АЛРОСА хампаанньа хостообут биир бөдөҥ алмааһыгар “Спутник V» диэн ааты иҥэрэргэ быһаарыы ылынна. Бу алмаас аан дойдуга бастакынан Арассыыйаҕа оҥоһуллубут вакцина аатынан ааттанна.
Алмаас 100,53 карааттаах, кээмэйэ: 27,15х28,81х29,56 мм, октаэдр быһыылаах, сырдык араҕас өҥнөөх. Анаабырга булуллубут.
— Бу маннык кээмэйдээх, быһыылаах уонна өҥнөөх алмаастар сэдэхтик көстөллөр, айылҕа дьиктитэ буолаллар диэххэ сөп. Коронавируснай инфекцияны утары аан бастаан айыллыбыт вакцина – киһи илиитинэн олус кылгас кэмҥэ оҥоһуллубут дьикти буолар. Ол түмүгэр аан дойдуну аймаабыт ыарыы намыраан, урукку олохпутугар төннүөхпүт диэн эрэнэбит. Онон учуонайдарга махтанан туран, бу сэдэх алмааска “Спутник V» диэн ааты биэрэргэ быһаардыбыт, — диэн АЛРОСА генеральнай дириэктэрэ Сергей Иванов эттэ.
“Спутник V» быһыыны бастакы сэбиэскэй куйаар аргыһын — “спутник” чиэһигэр ааттаммыта. Бу куйаар аргыһа аһаҕас космоска тахсан, саҥа чинчийиилэри ыытарга ааны арыйбыта. Быһыыны Гамалея аатынан Эпидемиология, микробиология научнай-чинчийэр киинигэр 2020 сыллаахха аҕыйах ый иһигэр оҥорбуттара.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru