Инвестор күнүн чэрчитинэн «АЛРОСА» хампаанньа тэрилтэ 2024 сылга диэри сайдар былаанын кэккэ тосхоллорун кытта билиһиннэрдэ. Сүрүн сорук быһыытынан, бырамыысыланнаска куттал суох буолуута, сир баайын хостуурга эппиэтинэстээх буолуу ыйыллыбыт.
edersaas.ru
Киһиэхэ доруобуйа туохтааҕар да күндү. Билиҥҥи туругунан, хампаанньаҕа үлэһиттэр эчэйиилэрэ орто көрдөрүүттэн лаппа намыһах эрээри, инникитин саахал тахсан, үлэ кэмигэр дьон эчэйэрэ уонна олохтон туоруур быһылаана аны төрдүттэн суох буолуохтааҕа этилиннэ.
Тулалыыр эйгэни харыстыыр бырагыраама СО2 углекислай гааһы таһаарыыны аҕыйатарга модьуйар. «АЛРОСА» айылҕа баайын хостуур сиригэр олохтоох нэһилиэнньэ олоҕун уйгута тупсарын туһугар инникитин даҕаны социальнай көмө, аһымал санаа аахсыйатын оҥорор былааннаах.
Хампаанньа аан дойду таһымыгар алмааһы туһаҕа таһаарарга инники күөҥҥэ сылдьар бас-көс тэрилтэ буоларын туоһулаан, 2018 сылга үлэ көдьүүһэ 2014 сылы кытта тэҥнээтэххэ, 17 бырыһыан үрдээбит. Кэлэр биэс сылга ити көрдөрүү өссө 12 бырыһыан эбиллиэхтээх.
Административнай ороскуот 2017 сылга 10%, 2018 сылга 2% кыччаабыт, ону ситиһэргэ үлэни цифровизацияҕа көһөрүү, тэрээһин үлэтин саҥаттан көрүү, үлэһиттэр туһаны аҕалар көдьүүстэрин үрдэтии ыытыллар. Кэлэр сылларга «АЛРОСА» саамай улахан барыстаах, рентабельнай көрдөрүүтүн икки төгүл тупсарар тэрилтэ буолуохтаах.
Хампаанньа аан дойдуга бастыҥнар ахсааннарыгар киирэр минеральнай-сырьевой базалаах. Геологтар аныгы технологияны туһанан, 2D уонна 3D электромагнитнай долгунунан геоинтроскопия уонна сейсмическэй чинчийии ыыталлар. Итиниэхэ тирэҕирэн, 2030 сылга диэри сылга кыччаабыта 38 мөлүйүөн караат алмааһы туһаҕа таһаарыахтара.
Маркетинговай сулууспа аан дойду үрдүнэн айылҕа алмааһыттан оҥоһуллубут дьиҥнээх бирилийээн киэргэллэри атыылаһарга дьон баҕата уостубакка өссө күөдьүйэн иһэрин туһугар үлэлиир. Ырыынакка синтетическэй уонна дьиҥнээх күндү таастары араарыахтара. Алмаастары цифровизациялаан, интэриниэт нөҥүө атыы киэҥник сайдыа.
Үбү-харчыны сөптүк туттарга инникитин тэрилтэ үлэтигэр сыһыана суох активтары салгыы таһааран, атыылаан иһиэхтэрэ. Онтон сир баайын хостуур үлэни сайыннарыахтара, кыаҕын улаатыннарыахтара.
«Аан дойду таһымнаах кэмиэрчэскэй хампаанньа буоларбыт быһыытынан, тэрилтэ акционернай сыаната үрдээн иһиэхтээх. Урукку өттүгэр ыраас барыс кээмэйиттэн көрөн дивиденд тыырар этибит, билигин ону уларытан, көҥүл харчы эргиириттэн 70-100% дивидеҥҥэ ыытыахпыт», — диэн эттэ «АЛРОСА» бырабылыанньатын бэрэссэдээтэлэ, тэрилтэ Генеральнай дириэктэрэ Сергей Иванов.
Марианна Тыртыкова, «Саха сирэ», edersaas.ru