«Алмааһы көрдөөччүлэр» оонньууга бибилэтиэкэрдэр күрэхтэстилэр

Ааптар: 
Бөлөххө киир:

Дойдуга таптал уонна муҥура суох бэриниилээх буолуу, Саха сирин норуодунай суруйааччыта Н. Г. Золотарев – Николай Якутскай төрөөбүтэ 112 сылларынан, Үөһээ Бүлүү улууһун кииннэммит библиотечнай ситим филиалларын эдэр бибилэтиэкэрдэригэр «Алмааһы көрдөөччүлэр» диэн квиз-оонньуу көхтөөхтүк, сэргэхтик ыытылынна.

Бу туһунан Харбалаах нэһилиэгиттэн бибилэтиэкэ сэбиэдиссийэ Рузанна Ахмедовна Николаева иһитиннэрдэ:

— Оонньууну И.Н. Бараахап аатынан СӨ судаарыстыбаннас түмэли кытта көмөлөөн оҥордубут. Оонньуу сыала: Саха сирин норуодунай суруйааччыта Н.Г. Золотарев – Николай Якутскай олоҕун, айымньыларын таптаан ааҕааччылары түмүү. Соруга: суруйааччы туһунан билиини тургутуу, хаалларбыт суолун ыччакка тиэрдии буолар.

Быйылгы дьыл коронавирус дьаҥынан, хааччахтааһынынан сибээстээн уонна аныгы үйэ ирдэбилинэн ZOOM платформанан буолла. Оонньуубут үс түһүмэхтээх: олоҕун оҥкула, оҕолорго айымньыта, улахан дьоҥҥо айымньытыттан ыйытыктар киирбиттэрэ. Оонньууга түөрт эдэр бибилэтиэкэр кытынна. Ол курудук, бастакы миэстэни Дүллүкү нэһилиэгин бибилэтиэкэрэ Яна Октябровна Борисова ылла. Иккис бочуоттаах миэстэҕэ Нам нэһилиэгин бибилэтиэкэрэ Уруйдаана Юрьевна Саввинова тигистэ. Үһүс бириистээх миэстэни очукуолара тэҥнэһэн, Далыр нэһилиэгин бибилэтиэкэрэ Александра Васильевна Акимова уонна Боотулуу нэһилиэгин бибилэтиэкэрэ Марианна Николаевна Лазарева үллэһиннилэр.

Бу оонньуу түмүгүнэн, ыччаттар биир дойдулаахпыт, Саха сирин норуодунай суруйааччыта Николай Якутскай айымньытын сөбүлээн, таптаан ааҕаллара көһүннэ. Дойдуга таптал уонна муҥура суох бэриниилээх буолуу сылыгар, биир дойдулаахтарын айымньытын, ытык киһи олоҕун оҥкулун ыччат дьоммут билэрэ-көрөрө, сэҥээрэрэ үөрдэр.

«Алмааһы көрдөөччүлэр» оонньуу Харбалаах нэһилиэгэр 2003 сылтан ыытыллар. Бу оонньууну саха тылын учууталлара Шестакова Александра Николаевна, Семенова Евдокия Павловна, Николай Якутскай түмэл дьиэтин сэбиэдиссэйэ Копыленко Светлана Даниловна уонна Харбалаах нэһилиэгин модельнай бибилэтиэкэтин сэбиэдиссэйэ Платонова Надежда Константиновна толкуйдаан оҥорбуттара. Дьоҥҥо-сэргэҕэ бастаан таһаарыахтарыттан, хас сылын аайы араас хамаандаҕа арахсан, нэһилиэк сөбүлээн, кэтэһэн-манаһан оонньуур оонньуута буолбута. Онон дьон-сэргэ сылын аайы биир дойдулаахтарын туһунан элбэҕи билэн, иҥэринэн иһэллэр. Бу биһиги биир дойдулаахпытын үйэтитии буолар. Аны, кэлэр сылларга улууспут иһинэн күрэстэһиини тэрийэн ыытар баҕалаахпыт.

Рузанна Николаева, Харбалаах нэһилиэгин модельнай бибилэтиэкэтин сэбиэдиссийэ

+1
0
+1
0
+1
0
+1
0
+1
0
+1
0
+1
0