүн. Онно үгүстэр икки сыл иһигэр тутуллан бүтүө дуо, диэн долгуйалларын биллэрбиттэрэ. Икки сылынан кэлиэм, булгуччу саҥа оскуолаҕа киириэхпит диэн эрэннэрбитим. Бу түгэн тосхойбутуттан үөрэбин, бүгүҥҥү бырааһынньыгынан бөһүөлэк олохтоохторун барыларын эҕэрдэлиибин!”, — диэн Ил Дархан эттэ.

Ил Дархан, төһө даҕаны коронавирус хааччахтары киллэрдэр, өрөспүүбүлүкэҕэ бары социальнай эбийиэктэр кэмигэр туттарыллалларын бэлиэтээтэ итиэннэ тутуу тэтимиттэн үөрэрин биллэрдэ.

Оҕолорбут саҥа, аныгы оскуолаҕа үөрэнэллэриттэн, уһулуччулаах учууталлартан билии иҥэринэллэриттэн үөрэбин. Төрөөбүт дойдугут, улуу Арассыыйа патриоттара буола үүнүҥ! Дойдугут эһиэхэ наадыйар. Өрөспүүбүлүкэҕэ дьоһуннаах үөрэҕи ылан, чугас дьоҥҥут туһугар айыҥ-тутуҥ”, — диэн Айсен Сергеевич эбэн эттэ.

Бу үөрэх дьылыгар диэри оҕолор мас, эргэ дьиэҕэ үөрэммиттэрэ. 5 тыһыынча кв.м. иэннээх саҥа оскуола үөрэх аныгы ыстандаартыгар эппиэттиир. Манна аактабай уонна спорт саалалара, улахан остолобуой, икки лингафоннай кэбиниэт, искусство кэбиниэтэ, бибилэтиэкэ, хореография устуудьуйата, лаборант хоһо, айар мастарыскыай – барыта бааллар. Кэбиниэттэр бары таҥыллыбыттар. Ону тэҥэ оскуола тэлгэһэтигэр оҕо былаһаакката уонна сынньалаҥ муннуга бааллар.

Оскуоланы СӨ инвестиционнай бырагырааматынан “Кинг-95” бэдэрээтчит туппут. Эбийиэк 508 мөлүйүөн солкуобай кэриҥэ суумалаах. Ороскуотун аҥаарын өрөспүүбүлүкэ бүддьүөтүттэн төлөөбүттэр, хаалбытын улуус бүддьүөтэ уйуммут.

СӨ Ил Дарханын уонна СӨ Бырабыыталыстыбатын пресс-сулууспата.

Мария ВАСИЛЬЕВА хаартыскаҕа түһэриилэрэ.

 

+1
0
+1
0
+1
0
+1
0
+1
0
+1
0
+1
0