АЛРОСА дивиденнэрин суотугар тутуллубут эбийиэктэр
Икки улахан социальнай эбийиэк – орто оскуола уонна Култуура дыбарыаһа — ааспыт нэдиэлэҕэ Бүлүү оройуонугар үлэҕэ киллэрилиннэ. Икки дьиэ аныгы хабааннары учуоттаан тутулунна уонна, биллэн турар, нэһилиэнньэлээх пууннарга, улууска сайдыы тирэҕинэн буолуохтара. Оттон бу дьиэлэри дьэндэтэн таһаарыы биһиги эрэгийиэммитигэр “АЛРОСА” хампаанньа олоххо киллэрэр дивиденин бэлиитикэтин көмөтүнэн ситиһилиннэ.
Кулун тутар 10 күнүгэр Бүлүү оройуонун икки нэһилиэгэр тута икки саҥа улахан суолталаах тутуу үөрүүлээх быһыыга-майгыга аһылынна: Тааһаҕар сэлиэнньэтигэр 3,4 тыһыынча м2 уопсай иэннээх саҥа оскуола, оттон Бүлүү куоракка – 2,8 тыһыынча м2 иэннээх Култуура дыбарыаһа ааннарын арыйдылар.
edersaas.ru
Манна даҕатан эттэххэ, Тааһаҕар оскуолата өрөспүүбүлүкэ кырдьаҕас оскуолатынан биллэр: оскуола үлэтин өссө 1867 сыллаахха саҕалаабыта. Бу сыллар тухары оскуоланы Саха сирин устуоруйатыгар бэйэтин суолун хаалларбыт тыһыынчанан эдэр киһи үөрэнэн бүтэрдэ. Оттон үөрэх кыһатын дьиэтэ таҥара-приходскай оскуола хас да кылааһыттан саҕалаан, эрэгийиэн Үөрэххэ министиэристибэтин тирэх пуунугар – 100 үөрэнээччигэ суоттаныллар орто үөрэх оскуолатыгар тиийэ суолунан айаннаан кэллэ.
Тааһаҕар оскуолатын саҥа дьиэтин тутуу биэс сыл анараа өттүгэр саҕаламмыта.
Билигин оскуола саҥа дьиэтигэр оҕолору үөрэтэргэ уонна сайыннарарга усулуобуйа барыта баар. Манна 84 оҕо үөрэнэр.
«Өрөспүүбүлүкэҕэ хас биирдии оҕо үөрэх аныгы эйгэтигэр уонна инники иһэр билиилэргэ көҥүл киирэр кыахтаах буолуохтаах. Оҕолорбутугар куттала суох, үчүгэй усулуобуйаны хааччыйыы Чэбдигирии сылыгар ордук улахан суолталаах. Биһиги сөптөөх уонна тэҥ болҕомтону бэйэбит духуобунай уонна майгы-сигили өттүнэн доруобуйабытыгар ууруохтаахпыт”, – диэн Саха сирин бырабыыталыстыбатын вице-премьерэ Сергей Местников эбийиэк үөрүүлээх быһыыга-майгыга аһыллар сиэригэр-туомугар бэлиэтээн эттэ.
Билигин оскуола Тааһаҕар нэһилиэгиттэн тахсыбыт биллиилээх судаарыстыбаннай диэйэтэл, РФ уонна СӨ үтүөлээх юриһа, III кылаастаах юстиция судаарыстыбаннай сүбэһитэ Николай Нифонтович Каратаев аатын сүгэр. Маннык быһаарыы 2000 сыллаахха ылыллыбыта уонна өрөспүүбүлүкэ бырабыыталыстыбатын тустаах уурааҕынан бигэргэтиллибитэ.
Култуура дыбарыаһыгар Марк Жирков аата иҥэриллиэ
Эмиэ бу күн Бүлүү куоракка Култуура дыбарыаһа аһылынна. Сотору кэминэн эбийиэккэ саха норуотун уһулуччулаах уола, Саха сирин бастакы идэлээх композитора Марк Жирков аата иҥэриллиэҕэ.
Култуура дыбарыаһын бастакы этээһигэр ааҕар саалалаах бибилэтиэкэ, 250 миэстэлээх саала, буфет, артыыстар бэлэмнэнэр уонна көстүүмнэри харайар хосторо, бутафорскай уонна мастарыскыай бааллар. Иккискэ этээскэ – үҥкүү уонна тыйаатыр саалалара, исписэлиистэр кэбиниэттэрэ, аппарааттар уонна көмпүүтэр кэбиниэттэрэ. Ону таһынан, манна Култуура сайдыытын уонна норуот айар талаанын оройуоннааҕы киинэ үлэтин саҕалыаҕа.
Дыбарыас аныгы технология уонна сырдыгы биэрэр, муусука, уо.д.а. тэриллэринэн сэбилэммит.
Доруобуйаларынан хааччахтаах дьону эмиэ умнубатахтар: дьиэҕэ үөһээ-аллараа түһэрэр-таһаарар тэриллэр туруоруллубуттар.
«Биһиги манна нэһилиэнньэни кытары үлэ саҥа ньымаларын олоххо киллэрэр итиэннэ айар холбоһуктарбытыгар дьарыктанар оҕолор уонна улахан дьон ахсаанын элбэтэр былааннаахпыт. Олус кэрэ, аныгы, толору хааччыллыбыт Култуура дыбарыаһыгар икки төгүл эппиэттэһэр гына үлэлиэхпитин, куруук туох эрэ саҥаны толкуйдуохпутун, куораппыт уонна оройуоммут олохтоохторун тускулларын туһугар үүнэ-сайда туруохпутун баҕарабыт”, – диэн киин үлэһиттэрэ Дыбарыас аһыллыытын сиэригэр-туомугар эттилэр.
