Бүгүн, кулун тутар 3 күнүгэр, Сэбиэскэй Сойуус Дьоруойа, аатырбыт снайпер, Аҕа дойду Улуу сэриитин бэргэн ытааччыларын испииһэгэр 12-с киһинэн сылдьыбыт Федор Матвеевич Охлопков төрөөбүтэ 112 сылын туолла.
edersaas.ru
Сэбиэскэй Сойуус Дьоруойун, сержаны, 428 ньиэмэс-фашист саллаатын уонна офицерын урусхаллаабыт, 12-тэ бааһырбыт хорсун биир дойдулаахтарын аатын үйэтитээри кини өлбүтэ биир сылын кэннэ, 1969 сыллаахха атырдьах ыйын 4 күнүгэр 34,95 карат ыйааһыннаах алмааска “Снайпер Охлопков” аат иҥэриллибитэ.
1990 сыллаахха сатыы разведка ыстаарсай сержанын, эйэлээх кэмҥэ шахтерун, “Мир” туруупка карьерын экскаваторщигын, Сэбиэскэй Сойуус Дьоруойун Владимир Акимович Колбунов аатын 76,15 карааттаах алмааска иҥэрбиттэрэ.
1993 сыллаахха саха норуотуттан Сэбиэскэй Сойуус бастакы Дьоруойа Киин фронт 467-с стрелковай полкатын 3 стрелковай ротатын ытааччыта, өстөөх буулдьатын уотун аннынан тымныы Днепри туораабыт Федор Кузьмич Попов чиэһигэр кини аатынан бөдөҥ сыаналааах кристалл ааттаммыта.
1995 сыллаахха пулеметчик Николай Саввич Степанов аата айылҕа бөдөҥ тааһыгар иҥэриллибитэ.
2005 сыллаахха Аҕа дойду Улуу сэриитин дьоруойа, взвод хамандыыра, суруналыыс Николай Алексеевич Кондаков аата иҥэриллибитэ.
Бу үтүө үгэһи салҕаан, “АЛРОСА” АК (ПАУо) Саха сирин Ил Дарханын Айсен Николаев “100 анал ааттаах алмааһы — Саха сирин судаарыстыбаннаһын 100 сылыгар” бырайыагын өйөөтө.
Бырайыак чэрчитинэн Аҕа дойду Улуу сэриитин үбүлүөйдээх сылыгар 50 карааттан тахсалаах айылҕа бөдөҥ 20 алмааһыгар фроҥҥа Саха сириттэн кыргыспыт Сэбиэскэй Сойуус Дьоруойдарын аата иҥэриллиэҕэ.
Бүгүҥҥү туругунан, алмаастаах хампаанньа бу сыаналаах таастарга Сэбиэскэй Сойуус үс дьоруойун аатын иҥэрдэ. Ол курдук, тохсунньуга 76,64 карааттаах алмааска майор, салгын суудунатын хамандыыра Сергей Александровича Асямов аата иҥэриллибитэ. Биэс күн анараа өттүгэр пулеметчик Семена Васильевич Достовалов (55,26 караат) уонна Максима Степанович Жадейкин (70,78 караат) ааттара иҥэрилиннэ.
“АЛРОСА” уонна өрөспүүбүлүкэ холбоһуктаах бырайыактара 2022 сылга САССР 100 сылыгар диэри салҕаныаҕа. Кэнники икки сылга Саха сирин 80 чулуу уолун аата, итилэр истэригэр Социалистическай Үлэ Дьоруойдара, өрөспүүбүлүкэ сайдыытыгар кылааттарын киллэрбит дьон ааттара иҥэриллиэҕэ.
Яна Байгожаева, edersaas.ru
Бэлэмнээтэ Женни Стрюкова
[