«Аллараа Бэстээх» ыстаансыйаҕа 426 богуон таһаҕас кэллэ. Онтон бэҕэһээ, кулун тутар 29 күнүгэр, астаах-үөллээх, араас табаардаах уонна ньиэп бородуукталаах 118 богуону сүөкээтилэр. Бу туһунан бүгүҥҥү брифиҥҥэ СӨ Бырабыыталыстыбатын бэрэссэдээтэлин солбуйааччы Михаил Никифоров иһитиннэрдэ.
Вице-премьер бэлиэтииринэн, бэҕэһээ Ил Дархан салалталаах потребительскай ырыынак тэрилтэлэрин хааччыйыыга суһал ыстаап мунньаҕа буолбут. Онно Айсен Николаев «Аллараа Бэстээх» ыстаансыйаҕа табаары тиэйиини күүһүрдэргэ сорудахтаабыт.
Михаил Никифоров иһитиннэрэринэн, өрөспүүбүлүкэҕэ саахар саппааһа маҕаһыыннарга 66 күҥҥэ, кууһунан атыылааччыларга 147 күҥҥэ тиийэр баар. Атын бородуукталар, ол иһигэр мас арыыта 72, 92 күҥҥэ, бурдук 44, 29 күҥҥэ, гречкэ 67,82 күҥҥэ тиийэллэр.
Бүгүҥҥү күҥҥэ «Арассыыйа тимир суолларын» ситиминэн өрөспүүбүлүкэҕэ диэри 1948 богуон иһэр, онтон 1329 богуона «Аллараа Бэстээх» ыстаансыйаҕа кэлиэҕэ.
Сыана судаарыстыбаннай бэлиитикэтин кэмитиэтэ СӨ Борокуратууратын кытта бородуукта сыанатын хонтуруоллууллар.
Ил Дархан уонна Бырабыыталыстыба дьаһалтатын пресс-сулууспата иһитиннэрэр.