Сүҥкэннээхэй дьиэ үс сыл иһигэр тутулунна. Тутууга Бүлүү оройуонугар киирбит АЛРОСА дивидениттэн 338 мөлүйүөн солкуобай туһанылынна.
Дивиденнэр суоттарыгар
Ити барыта Бүлүү улууһун бүддьүөтүгэр «АЛРОСА» АХ аахсыйаларыттан киирэр дивиденнэр суоттарыгар тутулунна.
— АЛРОСА хампаанньа бэйэтин үлэтиттэн киирэр дивиденнэринэн социальнай суолталаах саҥа кырасыабай дьиэлэр тутулуннахтарына, олус үөрэр. 2019 сыл түмүгүнэн «Алмаастаах түөлбэлэр» оройуоннарыгар АЛРОСА аахсыйаларын 8 бырыһыана тигистэ – хас биирдиилэригэр биирдии миллиард курдук. 2011-2019 сылларга бу аҕыс улуус 18,627 миллиард солкуобай суумалаах дивиденнэри ылла, – диэн АЛРОСА генеральнай дириэктэрин солбуйааччы Алексей Дьячковскай бэлиэтээн эттэ.
Хампаанньа өрөспүүбүлүкэ аныгы социальнай сайдыытыгар киэҥ хабааннаахтык кыттар. Ол курдук, дивиденнэри таһынан, өрөспүүбүлүкэҕэ, куораттарга уонна улуустарга Үүнэр көлүөнэ пуондатын нөҥүө АЛРОСА аһымал үбүн суотугар уонунан эбийиэк тутулунна уонна тутуллар. Аҥаардас 2020 сылга тутуллубут эбийиэктэри: Майа сэлиэнньэтигэр Д.Ф.Ходулов аатынан Култуура дыбарыаһын, Баатаҕай балыыһатын терапияҕа отделениетын саҥа куорпуһун, ону сэргэ Бороҕоҥҥо уонна Намҥа тутулла турар Култуура аныгы кииннэрин, Зырянка бөһүөлэгэр култуура-успуорт комплексын ааттыахха сөп. Олох соторутааҕыта, олунньуга хампаанньа пуонданы кытта саҥа сөбүлэһии түһэристэ. Ол аата, саҥаттан саҥа социальнай эбийиэктэр өрөспүүбүлүкэ улуустарыгар уонна куораттарыгар дьэндэһиэхтэрэ.
— Билигин АЛРОСА өрөспүүбүлүкэ бары кэриэтэ дьоһун суолталаах уонна наадалаах соруктарын толорууга кыттар. Онуоха алмаастаах хампаанньа дьоһун сорудаҕы толорор. Ол нолуогу үтүө суобастаахтык төлөөһүн эрэ буолбатах, кини – социальнай хайысхалаах бырагыраамалары олоххо киллэриигэ актыыбынай кыттааччы, – диэн бэлиэтээтэ Алексей Дьячковскай. – Ол курдук, хампаанньа үлэтин хайысхата ырыынакка инники ылбыт балаһыанньалары салгыы бөҕөргөтүүгэ эрэ буолбакка, ис түмүгү үрдэтиигэ хайысхаланар. Онуоха хампаанньа социальнай суолталаах сорудаҕынан, уруккутун курдук, өрөспүүбүлүкэ сайдыытыгар уонна нэһилиэнньэ олоҕо тупсарыгар көмөлөһүү буолар.
Алексей Дьячковскай санаатынан, алмаастаах түөлбэлэр бары оройуоннара социальнай инвестициялары ситиһиилээхтик туһаналлар уонна элбэтэллэр.
— Бүлүү куоракка Култуура саҥа дыбарыаһын арыйыы муниципальнай оройуоннар АЛРОСА дивиденнэрин суотугар саҥа бөдөҥ эбийиэктэри тутууну ситиһиилээхтик ыыталларын уонна инникитин алмаастаах хампаанньа дивиденнэрин үбүн көдьүүстээхтик ууруу суотугар эбийиэктэри көрүүнү-истиини итиэннэ өрөмүөнү хааччыйалларын көрдөрөр.
ЫСПЫРААПКА:
«АЛРОСА» АХ сыл аайы 850 мөлүйүөн солкуобайы СӨ Үүнэр көлүөнэ тус сыаллаах пуондатыгар ыытар.
Бу – пуонда ылар бары үбүн 90 бырыһыана.
2019 сыл түмүгүнэн, “алмаастаах түөлбэ” хас биирдии оройуона АЛРОСА дивиденин быһыытынан 1 миллиард курдук сууманы ылла.
2011-2019 сылларга 8 улуус 18,6 миллиард солкуобайдаах үбү ылла.
Икки эбийиэк Бүлүү улууһун бүддьүөтүгэр «АЛРОСА» АХ аахсыйаларыттан киирэр дивиденнэр суоттарыгар тутулунна.
Билигин АЛРОСА өрөспүүбүлүкэ дьоһун суолталаах уонна наадалаах бары кэриэтэ соруктарын быһаарыыга кыттар.
«Саха сирэ», edersaas.ru анаан Герман ЯКОВЛЕВ суруйуутуттан Надежда ЕГОРОВА тылбааһа.
Хаартыскаҕа Муза Федорова уонна Николай Куприянов
(“Олох суола” хаһыат) түһэриилэрэ.