Николай Долгунов «Алмаасэргиэнбаан» бырабылыанньатын салайааччытынан ананна. Кини кандидатуратын 2018 сыл ахсынньытыгар баан акционердара өйөөбүттэрэ, оттон билигин РФ Киин Бааныгар сөбүлэһиини ааста. Былырыын алтынньыга боломуочуйатын эрдэ тохтотор туһунан быһаарыммыт Людмила Николаеваны солбуйуоҕа.
edersaas.ru
Николай Николаевич Долгунов 1981 сыллаахха төрөөбүтэ. 2004 сыллаахха Москва куоракка Экэниэмикэ, статистика уонна информатика университетын бүтэрбитэ, идэтэ – баан үлэтэ, үп-харчы, кирэдьиит хайысхата. Ону таһынан, Москватааҕы эконометрика, информатика, үп-харчы уонна быраап аан дойдутааҕы институтун үпкэ менеджменин, 2014 сыллаахха РФ Бэрэсидьиэнин иһинэн судаарыстыбаннай сулууспа уонна норуот хаһаайыстыбатын Арассыыйатааҕы академиятын бүтэрбитэ.
15 сыл устата эрэгийиэн уонна федеральнай үп-харчы тэрилтэлэригэр араас дуоһунаска үлэлээн кэллэ. Баан эйгэтигэр, килийиэннэри кытта үлэҕэ, ис хонтуруолга уопутурда.
«Национальнай өрөспүүбүлүкэтээҕи бааҥҥа», Москваҕа ПВ-баан филиалыгар, «Навигатор» бааҥҥа, «ПФС бааҥҥа» исписэлиистэн саҕалаан, отдел, сулууспа начаалынньыгар тиийэ үүнэн-сайдан тахсыбыта. «Алмаасэргиэнбааҥҥа» 2018 сыл олунньутугар кэлэн, ис хонтуруол сулууспатын салайааччытынан үлэлээбитэ.
Марианна Тыртыкова, «Саха сирэ», edersaas.ru